Josuạ 17 - সান্তালী বাইবেল

¹ Manase do Josephren maraṅicʼ hopone tahẽkante gulibãṭ hotete uniren gusṭiko hõ mitʼṭecʼ jaegako emocolena. Manaseren maraṅicʼ hoponakʼ ńutum do tahẽkana Makir. Makir do Gileadren apate tahẽkana. Makir do mitʼṭen maraṅ birbanṭa hoṛe tahẽkante Gilead ar Bason reakʼ ạidạri do laharegeye ńamakatʼ tahẽkana.

² Menkhan Manase gusṭiren sarecʼ bõsren hoṛko, metakʼme Abieser, Helek, Asriyel, Sikem, Hepher ar Semida bõsren hoṛko do Kanan disạm reakʼ jaega jumiko emoco akan tahẽkana. Bõsko secʼ khon nokoge Josephren hopon Manaseren sarecʼ hoponko tahẽkana.

³ Manaseren hopon Makir, Makirren hopon Gilead, Gileadren hopon Hepher ar Hepherren hopon Selophad. Selophadren do eken kuṛi hoponko tahẽkana, koṛa hopon do baṅa. Onko kuṛikoakʼ ńutum do hoyokʼ kana Mahla, Noyah, Hogla, Milkạ ar Tirsa.

⁴ Noko kuṛiko do naeke Eliaser ar Nunren hopon Josuạ ar murubbiko ṭhen senkateko menkeda, “Aleakʼ gusṭiren hoṛko talare ale hõ sompotti reakʼ mitʼṭecʼ hĩs emale lạgitʼ Probhu Isor do Moseye hukumade tahẽkana.” Noa katha ańjomkate Josuạ do Probhu Isorakʼ hukum leka onkoren apatren boehako sãote onkoakʼ sompotti reakʼ ạidạriye ematʼkoa.

⁵ Jordan reakʼ purub secʼ Gilead ar Bason chaḍa hõ Manase gusṭirenko do hạṭińre arhõ gel goṭecʼ jumiko ńamkeda,

⁶ Ente Manase gusṭiren noko kuṛiko do ako gusṭiren koṛa hoponko sãote sompotti reakʼ ạidạriko ńamkeda; ar Manase gusṭiren sarecʼ bõsko do Gilead ṭoṭhako ńamkeda.

⁷ Manase gusṭikoakʼ simạna do Aser khon ehopʼkate Sikem ṭhenakʼ Mikmithat hạbicʼ senena. Ar ona tayom do dạkhin secʼ sen idiyena, onate En-Tapuaren hoṛko do Manase gusṭirenkoakʼ elakakore paṛaoena.

⁸ Tapua reakʼ aḍepase jaegako do Manase gusṭirenkoakʼ hạṭińrege paṛaolena menkhan Manase gusṭirenkoakʼ simạna sãote ropokʼ mitʼakan Tapua nagraha do Ephrayim gusṭirenkoakʼ ạidạrire paṛaoena.

⁹ Ona tayom ona simạna do dạkhin Kana reakʼ rohoṛ gaḍa hạbicʼ pheḍ hecʼena. Ephrayim gusṭiko reakʼ adomakʼ ato ar nagrahako do Manase gusṭirenkoakʼ simạnare paṛao akan tahẽkana. Manase gusṭirenkoakʼ simạna do rohoṛ gaḍa utạr secʼte senkate jalapurire mucạtʼena.

¹⁰ Ephrayem gusṭirenkoakʼ jaega do rohoṛ gaḍa dạkhinre tahẽkana ar utạrre do tahẽkana Manase gusṭirenkoakʼ jaega. Manase gusṭirenkoakʼ pạchim senakʼ simạna do jalapuri hạbicʼ, ar utạr secʼ reakʼ do Asren gusṭikoakʼ simạna hạbicʼ ar purub secʼ do Isakar gusṭiko reakʼ simạna hạbicʼ tahẽkana.

¹¹ Isakar ar Asren gusṭikoakʼ simạna tala reakʼ Betʼ-Sean, Iblean ar onako aḍepase reakʼ sanam atoko do Manase gusṭirenkoko emoco akan tahẽkana. Ona chaḍa Dorren, En-Dorren, Tanak ar Magidoren hoṛko sudhạ niạko nagraha ar onako aḍeparen sanam atoko Manase gusṭirenko emocoakan tahẽkana. Ar mucạtʼ secʼ reakʼ pea nagraha ar onako sãoteakʼ atoko do buru ṭoṭhare tahẽkana.

¹² Menkhan Manase gusṭiren hoṛko do onako ato ar nagrahako bako hat daṛeada, ente Kananiko doko khạṭi akawan tahẽkana, ona jaega do bako bạgiyakʼa.

¹³ Tobe Israelko tinreko daṛe idiyena unre Kananiko do akoren golam lekate kạmi lạgitʼko sapʼpaṭetʼketʼkoa. Ar disạm khon do bako laga ńirletʼkoa.

¹⁴ Joseph gusṭiren hoṛko do senkate Josuạko metadea, “Sompotti lekate cedakʼ am do eken mitʼ hạṭińem ematʼlea? Probhu Isorakʼ ạsirbad iạte aleakʼ lekha do ḍhergetalea.”

¹⁵ Josuạ do roṛ ruạṛatʼkoteye metatʼkoa, “Aperen hoṛko lekhare nunạkʼko ḍherge khan ar Ephrayim buru ṭoṭhare bape sahobokʼkan khan tobe do Pherisiko ar Rephiyikoakʼ disạm reakʼ bir gajaṛko makʼ saphakate jumiko benao joṅpe.”

¹⁶ Joseph gusṭiren hoṛko roṛ ruạṛkeda, “Buru reakʼ onako jaegare ale do bale sahobokʼa ar okoe Kananiko bilạn ṭạnḍi reakʼ Bet-Sean ar ona aḍepase atokore ar Jisreyel lodamreko girobasokʼ kan onko sanamko do mẽṛhẽtʼ reakʼ rãt gạḍiko menakʼtakoa.”

¹⁷ Josuạ do Josephren bõsko, metakʼme Ephrayim ar Manase gusṭiren hoṛkoe metatʼkoa, “Aperen hoṛ hõko saṅgegea, ar daṛe hõ ḍhergetapea. Ape do eken mitʼṭecʼ hạṭiń do bape ńama.

¹⁸ Bir-gajaṛte perecʼ buru ṭoṭhako hõpe ńama. Ona makʼ saphae hoyokʼtapea. Gajaṛ ar ona sãoteakʼ sanam jumiko do apeakʼ ạidạrire tahena. Kananikoakʼ mẽṛhẽtʼ reakʼ rãt gạḍi tahẽlenre hõ arko daṛegere hõ ape do onkope laga ńir daṛeakoa.