Josuạ 16 - সান্তালী বাইবেল

Eprayim ar Manase gusṭirenkoakʼ jaega

¹ Gulibãṭ lekate Joseph gusṭiren hoṛko oka jaegako ńamketʼ ona reakʼ simạna do hoyokʼ kana Jerikho samaṅ senakʼ Jerikho dakʼ jharna purub secʼ reakʼ jordan gaḍa hạbicʼ. Ona tayom simạna do hahaṅkar talate senkate Bethel reakʼ buru ṭoṭha secʼ rakapʼ calaoena.

² Bethel khon ona do Luste senena ar Lus khon Atarotte Arkikoakʼ jaega hạbicʼ.

³ Ona tayom simạna do pạchim secʼ pheḍ hecʼente latar reakʼ Bet-Horon ṭoṭha hạbicʼ Jophletkoakʼ elakate senkate onḍe khon Geser hạbicʼ calaoena ar jalapurire senkate mucạtʼena.

⁴ Josephren hopon Manase ar Ephrayim gusṭiren hoṛko do niạko sompottigeko ńamkeda.

^5-6 Ephrayim gusṭiren judạ judạ bõskoakʼ jaega do hoyokʼ kana: purub secʼ onkoakʼ sompotti reakʼ simạna do Atarot-Adar khon ehopʼkate cetan reakʼ Bet-Horonte senkate jalapuri hạbicʼ calaoena. Ona tayom utạr secʼte ona simạna do Mikmathot khon ạcurkate purub secʼ Tanot-Silo paromkate Jano purub secʼ calaoena.

⁷ Jano khon ona do pheḍ hecʼente Atarot ar Nara secʼte Jerikho reakʼ simạna aṛete jordan gaḍa hạbicʼ senena.

⁸ Utạr reakʼ simạna do Tapua khon pạchim secʼ rohoṛ gaḍa Kana secʼte jalapurire mucạtʼ akana. Niạ do hoyokʼ kana Ephrayim gusṭiren judạ judạ bõsrenkoakʼ sompotti.

⁹ Ona chaḍa Manase gusṭi reakʼ sompottiko reakʼ thoṛagan nagraha ar onko aḍepase reakʼ atoko do Ephrayim gusṭirenko ńamletʼ tahẽkana.

¹⁰ Geserre okoe Kananiko girobasokʼkan tahẽkan onko do bako laga ńirletʼkoa. Onate teheń hạbicʼ hõ onko do Ephrayim gusṭiren hoṛko sãoteko girobasokʼkana; tobe Ephrayim gusṭiren guti lekate onko do begari kạmi lạgitʼ golamko hoyakana.