Josuạ 15 - সান্তালী বাইবেল

Jihudạ gusṭikoakʼ jaega

¹ Gulibãṭ lekate Jihudạ gusṭiren judạ judạ bõsko oka jaegako ńamketʼ ona reakʼ simạna do Edom disạm reakʼ simạna hạbicʼ, metakʼme Sin hahaṅkar reakʼ dạkhin simạ hạbicʼ calao idiyena.

^2-3 Onkoakʼ dạkhin reakʼ simạna dag do buluṅ doreão dạkhin aṛe reakʼ huḍiń doreão khon ehopʼkate Akrabimte rakapʼ calakʼ hor reakʼ dạkhin secʼ paromkate Sin hahaṅkar secʼte Kades-Barnear reakʼ dạkhinte calao akana. Onḍe khon ona simạna dag do Hesron paromkate Adar hạbicʼ senente Karkate ạcur calaoena.

⁴ Onḍe khon Asmon secʼ sen idiyente Misor ńutuman okaṭakʼ rohoṛ gaḍa menakʼ ona sãote mitʼente jalapurire senkate mucạtʼena. Ar niạge hoyena apeakʼ dạkhin reakʼ simạna do.

^5-6 Purub senakʼ simạna do hoyokʼ kana buluṅ doreão secʼ senakan jordan gaḍa dul mitʼakan hạbicʼ. Jordan gaḍa okare buluṅ doreãote senkate dul mitʼakan ar onḍe okaṭakʼ huḍiń doreão menakʼ onḍe khon utạr seakʼ simạna dag do ehopʼkate Beth-holga hạbicʼ senkate Beth-Araba reakʼ utạr secʼ lekate Rubenren hopon Bohanakʼ dhiri hạbicʼ sen idiyena.

⁷ Ar ona do Akor tapol khon Debir hạbicʼ rakapʼ calaoente utạr secʼakʼ lodam reakʼ dạkhin reakʼ Adumimte rakapʼ calakʼ hor reakʼ samaṅ secʼ Gilgal hạbicʼ sen idiyena. Ar Gilgal khon En-Semser reakʼ ạtukʼkan dakʼ hạbicʼ sen idiyente ona do En-Rogel ṭhen mucạtʼena.

⁸ Onḍe khon ona do Jebusikoakʼ nagraha reakʼ, metakʼme Jerusalem reakʼ dạkhin dhasnako reakʼ jaega hạbicʼ senkate Ben-Hinom buru muthnite rakapʼ calaoena. Ar onḍe khon simạna do Rephayim tapol reakʼ utạr simạna reakʼ Hinom tapol reakʼ pạchimre okaṭakʼ buru menakʼ onḍe hạbicʼ rakapʼena.

⁹ Ona tayom simạna do buru cetan khon Nephto reakʼ dakʼ jharna secʼ calao idiyena. Onḍe khon Ephron buru reakʼ atoko sorte oḍok senkate Bala secʼ, metakʼme Kiriat-Jearim secʼ pheḍ hecʼena.

¹⁰ Ar Bala khon pạchim secʼ ạcurente ona do Seyir buru secʼ rakapʼ calaoena; ona tayom do Jearim buru, metakʼme Kesalon utạr reakʼ dhasna secʼ senkate Bet-Semseste pheḍ hecʼente Timna hạbicʼ calaoena.

¹¹ Ona tayom ona simạna do Ekron utạr reakʼ dhasna secʼ senkate Sikron secʼ ạcurente sojhe Bala buru secʼ calao idiyena ar Jabneyel seṭerkate jalapuri hạbicʼ mucạtʼena.

¹² Pạchim secʼ reakʼ simạ do hoyokʼkana jalapuri aṛe. Niạ do hoyokʼ kana Jihudạ gusṭiren judạ judạ bõsrenkoakʼ jaega reakʼ beṛhaeteakʼ simạna.

¹³ Josuạ do Probhu Isore hukumletʼ lekage Jephunren hopon Kaleb do Jihudạ gusṭirenkoakʼ jaega talare Kiriạt-Arba, metakʼme Hebron nagrahae ematʼko tahẽkana. Arba do Anakikoren hapṛame tahẽkana.

¹⁴ Kaleb do Sesae, Ahiman ar Talmae ńutuman pea Anakiko Hebron khone laga ńirketʼkoa. Noko do Anakren hoponko tahẽkana.

¹⁵ Onḍe khon Kaleb do Debir nagraharen hoṛko upạrte lạṛhại lạgitʼe calaoena. Lahate Debir reakʼ ńutum do Kiriạt-Sepher tahẽkana.

¹⁶ Kaleb doe menleda, “Jãhãege Kiriạt-Sephere hat, uni sãotege ińren hoponera Aksa doń baplakaea.”

¹⁷ Niạ katha ańjomkate Kenas hopon Kaleb bokot Othniyel do onae hatkeda. Ar onate Kaleb do Othniyel sãote acʼren hoponerae baplakadea.

¹⁸ Othniyel ṭhen sen tayom uni do Aksae uskạukedea jemon apat ṭhen khon mitʼṭecʼ jumiye hatao. Ar gadha khon Aksae pheḍen khan Kaleb do uniye kulikedea, “E biṭi, cetʼem khojkana?”

¹⁹ Uniye menkeda, “E baba, ińakʼ mitʼṭecʼ katha dohoytińme. Am do tinre Negeb hahaṅkar jaegam emakana unre dakʼ jharnako hõ imạńme.” Niạ katha ańjomkate Kaleb do onḍenakʼ usul ar latar jaega reakʼ dakʼ jharnakoe emadea.

²⁰ Jihudạ gusṭiren judạ judạ bõsko okaṭakʼ sompottiko emocoyen ona do hoyokʼ kana-

²¹ Edom sor reakʼ Negebre onkoakʼ ṭoṭha reakʼ dạkhinre okaṭakʼ nagraha ar atoko ńamletʼ onako reakʼ ńutum do hoyokʼkana; Kobsel, Edar, Jagor,

²² Kena, Dimona, Adad,

²³ Kedes, Hasor, Ethnan,

²⁴ Seph, Telem, Bealot,

²⁵ Hasor-hadatta, Kiriot-Herson, metakʼme Hasor,

^26-28 Amam, Sema, Molada, Hasor-Gada, Hesmon, Bet-Pelot, Hasar-Sual, Berseba, Bisiatea,

^29-31 Bala, Eyim, Esam, Eltelad, Kosil, Horma, Siklag, Madmana ar Sonsana,

³² Lebat, Silhim, Ayin ar Remon. Jotote bargel are goṭecʼ nagraha ar ona aḍe pase atokoko ńamletʼ tahẽkana.

³³ Latar buru ṭoṭhako modre okako nagraha ar atokoko ńamletʼ onako do hoyokʼ kana: Estaol, Sora, Asna,

³⁴ Sanao, En-ganim, Tapua, Enam,

³⁵ Jarmut, Adulam, Soko, Aseka,

³⁶ Saryim, Adithayim, Gedera ar Gederthayim. Niạ gelpon goṭecʼ nagraha ar ona aḍepase reakʼ atokoko ńamleda.

^37-39 Senan, Hadesa, Megdal-Gad, Dilian, Mispe, Joktheyel, Lakis, Boskat, Eglon,

⁴⁰ Kobon, Lohmam, Ketlis,

⁴¹ Goderot, Bet-Dagon, Nama ar Makeda. Niạ gel turui goṭecʼ nagraha ar ona aḍepase reakʼ atokoko ńamleda.

^42-44 Libna, Ethar, Asan, Ephta, Asna, Netsib, Kiyila, Aksib ar Maresa. Niạ are goṭecʼ nagraha ar ona aḍepase atokoko ńamleda.

⁴⁵ Ekron nagraha ar ona aḍepase reakʼ jaega ar atoko,

⁴⁶ Ekron pạchim secʼ Asdad reakʼ sanam atoko,

⁴⁷ Asdad ar ona aḍepase reakʼ jaega ar atoko, Misor reakʼ rohoṛ gaḍa ar jalapuri aṛe reakʼ Gasa ar ona aḍepase reakʼ sanam jaega ar onako atokoko ńamleda.

⁴⁸ Usul buru ṭoṭhako modre okako nagrahako ńamletʼ onako do hoyokʼ kana: Samir, Jatir, Soko,

⁴⁹ Dana, Kiriạt-Sana, metakʼme Debir,

⁵⁰ Anab, Estemo, Anim,

⁵¹ Gosen, Holon ar Gilo. Niạ gelmitʼ goṭecʼ nagraha ar ona aḍepase reakʼ atokoko ńamleda.

^52-54 Arab, Duma, Esan, Janim, Bet-Tapua, Apeka, Humta, Kiriat-Arba, metakʼme Hebron ar Seyir. Niạ are goṭecʼ nagraha ar ona aḍepase reakʼ atokoko ńamleda.

^55-57 Maon, Karmel, Siph, Juta, Jisrayel, Jokdeam, Sanoah, Kayin, Gibea ar Timna. Niạ gel goṭecʼ nagraha ar ona aḍepase reakʼ atokoko ńamleda.

⁵⁸ Halhul, Bet-Sur, Gedor,

⁵⁹ Mirat, Bet-Anot ar Eltekon. Nia turui goṭecʼ nagraha ar ona aḍepase reakʼ atokoko ńamleda.

⁶⁰ Kiriat-Bakʼal, metakʼme Kiriat-Jearim ar Raba. Niạ barea nagraha ar ona aḍepase reakʼ atokoko ńamleda.

⁶¹ Hahaṅkar ṭoṭhare okako jaegako ńamletʼ onako do hoyokʼkana. Bet-Araba, Midin, Sekaka,

⁶² Nibsan, Ermelah ar En-Gedi. Niạ turui goṭecʼ ato ar nagraha ar ona aḍepase reakʼ atokoko ńamleda.

⁶³ Jihudạ gusṭi do menkhan Jebusiko bako laga ńir daṛeatʼkoa. Jebusiko do Jerusalemren hoṛko tahẽkana. Jihudạ gusṭiren hoṛko sãote Jibusiko do teheń hạbicʼ onḍeko girobasokʼkana.