Josuạ 14 - সান্তালী বাইবেল

Jordan pạchim reakʼ jaegako

¹ Eṭakʼ Israelko do Kanan disạmre sompotti lekate jaega jumiko ńamkeda. Naeke Eliaser, Nunren hopon Josuạ ar Israelren judạ judạ gusṭi ar gharońjren mukhiyạko do onako hạṭińatʼkoa.

² Probhu Isor do Mose hotete okae hukumletʼ onkage Israelkoren are tala gusṭiko modre gulibãṭkate sompottiko hạṭińatʼkoa.

³ Ar barea tala gusṭirenko Mose do laharege jordan purub secʼre sompottiye ematʼko tahẽkana, menkhan Israelko talare Liwi gusṭiko do jãhãn sompotti bae ematʼkoa.

⁴ Manase ar Ephrayim ńutuman Josephren hoponkin hotete barea gusṭi benaolena. Liwiko do jumi reakʼ bhag bako ńamleda, menkhan girobasokʼ lạgitʼ ar jinisko dohoy lạgitʼ adom adom atoko, nagrahako ar gại-ḍaṅgra ar bhiḍi merom ạtińko lạgitʼ beṛhaeteakʼ ạtiń ṭạnḍiko ńamkeda.

⁵ Probhu Isor do Mose cetʼleka hukumade tahẽkan onkage Israelko do disạmko hạṭińana.

Kalebakʼ hạṭińre do Hebron

⁶ Jihudạ gusṭiren hoṛko do Gilgalte Josuạ ṭhenko senena ar Kenisi Jephunren hopon Kaleb do uniye metadea, “Probhu Isor do Kades-Barneare acʼren hoṛ Mose ṭhen iń ar am reaṅ okae menletʼ ona dom baḍaegea.

⁷ Probhu Isorren guti Mose do disạm cikʼyạ ạgui lạgitʼ tinre Kades-Barnear khone kolledińa unre ińakʼ umer do pongel bochor tahẽkana. Ar iń do disạm ńelkate okań bujhạu daṛeakʼ tahẽkan onalekage uni ṭhen sombatiń idiletʼa,

⁸ menkhan okoe boehako iń sãoteko senlen onko do hoṛkoko as chuṭạuletʼkoa. Menkhan iń do ińren Probhu Isorakʼ katha purạteń manao ạguakada.

⁹ Ona iạte Mose enhilokʼ iń ṭhen okae gokʼletʼ tahẽkan, ‘am okaṭakʼ jaegam ńel ạguakatʼ ona do jaejug lạgitʼ am ar amren bõsrenkoakʼ sompotti lekatege tahena, ente am do ińren Probhu Isorakʼ katha purạtem manao ạguakada.’

¹⁰ “Buluṅ doreãore tinre Israelko doko ạcur baṛaekan tahẽkana ar Probhu Isor do Mose noa kathae metade tahẽkan ar un khon uniyakʼ gokʼakʼ lekate niạ pongel mõṛẽ bochor iń do jiwetʼe dohoakadińạ, ar ńitokʼ ińakʼ umer do irạl gel mõṛẽ bochor hoyakantińạ.

¹¹ Mose oka hilokʼe kollediń enhilokʼ leka teheń hạbicʼ hõ daṛege minạńa; ar ńitokʼ hõ lạṛhại calakʼ ar sanamakʼ kạmi reakʼ daṛe menakʼgetińạ.

¹² Nokʼõe noa buru ṭoṭha enhilokʼ emokʼ reakʼe gokʼạdiń tahẽkana ńit ona baṛe imạńme. Unre amem ańjomleda, Ananikiko do onḍeko girobasokʼ kana ar onkoakʼ nagraha do maraṅgea ar beṛhaete pạcri esetʼgetakoa. Menkhan Probhu Isor iń sãoteye tahen khan uniyakʼ katha lekage onkoń laga ńirkoa.”

¹³ Niạ katha ańjomkate Josuạ do Jephunren hopon Kalebe bhoradea ar sompotti lekate Hebron nagrahae emadea.

¹⁴ Ar enhilokʼ khon Hebron do Kenisiren Jephun hopon Kalebakʼ ạidạrire menakʼa, ente uni do Israelren Probhu Isorakʼ katha purạteye manaoleda.

¹⁵ Ananikiko modre Arbo ńutuman mitʼṭen ektiạran hoṛakʼ ńutum leka Hebron do lahate Kiriạt-Arbako metakʼkan tahẽkana. Inạ tayom disạmre lạṛhại do thir akan tahẽkana.