Josuạ 13 - সান্তালী বাইবেল

Sarecʼ jaegako reaṅ Probhu Isorakʼ hukum

¹ Josuạ do umer ḍher idiyente tinreye haṛamena unre Probhu Isor do uniye metadea, “Am dom haṛamena, ar ḍher umer hoyakana menkhan disạm reakʼ ḍher jaega ńithõ menakʼgea one okaṭakʼ do ạuri dokholokʼ.

^2-4 Okako jaega ńithõ ạuri dokholokʼ onako modre Misor reakʼ purub secʼ Sihor gaḍa khon ehopʼkate utạr secʼ Ekron reakʼ simạ hạbicʼ Palesṭirenko ar Gesurrenkoakʼ goṭa elaka menakʼa. Niạko elaka do Kananikoakʼ elaka kana. Onḍe do Gasa, Asdod, Askelon, Gat ar Ekron ńutuman mõṛẽ rapajkoakʼ mõṛẽ goṭecʼ nagraha menakʼa, ar dạkhinre do Awikoakʼ elaka kana. Ona chaḍa arhõ aema jaega do dokhol bạki menakʼa, ona do hoyokʼ kana Sidonrenkoakʼ Meara khon Amorikoakʼ sima reakʼ Apheka hạbicʼ Kananiko reakʼ sanam elaka,

^5-6 Giblikoakʼ elaka, purub secʼ Hermon buru latar Bakʼal-Gad khon Hamat hạbicʼ goṭa Lebanon ar Lebanon khon Misrephot-Mayim hạbicʼ buru elaka, metakʼme Sidonkoakʼ goṭa disạm. Iń apnarge Israelko samaṅ khon onko jotogeń laga ńirkoa. Ar cetʼ lekań hukum akatʼ onkage niạ disạm do sompotti lekate Israelkom emakoa.

⁷ Israelkoren are gusṭi ar Manase gusṭiren adha hoṛge sompotti lekate onam hạṭińakoa.”

Jordan purub secʼ reakʼ jaegako

⁸ Manase gusṭiren adha hoṛko, Ruben ar Gad gusṭiren hoṛko do jordan gaḍa purub secʼ reakʼ jaegako do sompotti lekate laharegeko ńamakatʼ tahẽkana. Probhu Isorren guti Mose do onko lạgitʼ ona jaegageye ṭhik dohoakatʼ tahẽkana.

^9-10 Onkoakʼ niạ jaega do ehopʼakana Arnon lodam aṛe reakʼ Aroer nagraha khon ar ona lodam reakʼ adha ato khon. Onako modre menakʼa Dibon hạbicʼ Medeba reakʼ goṭa bilạn ṭạnḍi ar Amonrenkoakʼ disạm reakʼ simạ hạbicʼ Hesbonren Amori raj Sihonakʼ goṭa atokoge.

¹¹ Gilead elaka, Gesuriko ar Makathikoakʼ elaka, goṭa Hermon buru ar Salka hạbicʼ goṭa Bason disạm hõ onare menakʼa.

¹² Niạ do tahẽkana Basonren raj Ogakʼ rajosṭi. Uni do Astaroth ar Edreyi khone rajokʼkan tahẽkana. Rephiyiko talare un anecʼ hõ okoe do jiwetʼko tahẽkan onko modre uni hõe tahẽkana. Mose do onkoe bhagaoketʼkote onkoakʼ disạme hatleda.

¹³ Menkhan Israelko do Gesuriko ar Makathirenko bako laga ńirletʼkoa; ona iạte teheń hạbicʼ onko do Israelko talare menakʼkoa.

¹⁴ Mose do Liwi gusṭirenko oka sompottige bae ạidạri ocoatʼkoa, ente Probhu Isorakʼ gokʼakʼ lekage onko do Israelkoren Probhu Isor ńutumte seṅgelre samaṅakʼ jiniskoge onkoakʼ sompotti do hoyokʼa.

^15-16 Mose do Ruben gusṭiren judạ judạ bõsko okako jaegae ematʼko tahẽkan ona do Arnon lodam aṛe reakʼ Aroer nagraha khon ar lodam reakʼ adha ato khon ehopʼakan tahẽkana. Onako modre Medeba beṛhaeteakʼ goṭa bilạn ṭạnḍi,

¹⁷ Hesbon ar bilạn ṭạnḍi reakʼ adha ato ar nagrahako. Noa ato ar nagrahako do hoyokʼkana Dibon, Bamot-Bakʼal, Boet-Bakʼal-Meon,

¹⁸ Jahas, Kedemot, Mephat,

¹⁹ Kiriạtheyim, Sibna, ar lodamko modre buru cetan reakʼ Selet nagraha,

²⁰ Beot-Piyạr, Pigsa buru dhasnako ar Boet-Jesimot.

²¹ Niạko do tahẽkana bilạn ṭạnḍi reakʼ ato ar nagraha ar Hesbonren Amorikoren raj Sihonakʼ goṭa rajosṭige. Mose do nui raj ar Ewi, Rekem, Sur, Hur ar Reba ńutuman Midiạnren sordarkoe bhagaoletʼkoa. Noko do inạ elareko girobasokʼkan tahẽkana ar Sihonren raj tabereko tahẽkana.

²² Lạṛhạire okoeko gocʼ ocolen tahẽkan onko chaḍa Israelko do Beor hopon gonok Biliam hõko gocʼledea.

²³ Ar jordan gaḍa do Rubenrenko reakʼ pạchim simạnare tahẽkana. Niạko nagraha ar ona aḍepase reakʼ atoko do Ruben gusṭiren judạ judạ bõsren hoṛko sompotti lekateko ńamleda.

^24-25 Mose do Gad gusṭiren judạ judạ bõskoren hoṛko okako jaegae ematʼko tahẽkan onako modre do Jaser, Gilead reakʼ sanam atoko ar Raba ṭhenakʼ Aroer hạbicʼ Amonrenkoakʼ adha elakako hõ tahẽkana.

²⁶ Ona chaḍa onako modre Hesbon khon Ramot-Mispa ar Betonim hạbicʼ ar Mahanayim khon Debir hạbicʼ sanam jaega,

²⁷ ar lodam tala reakʼ Bet-Haram, Bet-Mimra, Sukot, Saphon ar Hesbonren raj Sihonakʼ rajosṭi reakʼ sarecʼ hĩsko ar Kineret doreão reakʼ dạkhin hạbicʼ jordan gaḍa purub aṛe secʼte goṭa elaka tahẽkana.

²⁸ Niạko nagraha ar ona aḍepase reakʼ atoko do Gad gusṭiren judạ judạ hoṛko sompotti lekateko ńamleda.

^29-30 Mose do Manase gusṭiren adha hoṛkoren judạ judạ bõsko oka jaegae ematʼko tahẽkan ona do hoyokʼ kana Mahanayem khon ehopʼkate goṭa Bason disạm. Niạ do tahẽkana Basonren raj Ogakʼ goṭa rajosṭi. Ona modre tahẽkana Jayir reakʼ joto atoko, metakʼme turui gel atoko,

³¹ Gilead reakʼ adha jaega ar Astarot ar Edreyi nagraha. Niạ banar nagraha khon Basoren raj Og doe rajokʼkan tahẽkana. Niạ jaegakin do Manaseren hopon Makirren adha hoṛkoren judạ judạ bõskoko emocolena.

³² Mose do Jordan hanasare Jerikho reakʼ purub secʼ Moab reakʼ bilạn ṭạnḍire ona jaega do sompotti lekateye hạṭińatʼko tahẽkana.

³³ Menkhan uni do Liwi gusṭirenko oka sompotti hõ bae ematʼkoa; onko ṭhen Probhu Isor okae gokʼletʼ ona lekage Israelren Probhu Isorge onkoren sompottiye tahẽkana.