Josuạ 11 - সান্তালী বাইবেল

Utạr secʼren rajko

¹ Hasorren raj Jabin do noako ańjomkate Madonren raj Jobab ar Simronren ar Aksaphren rajkin ṭhen sombate kolkeda.

² Ona chaḍa uni do utạr secʼren okoe rajko tahẽkana onko sanamko ṭhen hõ sombate kolkeda. Onako rajosṭi do buru disạmre, Kinerot dạkhin Araba reakʼ bilạn ṭạnḍire, latar buru ṭoṭhare ar pạchim reakʼ Dorer buru ṭoṭhare tahẽkana.

³ Uni do purub ar pạchim secʼren Kananiko ṭhen ar buru elakaren Amoriko, Hittiko, Pherisiko ar Jebusiko ṭhen ar Hermon buru latar reakʼ Mispa ṭoṭharen Hiwiko ṭhen hõ sombate kolkeda.

⁴ Onko rajko do akoren sanam lạṛhại phạdko sãoteko oḍok hecʼena. Onko do doreão reakʼ gitil leka ạḍi utạrko hoyena. Onko sãote do sadom ar rãt-gạḍiko hõ tahẽkana.

⁵ Onko rajko do mitʼṭecʼ niṭ akatʼ jaegareko jarwayente Israelko upạrte lạṛhại lạgitʼ Mirom ńutumanakʼ mitʼṭecʼ dakʼ jharna ṭhenko ḍerayena.

⁶ Unre Probhu Isor do Josuại metadea, “Onko do alom botorakoa, ente gapa niạ okte bhitrite Israelko samaṅre onko sanamkoń marao cabakoa. Ar am do onkoren sadomkoakʼ jaṅga sirem ged takoa ar rãt-gạḍikom jeretʼ giḍikatakoa.”

⁷ Unre Josuạ do acʼren sanam lạṛhại phạdante Mirom reakʼ dakʼ jharna ṭhen onko upạrte ackageko seṭerena ar onkore jhãpko emkeda.

⁸ Probhu Isor do Israelkoakʼ tire onkoe jimạkatʼkoa. Israelko do onko gocʼ gocʼte maraṅ Sidon, Misrephot-Mayim ar purub secʼ reakʼ Mispa lodam hạbicʼko khudạu idiketʼkoa. Ar mucạtʼ hạbicʼ okoehõ jiwetʼ do bako tahẽlena.

⁹ Probhu Isor do Josuạ cetʼlekae hukumade tahẽkan onkage bạiriko cetanreye kạmikeda. Uni do sadomkoakʼ jaṅga sire getʼketʼtakoa ar rãt-gạḍiko doe jeretʼ giḍikada.

¹⁰ Ona tayom Josuạ doe ruạṛ calaoente Hasore hatkeda ar onḍenicʼ raje gocʼkedea. Hasor do onako rajosṭi modre maraṅ utạrakʼ nagraha tahẽkana.

¹¹ Israelko do Hasorren sanamkoko maraoketʼkoa, mitʼṭen jiwiyanko hõ jiwetʼ do bako doholetʼkoa. Ar inạ tayom Josuạ do nagrahae jeretʼ giḍikada.

¹² Josuạ do onko rajkoakʼ nagrahakoe hatketʼte onḍenko rajkoe bondiketʼkoa. Probhu Isorren guti Moseyakʼ hukum lekage uni do onko sanamkoe marao cabaketʼkoa.

¹³ Menkhan ḍuṅgriko cetanre okako nagraha tahẽkan Israelko do onako reakʼ okaṭakʼge bako jeretʼleda, menkhan Josuạ do eken Hasor nagrahae jeretʼ giḍikada.

¹⁴ Niạko nagraha khon okako jinis ar ạsul janwarko luṭlen ona do Israelko apnar lạgitʼko idiwana; menkhan sanam hoṛko doko marao cabaketʼkoa, mitʼṭen jiwiyanko hõ jiwetʼ do bako doholetʼkoa.

¹⁵ Probhu Isor do acʼren guti Mose okako hukume emade tahẽkan onage uni do Josuại baḍae ocoledea, ar Josuạ do onako hukume manaoleda. Probhu Isor do Mose okakoe hukumade tahẽkan Josuạ do ona reakʼ mitʼṭecʼ hõ bae bemanotleda.

¹⁶ Nonkate Josuạ do goṭa disạmgeye hatkeda. Onako modre usul buru ṭoṭhako, goṭa Negeb, Gosen ṭoṭha, latar buruko ṭoṭha, Araba buru nala ar Israel utạr reakʼ usul buru ṭoṭha ar latar bilạn ṭạnḍiko tahẽkana.

¹⁷ Seyir buru rakapʼ calakʼ reakʼ Halak buru khon Hermon buru latar Lebanon lodamre menakʼ Bakʼal-gad hạbicʼ sanam ṭoṭhage Josuạ doe hatkeda. Uni do onako jaegaren rajko sapʼkateye gocʼketʼkoa.

¹⁸ Josuạ do ḍher din hạbicʼ noko rajko sãoteye lạṛhạiyena.

¹⁹ Eken Gibeonre tahenkan Hiwiko chaḍa ar oka nagraharen hoṛ hõ Israelko sãote jãhãn bondobos bako doholeda; Israelko do sanamkoge lạṛhạireko bhagaoketʼkoa.

²⁰ Probhu Isor do onko hoṛkoakʼ mone keṭecʼ ocoletʼtakoa jemon Israelko upạrte lạṛhạikate ḍahao maraokʼ sarapakʼren hoṛko hoyokʼ ar daya baṅ ńamkateko gujukʼ. Niạ hukumge Probhu Isor do Moseye emade tahẽkana.

²¹ Inạ tayom Josuạ do buru ṭoṭhate senkate Anakiko hõe gocʼketʼkoa. Niạ ṭoṭha modre do Hebron, Debir, Anab nagraha, Jihudạ ar Israel reakʼ sanam buru jaegako tahẽkana. Uni do Anakiko ar onkoakʼ nagrahako ar atokoe marao cabaketʼtakoa.

²² Israelkoakʼ disạm modre okoe Anakiko hõ jiwetʼ do ar bako tahẽlena; eken Gasa, Gad ar Asdodre thoṛa gan Anakiko jiwetʼko tahẽyena.

²³ Probhu Isor Mose okae hukumade tahẽkan onkage Josuạ do goṭa disạme dokholana ar gusṭikoakʼ sompotti lekate ona do Israelko talareye hạṭińatʼkoa. Unre disạmre lạṛhại do thirakan tahẽkana.