Jona 4 - সান্তালী বাইবেল

Probhu cetanre Jonawakʼ edre

¹ Menkhan Jona do noa iạte ạḍi bạṛicʼe ạikạukeda ar ạḍiye edreyena.

² Uni do Probhu Isor ṭhen koekateye menkeda, “E Probhu Isor, iń do disạmre tahenregeń baḍaekan tahẽkana, nonka hoyokʼa mente. Ona iạtege iń do pạhilre Tạrsisteń ńir pharakokʼ kan tahẽkana. Ińiń baḍaekan tahẽkana, am do daya ar mãyãwan Isor kanam, ar ạḍi anecʼ edrekʼicʼ ar dayate kisạ̃ṛicʼge, ar bạkʼṛicʼ khon dom kastaokʼkana.

³ Ńitokʼ do E Probhu Isor, ińakʼ jiwi baṛe hataotińme, ente ińakʼ jiwetʼ tahen khon gujukʼge bhagetińạ.”

⁴ Probhu Isore roṛ ruạṛkeda, “Pit caṛhaokʼ kantamte dom ṭhiketʼgea?”

⁵ Unre Jona do nagraha bahrete senkate purub secʼre mitʼṭecʼ ṭhạ̃ire cạli benaokate ona reakʼ umulreye duṛupʼena. Ar nagraha reakʼ cetʼ dosa hoyokʼa mente ona ńel lạgitʼ koyokʼ horreye tahẽyena.

⁶ Unre Probhu Isor do onḍe mitʼṭecʼ eraḍom dareye janam ocokeda. Ar ona dare do Jona cetanteye hara rakapʼ ocokeda uniyakʼ bohokʼ umultae lạgitʼ. Ona dare iạte Jona do ạḍiye kusiyena.

⁷ Menkhan dosar hilokʼ ạḍi setakʼre Isor do mitʼṭen ganḍra tejoye kolkedea; ar tejo do ona dareye ńẽtʼkeda, onate dare do tolmocʼena.

⁸ Ar siń candoe rakapʼen khan Isor do purub reakʼ lolo hoeye rakapʼ ocokeda; onate setoṅ do Jonawakʼ bohokʼre paṛaoena, uni doe jhãeyena. Unre uni do gujukʼ lạgitʼe koeketʼteye menkeda, “Jiwetʼ tahen khon gujukʼge bhage tahẽkana.”

⁹ Menkhan Isor do Jonae metadea, “Ona dare ńutumte pit caṛhaokʼ kantam dom ṭhiketʼgea?” Jonae menkeda, “Hẽ gujukʼ hạbicʼ pit caṛhaokʼkantiń doń ṭhiketʼgea.”

¹⁰ Menkhan Probhu Isor doe menkeda, “Am do noa dare lạgitʼ jãhãnakʼ bam khaṭao akana ar hara hõ bam hara ocoakada enhõ dare lạgitʼem mãyãkʼkana. Ona do mitʼ ńindạte omonena ar mitʼ ńindạtege gocʼena.

¹¹ Menkhan Niniwire mitʼ lakh bargel hajar khon hõ bạ̃ṛti gidrạ menakʼkoa onko do bako baḍaea okaṭakʼ do jojomti ar okaṭakʼ do leṅga ti kana mente; ona chaḍa ḍher ḍaṅgra ar bhiḍiko hõ menakʼkoa. Enḍekhan iń do cetʼ iń cekaea? Iń do cetʼ ona maraṅ nagraha lạgitʼ bạń mãyãkʼa?”