Jona 3 - সান্তালী বাইবেল

Jonawakʼ batao

¹ Probhu Isorakʼ katha do dosar dhao Jona ṭhen sodorena.

² Uni doe menkeda, “Am do ńitokʼ ona maraṅ nagraha Niniwite calakʼme ar oka sombatiń lạiyam onḍe senkate ona lại jạhirme.”

³ Probhu Isorakʼ katha leka Jona do Niniwi nagrahateye calaoena. Niniwi do ạḍi maraṅ nagraha tahẽkana; ona reakʼ osar do taṛamate pe din reakʼ horge tahẽkana.

⁴ Jona do ona nagrahare bolokate mitʼdin reakʼ hore senena ar noa katha hohoate lạlạiye ehopʼena, “Ar pongel mãhã khange Niniwi nagraha do ḍahao maraokʼa.”

⁵ Unre Niniwiren hoṛko do Isorakʼ kathareko pạtiạuena. Ar upạs reakʼko lại sodorkeda ar huḍiń khon hapṛakʼ sanamkoge gõṛẽ kicricʼko horokʼkeda.

⁶ Raj ṭhen ona khobor seṭeren khan uni hõ siṅghạson khone beretʼente acʼakʼ raj-kicricʼe totʼketʼtaea ar gõṛẽ kicricʼ horokʼkate torocʼreye duṛupʼena.

⁷ Ona tayom uni do Niniwire acʼ ar acʼren kạmiyạkoe hukumatʼkoa: Manwa ar janwar, ḍaṅgra se bhiḍi palko celege alo jemonko jomma; onko do jomakʼ se dakʼ hõ aloko ńũiyma.

⁸ Manwa ar janwar sanamkoge jemon gõṛẽ kicricʼteko oyokʼma. Ar mitʼke mitʼ hoṛ do goṭa daṛete Isorko hohoaema ar bạṛicʼ hor khonko ruạṛokʼma ar bạṛicʼakʼ kạmiko bạgiyma.

⁹ Okoe baḍaea hoedaṛeakʼa Isor do moneye ạcurtaete jaljalaokʼkan edre khone ruạṛkange jemon alo bon marao utạrokʼ.”

¹⁰ Ar Isor do onkoakʼ kạmikoe ńelketʼtakoa, cetʼleka onko do akoakʼ bạṛicʼ hor khonko ạcurena, ar Isor do ona bạṛicʼ ńutumteye kastaoena one oka onko cetanre kạmi lạgitʼe roṛletʼ ona do ar bae onkaleda.