Jona 2 - সান্তালী বাইবেল

Jonawakʼ koejoṅ

^1-2 Jona do uni hakoakʼ lacʼ khon acʼren Probhu Isor ṭhene koeyana. Uniye menkeda, “E Probhu Isor, ińakʼ kosṭokʼ oktere amiń hohoatʼmea ar am do ińem roṛ ruạṛadińạ. Sheol khon goṛo ńam lạgitʼ iń hohoatʼmea ar am do ińakʼ rakʼjoṅakʼem ańjomketʼtińạ.

³ Am do jalapuri reakʼ khạndri dakʼrem giḍikedińa ar ạtukʼkan dakʼreń tạpukʼena; ar ḍheoko do iń cetante parom idiyena.

⁴ Iń doń menkeda, ‘amakʼ mẽtʼãhã samaṅ khon sạṅgińteń idi ocoakana; enhõ iń do amakʼ ona sonot oṛakʼ secʼ arhõń beṅgetʼ rakaba.’

⁵ Jalapuri reakʼ dakʼ do ińe esetʼ ạcurkedińte gujukʼ reakʼ duạr hạbicʼe idikedińa; ar athantar dakʼ doe gherao esetʼkedińạ ar ona reakʼ sealom do ińakʼ bohokʼe bedhaoketʼtińạ.

⁶ Iń doń unumena ar buru reakʼ rehetʼ hạbicʼ iń senena; Sheol do jaejug lạgitʼe aṭkao dohokedińa. Menkhan E ińren Probhu Isor, am do onḍe khonem rakapʼ ạgukedińa.

⁷ “E Probhu Isor, tinre ińakʼ jiwi do oḍokʼ calakʼkan tahẽkana unre amiń disạketʼmea, ar ińakʼ koejoṅ do am ṭhen, amakʼ sonot oṛakʼre rakapʼena.

⁸ Okoe ạuṛiyakʼren boṅgako sewawako kan onko do amakʼ okaṭakʼ dayako ńamke ona do bako moneyakʼkana,

⁹ menkhan iń do sarhao sereńate am ńutumte janwar dãṛẽgeń samaṅama. Ar okań manot akatʼ onań purạuama. Ar bańcaoiń do Probhu Isorakʼ kạmikana.”

¹⁰ Probhu Isor do hakoe hukumadea ar hako do ghuṭure Jonae ulạkedea.