Johan sodor 8 - সান্তালী বাইবেল

Eaeakʼ mohor chapakʼ

¹ Ona tayom Bheḍa Hopon do eaeakʼ mohor chape raṛaketʼ khan sermare adha ghonṭa gan jãhãn saḍege baṅ ańjomlena.

² Ar okoe eae goṭen serma goḍetko Isor samaṅreko teṅgo akan tahenkan onkoń ńelketʼkoa. Onko do tire eae goṭecʼ siṅgạko ematʼkoa.

³ Inạ tayom ar mitʼṭen serma goḍet hecʼkate pinḍ samaṅreye teṅgoyena. Uniyakʼ tire do sona reakʼ mitʼṭecʼ dhup dạni tahẽkana. Uni do ạḍi utạr dhupko emadea jemon siṅghạson samaṅre sona reakʼ pinḍre Isorren sanam hoṛkoakʼ koejoṅ sãote ona dhup jeretʼkateye samaṅ daṛeakʼ.

⁴ Ar uni serma goḍetakʼ ti khon dhup reakʼ dhũạ do Isorren hoṛkoakʼ koejoṅ sãote coṭte Isor samaṅre rakapʼena.

⁵ Unre serma goḍet do pinḍ khon seṅgel hataokate ona dhup dạniye perecʼkeda ar dhạrtiteye lebda giḍikada. Onate huḍur ar eṭakʼakʼ botoranakʼ saḍe leka saḍeyena, ar bijli malkaoena ar dhạrti laṛaoena.

Eae goṭecʼ siṅgạ

⁶ Eae goṭen serma goḍetko ṭhen okaṭakʼ eae goṭecʼ siṅgạ tahẽkan, onko do ona oroṅ lạgitʼko sapṛaoena.

⁷ Ar pạhilicʼ serma goḍet do acʼakʼ siṅgại oroṅketʼ khan mãyãm mesalakatʼ arel ar seṅgel do dhạrtirte lebda giḍiyena. Onate pe hạṭiń reakʼ mitʼ hạṭiń dhạrti, ar pe hạṭiń reakʼ mitʼ hạṭiń dareko ar sanam hạriạṛ ghãsko do lo roṅgoyena.

⁸ Inạ tayom dosaricʼ serma goḍet do acʼakʼ siṅgại oroṅkeda. Unre mitʼṭecʼ jolokʼkan maraṅ buru leka mitʼṭecʼ jinis do jalapurire khadle ocoyena. Onate jalapuri reakʼ pe hạṭiń reakʼ mitʼ hạṭiń dakʼ do mãyãm cabayena,

⁹ ar jalapuriren pe hạṭiń reakʼ mitʼ hạṭiń jiwiyanko doko gocʼena, ar pe hạṭiń reakʼ mitʼ hạṭiń jahajko do bhaṅla bhaṭ cabayena.

¹⁰ Tayomte tesaricʼ serma goḍet hõ siṅgại oroṅkeda. Unre maraṅ okocʼ mitʼṭecʼ ipil do diuhe leka jolokʼte serma khone ńurhạyena.

¹¹ Uni ipilakʼ ńutum do Nagodana tahẽkana. Uni ipil do pe hạṭiń reakʼ mitʼ hạṭiń gaḍa ar dakʼ jharnakoreye ńurhạyena. Onate pe hạṭiń reakʼ mitʼ hạṭiń dakʼ do haṛhatʼena ar haṛhatʼ dakʼ iạte ạḍi utạr hoṛ doko gocʼena.

¹² Inạ tayom ponicʼ serma goḍet hõ acʼakʼ siṅgại oroṅkeda. Onate siń cando reakʼ pe hạṭiń reakʼ mitʼ hạṭiń, ńindạ cando reakʼ pe hạṭiń reakʼ mitʼ hạṭiń ar ipilko reakʼ pe hạṭiń reakʼ mitʼ hạṭiń doko ńutena. Ar din reakʼ pe hạṭiń reakʼ mitʼ hạṭiń ar ńindạ reakʼ pe hạṭiń reakʼ mitʼ hạṭiń do jãhãn marsalge baṅ tahẽlena.

¹³ Tayomte sermare mitʼṭen pajhaṛ cẽṛẽ ạḍi coṭte uḍạukʼkaniń ńelkedea, uni pajhaṛ do ãṭ aṛaṅte roroṛkaniń ańjomkedea, “Eṭakʼ okoe pea serma goḍet siṅgạko oroṅ lạgidokʼkan tahẽkan, onkoakʼ siṅgạ saḍelen khange dhạrtire tahenkanko lạgitʼ do hae hae.”