Johan sodor 6 - সান্তালী বাইবেল

Mohor chapko

¹ Bheḍa Hopon do ona eae goṭecʼ mohor chapko reakʼ pạhilakʼe raṛaketʼ khan iń ńelkeda; onko ponea jiwiyanko modren mitʼṭen do huḍur reakʼ aṛaṅ leka roroṛkaniń ańjomkedea, “Dela hijukʼme.” Unre iń do mitʼṭen ponḍ sadomiń ńelkedea.

² Ar okoe unireye decʼakan tahẽkan uniyakʼ tire do mitʼṭecʼ akʼ tahẽkana. Uni do mitʼṭecʼ mukuṭko emadea ar jitạuicʼ lekae oḍok calaoena are jitạu idiyena.

³ Bheḍa Hopon do dosarakʼ mohor chape raṛayetʼ tahẽkanre iń do dosaricʼ jiwiyanicʼ roroṛkaniń ańjomkedea, “Dela hijukʼme.”

⁴ Unre seṅgel leka eṭakʼ mitʼṭen arakʼ sadome oḍok hecʼena. Ar okoe uni sadomreye decʼakan tahẽkan uni do dhạrti khon suluk ocog lạgitʼ ektiạriye em ocoyena, jemon hoṛko do ako akoko gocʼ gopojokʼ. Uni do mitʼṭen maraṅ okocʼ tarwaṛe hõe emocoyena.

⁵ Bheḍa Hopon do tesarakʼ mohor chape raṛayetʼ tahẽkanre tesaricʼ jiwiyanicʼ roroṛkaniń ańjomkedea, “Dela hijukʼme.” Ona tayom iń do mitʼṭen hende sadomiń ńel ńamkedea. Ar okoe uni sadomreye decʼakan tahẽkan uniyakʼ tire do mitʼṭen tulạ tahẽkana.

⁶ Onko ponea jiwiyanko talare okoe coṅ roroṛkaniń ańjomkedea, “Mitʼṭen din ṭalaoicʼakʼ mitʼ din reakʼ kuṛại do eken mitʼ ser guhum se pe ser jao hoyokʼtaea. Sunum ar darkha rasa do alom nosṭoea.”

⁷ Bheḍa Hopon do ponakʼ mohor chape raṛaketʼ khan ponicʼ jiwiyanicʼ roroṛkaniń ańjomkedea, “Dela hijukʼme.”

⁸ Unre iń do mitʼṭen polso sasaṅ roṅan sadomiń ńel ńamkedea. Ar okoe uni sadomreye decʼakan tahẽkan uniyakʼ ńutum do moron; ar patal puri do uni tayom tayomteye calakʼkan tahẽkana. Dhạrti reakʼ pon hạṭiń reakʼ mitʼ hạṭiń cetanre unkin do ektiạriko ematʼkinạ, jemon unkin do tarwaṛete, akalte, mahamạrite, ar dhạrtiren bir janwarko hotete hoṛkokin gocʼko.

⁹ Ar mõṛẽakʼ mohor chape raṛayetʼ tahẽkanre iń do pinḍ latarre nonkan hoṛkoakʼ jiwikoń ńelkeda, one okoe do Isorakʼ katha ar goha iạteko gocʼ ocolen tahẽkan.

¹⁰ Onko do ãṭ aṛaṅteko menkeda, “E sonoticʼ ar sạriyicʼ Probhu Isor, okoe doko noa dhạrtiren kan, onko bicạrko lạgitʼ ar aleakʼ mãyãm reakʼ hala ruạṛako lạgitʼ am do ar tinạkʼem biloma?”

¹¹ Unre onko mimitʼ hoṛ do mitʼṭecʼkate ponḍ oyon kicricʼko ematʼkoa arko metatʼkoa, onkoren são gutiko ar boehako, okoe do ako lekako gocʼ ocokʼ onkoakʼ lekha ạuri purạukʼ hạbicʼ jemon arhõ thoṛa ghạṛicʼ ńel hor akaereko tahen.

¹² Ona tayom iń ńelkeda, uni do turuiyakʼ mohor chape raṛaketʼ khan ạḍi ãṭ dhạrti laṛaoena. Siń cando do ekalteye hende cabayena ar ńindạ cando do mãyãm lekae arakʼena.

¹³ Ar maraṅ hoete cetʼleka loa dare khon berel loa ńurokʼ, onkage sermaren ipilko hõ dhạrtireko ńurena.

¹⁴ Guṛhạ dohoakan kagoc lekage serma do guṛhạyena; ar buru ar dipko do apan ạpin jaega khon ocokʼena.

¹⁵ Dhạrtiren sanam rapajko, napṛakʼko, maraṅ subedarko, kisạ̃ṛko ar daṛean hoṛko, mitʼke mitʼ golam ar sạdhin hoṛko do danderkore ar buru reakʼ huṭupʼ dhirikoreko okoeyena.

¹⁶ Onko do buruko ar dhirikoko metatʼa, “De ale cetanre bhindạṛokʼpe ar ona siṅghasonreye duṛupʼ akan, uniyakʼ mẽtʼãhã samaṅ khon ar Bheḍa Hoponakʼ edre khon oko dohokalepe,

¹⁷ ente unkinakʼ edre sodorokʼ reakʼ ona maraṅ din do seṭer akana, ar uni samaṅre do okoeye teṅgo ṭarhao daṛekokʼa?”