Johan sodor 3 - সান্তালী বাইবেল

Sạrdis reakʼ manḍer ṭhen

¹ “Sạrdis nagraha reakʼ manḍerren goḍet ṭhen noa katha olme, Isorren eae goṭen Jiu ar eae goṭecʼ ipilko okoeye sapʼ akatʼko uni do noa kathae meneda: iń do amakʼ kạmi reakʼ kathań baḍaegea. Ar jiwetʼ menamte am do ạḍi ńutum menakʼtama, menkhan am dom gocʼgea.

² Am do jagwar tahenme ar sarecʼakʼ okako gocʼakʼ leka menakʼ ona do daṛeanakʼ hoeocoyme, ente ińren Isor samaṅre amakʼ jãhãn kạmige mucạdokʼ do bạń ńelakada.

³ Onate okam ńamakatʼ arem ańjomakatʼ ona disạime ar manaome, ar ona khon mon ạcurtam. Ar jagwar bam tahen khan iń do kombṛo lekań hijukʼa, ar tinreń hijukʼa ona do baḍaege bam baḍae daṛeakʼa.

⁴ Menkhan Sạrdisre thoṛa nonkan hoṛ menakʼkotama one okoe do akoakʼ kicricʼ khạnḍwạkʼ, metakʼme cạl-colon bako mạilạ akatʼtako. Onko doko lekman hoṛ kante ponḍ kicricʼ horokʼkate iń sãoteko dãṛãbaṛaea.

⁵ Okoeye jitạukʼa uni do nonkan ponḍ kicricʼgeye horoga. Ar iń do jion reakʼ puthi khon uniyakʼ ńutum tishõ bạń meṭaotaea, bickom ińren Baba ar uniren goḍetko samaṅreń aṅgocea.

⁶ Ańjom lạgitʼ lutur menakʼtae hoṛ doe ańjom ma, sonot Jiu do manḍerrenko cetʼe metakokana mente.

Philạḍelphiạ reakʼ manḍer ṭhen

⁷ “Philạḍelphiạ nagraha reakʼ manḍerren goḍet ṭhen noa katha olme: Okoe do sonot are sạriyicʼkan, ar okoe ṭhen Dạudakʼ choṛan menakʼ, one uniye jhicʼlere okoege bako siń daṛeakʼ are sińlere okoe hõ bako jhicʼ daṛeakʼ,

⁸ uni do noa kathae meneda; iń do amakʼ kạmi reakʼ kathań baḍaegea. Ńelme, iń do am lạgitʼ jhicʼ akatʼ mitʼṭecʼ duạriń dohoakada, one oka siń reakʼ ektiạri do okoeyakʼ hõ bạnukʼtako. Ińiń baḍaea amakʼ daṛe do thoṛagetama, menkhan enhõ am do ińakʼ katham dohoakada ar bam baṅ akadińạ.

⁹ Okoe apnarte Jihudiko ńumogokʼkan, menkhan Jihudiko baṅkan, onko Soetanakʼ dolren eṛe hoṛko am ṭheniń ạgukoa ar amakʼ jaṅga ṭheniń sewa ocokoa, ariń baḍae ocokoa, iń do amiń dulạṛetʼmea.

¹⁰ Sobori reakʼ okań hukumatʼme tahẽkan ona dom dohoakada; onate dhạrtire oka duk reakʼ ghuṛi daraekan ona khon iń doń rukhiyạmea. Ar okoe doko noa dhạrtirenkan onko biḍạuko lạgitʼge noa duk reakʼ okte do hijukʼa.

¹¹ Iń do ạḍi usạrageń daraekana. Amakʼ oka menakʼtam ona do sapʼuricʼ akae tahenme, okoe hõ amakʼ jitạukʼ reakʼ kuṛại do alo jemonko recʼme.

¹² Ar okoeye jitạukʼa unige ińren Isorakʼ oṛakʼ reakʼ mitʼṭecʼ khũnṭiń teṅgoyea; uni do tisge bahrete bae calakʼa. Iń do ińren Isorakʼ ńutum ar ińren Isorakʼ nagraha reakʼ ńutum unireń ola. Ona nagraha do nãwã Jerusalemge. Noa do serma khon ińren Isor ṭhen khon pheḍ hijukʼa. Ar okoeye jitạukʼa, iń do unire ińakʼ ńutumiń ola.

¹³ Ańjom lạgitʼ lutur menakʼtae hoṛ doe ańjom ma, sonot Jiu do manḍerrenko cetʼe metako kana mente!

Laodikiạ reakʼ manḍer ṭhen

¹⁴ “Laodikiạ nagraha reakʼ manḍerren goḍet ṭhen noa ciṭhi olme, “Okoe do Amen, ar okoe do pạtiạricʼ are sạri goha kan, ar okoe doe Isorakʼ sirjonren etohopʼicʼkan, uni do noa kathae meneda: iń do amakʼ kạmiko reakʼ iń baḍaea.

¹⁵ Am do reaṛ hõ bam reaṛa ar lolo hõ bam loloa. Am do reaṛ se lolom hoylen khan honaṅ boge hoykokʼa!

¹⁶ Menkhan am do reaṛ hõ bam reaṛa ar lolo hõ bam loloa, onate iń do moca khoniń thoyetʼkan lekań phur giḍikama!

¹⁷ Am dom meneda, kisạ̃ṛgeạń; ar maraṅ hoṛiń hoyakana, onate ińakʼ do cetʼ reakʼ reṅgecʼ hõ bạnukʼtińạ. Bogegea, menkhan bam baḍaea je, am dom reṅgecʼgea, kãṛãgea arem laṅgaṭgea mente.

¹⁸ Onate noa solhań emam kana, am do iń ṭhen khon seṅgelre rapakʼakʼ khạṭi sona kirińjoṅme, jemonem kisạ̃ṛ daṛeakʼ. Iń ṭhen khon ponḍ kicricʼ kirińkate horogme jemon onem uluṅ akan reakʼ lajaotetʼ alo ńelokʼtam. Iń ṭhen khon mẽtʼre lagao lạgitʼ aenom kirińjoṅme, jemonem ńeńel.

¹⁹ Okoeyiń dulạṛetʼko, onkoge doskoń udukʼakoa ariń ḍanṭaokoa. Onate noa khon mon ạcur lạgitʼ ahkaokʼme.

²⁰ Ńelme, iń do duạrre teṅgokate silpińiń ṭhopʼ ṭhopʼetʼ kana. Jãhãege ińakʼ aṛaṅ ańjomkate silpińe jhicʼạń, enḍekhan bhitrite uni ṭheniń bolokʼa ar uni tulucʼiń jom ńũiya, ar uni hõ iń tulucʼe joma.

²¹ “Jitạukʼkate cetʼleka iń do ińren Baba tulucʼ uniyakʼ siṅghạsonreń duṛupʼ akan, onkage okoeye jitạukʼa, uni do iń tulucʼ ińakʼ siṅghạsonre duṛupʼ reakʼ ạidạriń emaea.

²² Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metakokana mente.”