Johan sodor 22 - সান্তালী বাইবেল

Jion gaḍa

¹ Ona tayom uni serma goḍet do jion dakʼ reakʼ gaḍae udukʼạdińạ. Ona do dhiri hisir leka rilạmala tahẽkana ar Isor ar Bheḍa Hoponakʼ siṅghạson ṭhen khon ạtu oḍokkate nagraha reakʼ kulhi talate ạtukʼkan tahẽkana.

² Ona gaḍa reakʼ dene banar aṛere do jion dare tahẽkana. Onare do gelbar lekan jo jokʼkan tahẽkana. Ar jao candoge onare do jokʼa ar ona reakʼ sakamte sanam jạtren hoṛko bogekʼkan tahẽkana. Sarap do ar baṅ tahena.

³ Isor ar Bheḍa Hoponakʼ siṅghạson do ona nagrahare tahena ar uniren golamko do uniko sewawaea.

⁴ Onko do uniyakʼ mẽtʼãhãko ńeltaea ar uniyakʼ ńutum do onkoakʼ moloṅre ol tahena.

⁵ Ńindạ do ar baṅ tahena ar onko do diuhe reakʼ marsal se siń cando reakʼ marsal hõ baṅ jạruṛakoa, ente Probhu Isor do acʼge onkoren marsale hoyokʼa. Ar jaejug hạbicʼ onko do rajko calaoa.

Usạrage Jisu doe hijukʼ kana

⁶ Tayomte uni serma goḍet doe metadińạ, “Noako katha do pạtiạr ar sạrigea. Probhu Isor, one okoe do nạbiko hoteteye roṛletʼ tahẽkan, uni do acʼren goḍete kol akadea, jemon thoṛa ghạṛicʼ khange okaṭakʼ hoy lạgidokʼkan, ona do acʼren golamkoe udukʼ daṛeako.”

⁷ Jisui meneda, “Ńelpe, iń do ạḍi usạrageń hijukʼkana. Noa puthi reakʼ sanamakʼ katha, metakʼme Isorakʼ kathako okoeye manao uni doe bhạgangea.”

⁸ Iń Johan do noakoń ańjom akada ariń ńel akada. Ar jotowakʼ ańjom ar ńel tayom, okoeṭakʼ serma goḍet noakoe udukʼ ạdiń, uni sewawae lạgitʼ uniyakʼ jaṅga ṭheniń ombakʼena.

⁹ Menkhan uni doe metadińạ, “Men, alo; iń do am ar amren biswạsi boehako, metakʼme nạbiko ar okoe do noa puthi reakʼ sanamakʼ kathako manaoetʼkan onkoren são golam kạnạń. Isorge baṛe sewawae me.”

¹⁰ Ona tayom uni doe metadińạ, “Noa puthi reakʼ sanamakʼ kathako, metakʼme Isorakʼ katha am do alom oko dohokakʼa, ente oktetetʼ do sor akana. Bedhoromicʼ do, bedhoromtegeye tahenma,

¹¹ ar okoe mạilạyicʼ uni do mạilạ iditegeye tahenma. Dhoromicʼ do dhorom iditegeye tahenma ar okoe doe sonotge uni do sonot iditegeye tahenma.”

¹² Jisui meneda, “Ńelme, hako pakogeń hijukʼkana ar mimitʼko akoakʼ kạmiko reakʼ kuṛại do iń soṅgerege menakʼa.

¹³ Ińge Alpha ar Omega, pạhilicʼ ar sesicʼ, etohopʼ ar mucạtʼicʼ do.

¹⁴ “Bhạgangeako onko do, one okoe do akoakʼ kicricʼko ạrupʼetʼkan jemon jion dare reakʼ jo jom reakʼ ạidạriko ńam ar duạr secʼte nagrahateko bolo daṛeakʼ.

¹⁵ Setako lekan bạṛicʼ hoṛko, jạdu udukʼ baṛakanko, loṭghoṭiko, khũniạhiko, murhutʼ sewako, eṛeakʼ dulạṛko ar eṛeakʼ kạmikanko, onko sanamkoge bahrereko tahena.

¹⁶ “Iń Jisuge ińren goḍet iń kol akadea, jemon uni do ape ṭhen manḍerko lạgitʼ noako reaṅ gohae em daṛeakʼ. Ińge Dạud reakʼ rehetʼ ar bõs, ar ḍag ḍagaokʼkan bhurkạ ipil do.”

¹⁷ Sonot Jiu ar bạhu kuṛi dokin meneda, “Dela hijukʼme,” Ar okoe noa kathae ańjometʼ uni hõe menma, “Dela hijukʼme.” Okoe tetaṅede kan uni doe hijukʼma ar okoe dakʼ ńũi menetʼkan uni do begor damte jion dakʼe ńũ idi joṅma.

¹⁸ Okoe hoṛ noa puthi reakʼ sanamakʼ kathako, metakʼme Isorakʼ kathakoe ańjometʼkan, iń do uni ṭhen noa gohań emeda je, jãhãege noa puthire jãhãnakʼe juṭicʼakʼ, enḍekhan Isor hõ noa puthire olakan sanam dukko uniyakʼ jionreye juṭicʼaea.

¹⁹ Ar noa puthi reakʼ sanamakʼ kathako, metakʼme Isorakʼ kathako khon jãhãege thoṛagane kaṭao giḍikakʼ enḍekhan Isor hõ noa puthire olakan jion dare ar ona sonot nagraha reakʼ ạidạri uniyakʼ jion khone kaṭao giḍikataea.

²⁰ Okoe noako reaṅe gohayetʼkan uni doe meneda, “Sạrige iń do ạḍi usạrageń hijukʼkana.” Amen. Probhu Jisu, dela hijukʼme.

²¹ Probhu Jisuakʼ bhor Isorren sanam hoṛko sãote baṛe tahẽakae tahenma. Amen.