Johan sodor 21 - সান্তালী বাইবেল

Nãwã Jerusalem

¹ Ona tayom iń do mitʼṭen nãwã serma ar mitʼṭen nãwã dhạrtiń ńelkeda. Pạhilakʼ serma ar pạhilakʼ dhạrti do parom calaoena ar jalapuri hõ ar baṅ tahẽlena.

² Ar ona sonot nagraha, metakʼme nãwã Jerusalem do serma khon ar Isor ṭhen khon pheḍ hijukʼ kaniń ńelkeda. Cetʼleka bạhu do acʼren jãwãe lạgitʼe sajao sapṛao akan, onkage noa nagraha hõ sajao sapṛao ocoakan tahẽkana.

³ Ona tayom mitʼ hoṛ do ona siṅghạson khon ãṭ aṛaṅate noa katha roroṛ kaniń ańjomkedea, “Nitokʼ do manwako talare Isorakʼ tahen jaega hoyakana. Uni do manwako sãoteye tahena ar onko do uniren hoṛko hoyokʼa. Uni do acʼge manwako sãoteye tahena ar onkoren Isore hoyokʼa.

⁴ Uni do onkoakʼ mẽtʼ dakʼe jodtakoa. Moron do ar baṅ hoyokʼa; duk, haso ar rakʼ joṅ do ar baṅ tahena, ente pạhilakʼ joto do parom calao akana.”

⁵ Okoe ona siṅghạsonre duṛupʼ akane tahẽkan uni doe menkeda, “Ńelme, iń do jotowakʼge nãwãteń benao aroyeda.” Uni do arhõe menkeda, “Noa katha olme, ente noa kathako do pạtiạr ar sạrigea.”

⁶ Uni do arhõe metadińạ, “Hoyena. Ińge Alpha ar Omega, etohopʼ ar mucạtʼtetʼ. Okoe tetaṅ edekan uni do jiwetʼ dakʼ reakʼ jharna khon begor damteń ńũ ocoyea.

⁷ Ar okoeye jitạukʼa uni do noakoe ạidạri joṅa. Ińge uniren Isoriń hoyokʼa ar uni do ińren gidrại hoyokʼa.

⁸ Menkhan botorokʼko, bepạtiạrko, hirkhạwakoko, gogocʼko, loṭghuṭiko, jạdu udukʼko, boṅga muṭhạn sekʼwako ar joto lekan eṛekoakʼ mucạtʼ dosa do seṅgel ar gondhok reakʼ dõreaorege.” Ar noa kangea dosar gujukʼ do.”

⁹ Ar okoe eae goṭecʼ serma goḍetkoakʼ tire mucạtʼ eae goṭecʼ dukte perecʼ bạṭi tahẽkan onko modren mitʼ hoṛ do iń ṭhen hecʼkateye menkeda, “Dela hijukʼme, bạhu kuṛiń udukʼama, metakʼme Bheḍa Hoponren bạhuń udukʼama.”

¹⁰ Tayomte uni serma goḍet do mitʼṭecʼ maraṅ ar usul buruteye idikedińa. Unre iń do sonot Jiu reakʼ uskurreń tahẽkana. Ar Isorakʼ ṭhonokte jhalkaokʼkan ona sonot nagraha Jerusalem serma khon ar Isor ṭhen khon pheḍ hijukʼkane udukʼạdińa.

¹¹ Ona nagraha reakʼ marsal do ạḍi damanakʼ dhiri reakʼ marsal leka, ar surjokanto mạnik dhiri lekage.

¹² Ona nagraha reakʼ mitʼṭecʼ maraṅ ar usul pạcri tahẽkana ar onare gelbar goṭecʼ duạr tahẽkana, ona duạrkore do gelbar goṭen serma goḍetko tahẽkana. Ar Israel jạtren gelbar bõsrenkoakʼ ńutum do ona duạrre ol tahẽkana.

¹³ Duạrko modre pea do purub secʼre, pea do utạr secʼre, pea do dạkhin secʼre ar pea do pạchim secʼre tahẽkana.

¹⁴ Ona nagraha reakʼ pạcrire gelbar goṭecʼ rehetʼ tahẽkana ar onako cetanre Bheḍa Hoponren gelbar goṭen apostolkoakʼ gelbar goṭecʼ ńutum tahẽkana.

¹⁵ Ar okoe iń tulucʼ kathae roroṛkan tahẽkan uniyakʼ tire do mitʼṭecʼ sona reakʼ jokhawakʼ chuci tahẽkana, jemon uni do ona nagraha reakʼ duạrko ar ona reakʼ pạcriye jokha daṛeakʼ.

¹⁶ Ar nagraha do ponon konḍge jeleń ar osarte somangea. Tayomte uni do ona jokhawakʼte nagrahae jokhaketʼ khan, ona do jeleńte, osarte ar usulte bar hajar ponsae kilomitar hoyena.

¹⁷ Tayomte uni do pạcriye jokhaketʼa ar ona reakʼ usultetʼ do mitʼ sae pongel pon moka hoyena. Manwa cetʼlekako jokhae onkage uni serma goḍet hõe jokhakeda.

¹⁸ Ona pạcri do surjokanto mạnik dhirite gathao akan tahẽkana ar nagraha do nirola kãc lekanakʼ khạṭi sonate benao tahẽkana.

¹⁹ Ona nagraha reakʼ pạcri reakʼ rehetʼko do joto lekanakʼ damanakʼ dhirikote sajao tahẽkana. Pạhilakʼ rehetʼtetʼ do surjokanto, dosarakʼ do nilkanto, tesarakʼ do tamro, ponakʼ do morokot,

²⁰ mõṛẽakʼ do boidurjo, turuiyakʼ do lalkanto, eaeakʼ do sornokanto, irạlakʼ do gomedok, areakʼ do podmorag, gelakʼ dolosunio, gelmitʼakʼ do peroj, ar gelbarakʼ do koṭahelage.

²¹ Ona gelbar duạrre gelbar goṭecʼ muti tahẽkana. Mimitʼ duạr do mimitʼ goṭecʼ mutite tear akan tahẽkana. Ar nagraha reakʼ kulhi do sapha kãc leka khạṭi sonate tear tahẽkana.

²² Ona nagrahare jãhãn mundilge bạń ńel ńamleda, ente sanam daṛeanicʼ Probhu Isor ar Bheḍa Hoponge ona nagraharen mundil do.

²³ Ona nagrahare marsalokʼ lạgitʼ siń cando se ńindạ cando reakʼ jạruṛ do bạnukʼa, ente Isorakʼ ṭhonokge onḍe doe marsala ar Bheḍa Hopon kangeae onḍenicʼ diuhe do;

²⁴ sanam jạtrenko ona marsalreko dãṛãna. Dhạrtiren rapajko do akoakʼ ṭhonokante ona nagrahateko hijukʼa.

²⁵ Din bhor nagraha reakʼ duạrko do tis hõ siń baṅ tahena ar onḍe do ńindạ hõ baṅ ńindạkʼa.

²⁶ Onḍe do sanam jạtrenkoakʼ man ar ṭhonokge ạgukʼa.

²⁷ Besapha jãhãnakʼ se hirkhạwakʼ kạmiko se eṛe roroṛko nonkan cele hoṛge onḍe do bako bolo daṛeakʼa; ar okoeyakʼ ńutum Bheḍa Hoponakʼ jion reakʼ puthire ol menakʼ, eken onkoge onḍeko bolo daṛeakʼa.