Johan sodor 20 - সান্তালী বাইবেল

Mitʼ hajar serma

¹ Inạ tayom mitʼṭen goḍet do serma khon pheḍ hijukʼ kaniń ńelkedea. Uniyakʼ tire do ona athan kunḍ reakʼ choṛan ar mitʼṭen maraṅ okocʼ sikṛi tahẽkana.

² Uni do uni biń, metakʼme okoe do mare biń Diabol Soetanko metaekan uni sapʼkate mitʼ hajar bochor hạbicʼe tolkedea ar ona athan kunḍreye khadlekadea.

³ Tayomte kulup oṭokate ona cetanreye chap oṭowada, jemon ona mitʼ hajar bochor ạuri mucạdokʼ hạbicʼ dhạrtire jạt jạtrenko eṭakʼ bhul horte bae idi daṛeako; ona tayom thoṛa din lạgitʼ uni doe aṛakʼ ocokʼa.

⁴ Ona tayom adomakʼ siṅghạsonkoń ńelkeda, ar okoe onareko duṛupʼ akan tahẽkan onko do bicạr reakʼ ektiạriko em ocoakan tahẽkana. Isorakʼ katha ar Jisu reakʼ cecetʼakʼ lekate calakʼ iạte okoe do bohokʼko makʼ ńur ocoakan tahẽkan, onko hoṛakʼ jiwikoń ńelkeda. Onko do uni janwar ar uniyakʼ muṭhạn hõ bako sewawakʼkan tahẽkana ar moloṅre se tire cinhạ hõ bako hataoleda. Onko doko jiwetʼente mitʼ hajar bochor hạbicʼ Mạsi tulucʼ rajosṭiko calaokeda.

⁵ Noa do hoyokʼ kana pạhil dhao gocʼko khon jiwetʼ ruạṛokʼ ar niạ dhao okoeko jiwetʼ beretʼen onko doko bhạgangea arko sonotgea. Pạhil dhao okoeko jiwetʼ beretʼlen onko hoṛkore dosar gujukʼ reakʼ jãhãn daṛe do bạnukʼa, bickom onko do Isorren ar Mạsiren naekeko hoyokʼa ar hajar bochor hạbicʼ Mạsi tulucʼko rajokʼa.

⁶ Menkhan ona hajar bochor ạuri purạukʼ hạbicʼ sarecʼ akan gocʼ hoṛ do bako jiwetʼlena.

Soetanakʼ kuṛại

⁷ Ona hajar bochor purạulen khan Soetan do acʼakʼ hajot oṛakʼ khone raṛa ocokʼa.

⁸ Unre uni do goṭa dhạrtire senkate jạt jạtrenko, metakʼme Gog ar Magoge bulạukinạ ar onkin do lạṛhại lạgitʼe jarwakinạ. Ar onko do lekhare jalapuri reakʼ gitil lekako hoyokʼa.

⁹ Unreń ńelkeda, onko do samaṅ secʼ senkate Isorren hoṛkoakʼ tahen jaega ar uniyakʼ ona dulạṛiạ nagrahako esetʼ ạcurkeda. Menkhan serma khon seṅgel pheḍ hecʼente onko doe atar cabaketʼkoa.

¹⁰ Ar okoe onko eṭakʼ horteye bulạu idiletʼko tahẽkan uni Soetan do jolokʼkan gondhok reakʼ doreãoreye khadle ocoyena. Uni janwar ar eṛe nạbi do laharege onḍekin khadle ocoakan tahẽkana. Onko do onḍe jaejug hạbicʼko sasetokʼa.

Mucạtʼ bicạr

¹¹ Ona tayom mitʼṭecʼ maraṅ okocʼ ponḍ siṅghạson ar onare duṛupʼ akan mitʼ hoṛiń ńelkedea. Uni samaṅ khon dhạrti ar serma do ńir pharakena, ar onkinakʼ jaega do okarehõ baṅ ńamlena.

¹² Ona tayom iń do, kạṭicʼ lạṭu joto gocʼ hoṛko ona siṅghạson samaṅre teṅgo akaniń ńelketʼkoa. Inạ tayom do puthiko oṭakʼ ocoyena. Ona tayom ar mitʼṭecʼ puthi hõ oṭakʼ ocoyena. Ona do jion reakʼ puthi tahẽkana. Ar ona puthire noko gocʼ hoṛkoakʼ kạmi reaṅ cetʼleka ol tahẽkan onkage onkoakʼ bicạr do hoyena.

¹³ Ar okoe gocʼ hoṛko do jalapurireko tahẽkan, onko do jalapuriye idiketʼkoa. Ona chaḍa moron ar patalpurire okoe gocʼakan hoṛko tahẽkan, onko dokin em ruạṛkatʼkoa. Ar mimitʼko do akoakʼ kạmi lekako bicạr ocoyena.

^14-15 Tayomte moron ar patal puri do seṅgel reakʼ doreão rekin khadle ocoyena. Noa seṅgel reakʼ doreãore ńurokʼge hoyokʼ kana dosar gujukʼ. Ar okoeyakʼ ńutum ona jion reakʼ puthire baṅ ńamlen, onko do seṅgel reakʼ doreãoreko khadle ocoyena.