Johan sodor 17 - সান্তালী বাইবেল

Janwar cetanre duṛupʼ akan maejiu

¹ Okoe eae goṭen serma goḍetkoakʼ tire eae goṭecʼ bạṭi tahẽkan onko modren mitʼ hoṛ do hecʼkateye metadińạ, “Dela hijukʼme, aema dakʼ cetanre okoe kusmbiye duṛupʼakan uniyakʼ sạjạiyiń udukʼama.

² Dhạrtiren rapajko do uni tulucʼko loṭghuṭileda, ar okoe doko noa dhạrtirenkan onko do uniyakʼ loṭghuṭi reakʼ darkha rasateko ńũ bul akan tahẽkana.”

³ Ona tayom uni serma goḍet do hahaṅkar jaegateye idikedińạ. Unre iń do sonot Jiuakʼ ạyurreń tahẽkana. Onḍe mitʼṭen maejiu do mitʼṭen jeṅgetʼ arakʼ janwarre duṛupʼ akaniń ńelkedea. Ar Isor henostawae reakʼ ạḍi utạr ńutum uni janwarre ol tahẽkana. Uniyakʼ do eae goṭecʼ bohokʼ ar gel goṭecʼ dereń tahẽkantaea.

⁴ Uni maejiu do beguni roṅakʼ kicricʼe horokʼ akatʼ tahẽkana ar hoṛmore do sona ar damanakʼ dhiri ar muti mạnikkote abhran tahẽkantaea. Uniyakʼ tire do hirkhạwakʼte perecʼ ar acʼakʼ loṭghuṭi ar besaphate perecʼ sona reakʼ bạṭi tahẽkana.

⁵ Uniyakʼ moloṅre nonkan ńutum ol tahẽkana one ona reaṅ mitʼṭecʼ okoakʼ menakʼ. Ona ńutum do kana, “Maraṅ Babel, kusmbiko ar dhạrti reakʼ joto hirkhạwakʼkoren eṅgat.”

⁶ Ariń ńelkedea, uni maejiu do Isorren hoṛkoakʼ mãyãm ar okoe do Jisu reaṅ gohako emakatʼ onkoakʼ mãyãm ńũteye bul akana.

⁷ Uni ńelte iń do ạḍi ãṭiń hahaṛayena. Unre uni serma goḍet doe metadińạ, “Am do cedakʼem hahaṛakʼ kana? Maejiuakʼ ar okoe do uniye asen baṛayede kan uni janwarakʼ okoakʼ reakʼ bhediń bujhạuam kana. Nui doe uni janwar kana one okoeyakʼ do eae goṭecʼ bohokʼ ar gel goṭecʼ dereń tahẽkantae.

⁸ Ar okoe janwarem ńellede uni do lahateye tahẽkana, menkhan ńitokʼ do bạnugicʼan. Tayomte ona athan kunḍ khon rakapʼ hecʼkate uni do jaejug hạbicʼ sạjạiye joma. Unre okoe doko noa dhạrtirenkan, metakʼme dhạrti sirjạu khon okoekoakʼ ńutum do jion reakʼ puthire ol bạnukʼ onko do uni janwar ńelteko hahaṛakʼa; ente janwar do pạhile tahẽkana, ńitokʼ do bạnuiya, menkhan arhõe ńel ocokʼa.

⁹ “Ńitokʼ oka lạiyogokʼ ona bujhạu lạgitʼ do buj jạruṛa. Ona eae goṭecʼ bohokʼ do hoyokʼ kana, eae goṭecʼ buru one onakore uni maejiu doe duṛupʼ akan. Ona eae goṭecʼ bohokʼko do arhõ eae goṭen rapaj hõ kanako.

¹⁰ Onko rapajko modre mõṛẽ goṭen do laharegeko ńur akana, ar mitʼ hoṛ do ńit hõ menaegea ar eṭakʼicʼ do ńit hõ bae hecʼakana. Ar uni raje hecʼlen khan uni do thoṛa din hạbicʼ tahentege hoyokʼtaea.

¹¹ Okoeṭakʼ janwar do pạhilreye tahẽkan, menkhan ńitokʼ bạnui uni do onko eae goṭen modrenkanre hõe uni doe irạlicʼ raj kana; ar jaejug hạbicʼ sạjạiye joma.

¹² “Oka gel goṭecʼ bohokʼem ńelakatʼ onako do gel goṭen rapajko kanako. Onko do ńit hõ rajosṭi bako ńam akada, menkhan onko do uni janwar tulucʼ mitʼ ghuṛi lạgitʼ rapajko lekate ektiạriko ńama.

¹³ Noko rajkoakʼ monsubạ do mitʼgea, ar onko do jotoge akoakʼ daṛe ar ektiạri uni janwarko emaea.

¹⁴ Onko do Bheḍa Hopon upạrteko lạṛhạiya ar Bheḍa Hopon do onkoe bhagaokoa, ente uni do Probhukoren Probhu ar raj koren raj kanae. Ar okoeko hoho ocoakan arko bachao ocoakan ar okoe doko pạtiạrkokan onkoge uni tulucʼko tahena.”

¹⁵ Ona tayom uni serma goḍete metadińạ, “Am do oka dakʼem ńelketʼ, okare uni kusmbiye duṛupʼakan, ona do ạḍi utạr disạm kana, ạḍi utạr hoṛ kanako, ạḍi utạr jạtrenko ar ạḍi utạr pạrsiko kana.

¹⁶ Ar oka gel goṭecʼ dereńem ńelketʼ onako ar uni janwar do uni kusmbiko hirkhạwaea. Onko do uniko maraoe giḍiyea arko uluṅea ar uniyakʼ jelko joma; ona tayom uni do seṅgelreko atar giḍikaea.

¹⁷ Noa reakʼ karon do kana, Isor do onkoakʼ monre nonkan monejoṅakʼe emakatʼkoa jemon uniyakʼ katha purạukʼtae. Onate onko do mitʼ monte uni janwar ṭhen akoakʼ sanam daṛeko danaea, jemon Isorakʼ katha ạuri purạukʼ hạbicʼ uni doe raj daṛeakʼ.

¹⁸ Ar okoeṭakʼ maejiuem ńellede uni doe hoyokʼ kana ona maraṅ nagraha, one okoe do dhạrtiren sanam rapajko cetanre rajosṭiye calaoetʼkan.”