Johan sodor 15 - সান্তালী বাইবেল

Eae goṭen serma goḍet ar eae goṭecʼ sạjại

¹ Tayomte iń do sermare ar mitʼṭecʼ maraṅ ar hahaṛa cinhạń ńelkeda. Ona do eae goṭen serma goḍet ar onkoakʼ tire mucạtʼ eae goṭecʼ sạjại kana. Noako do mucạtʼ sạjại ńumogokʼ kana, ente noakote Isorakʼ edre do caba utạrokʼa.

² Ona tayom iń do seṅgel mesal akatʼ mitʼṭecʼ kãc reakʼ jalapuri lekań ńelkeda. Okoe uni janwar ar uniyakʼ muṭhạn ar uniyakʼ ńutum reakʼ lekha cetanreko jitạu akan onko hõń ńelketʼkoa. Isorakʼ peṛesaṅ tire sepeńkate onko do ona kãc reakʼ jalapuri aṛereko teṅgo akan tahẽkana.

³ Onko do Isorren golam Mose ar uni Bheḍa Hoponakʼ noa sereńko sereńetʼ tahẽkana: “Sanam daṛean Probhu Isor, tinạkʼ maraṅ ar hahaṛagea amakʼ kạmiko do! E sanam jạtkoren raj, tinạkʼ dhorom ar sạriyakʼgea amakʼ horko do!

⁴ E Probhu Isor okoe baṅ am do bae botoram? Ar okoe baṅ amakʼ ńutum bae sarhaotam? Eken amge coṅ sonoticʼ ma. Sanam jạtrenko do am ṭhenko hijukʼa, ar jotoge amko sewawama; ente amakʼ dhorom bicạr do sodor akana.”

⁵ Noa tayom iń doń ńelkeda, serma reakʼ ona mundil, metakʼme goha tạmbu do jhicʼena.

⁶ Unre onko eae goṭen serma goḍet do eae goṭecʼ sạjạiyante mundil khonko oḍok hecʼena. Onko do sapha jhak jhak kicricʼko horokʼ akatʼ tahẽkana ar koṛam do sona reakʼ pạṭkạteko tol ạcurakan tahẽkana.

⁷ Onko ponea jiwiyankoren mitʼṭen do onko eae goṭen serma goḍetko eae goṭecʼ bạṭiye ematʼkoa. Ar Isor, okoe do jug jug khon jaejug hạbicʼ jiwetʼ menae, uniyakʼ edrete onako bạṭi do perecʼ akan tahẽkana.

⁸ Isorakʼ mạhima ar daṛe khon okaṭakʼ dhũạ oḍokokʼkan tahẽkan ona dhũạte mundil oṛakʼ do perecʼena. Onko eae goṭen serma goḍetkoakʼ eae goṭecʼ sạjại ạuri cabakʼ hạbicʼ okoe hõ ona mundilre do bako bolo daṛeada.