Johan sodor 14 - সান্তালী বাইবেল

Bheḍa Hopon ar mitʼ sae pongel pon hajar hoṛ

¹ Ona tayom iń ńelkeda, Bheḍa Hopon do Sion buru coṭreye teṅgo akana. Uni soṅgere mitʼ sae pongel pon hajar hoṛ menakʼkoa. Onkoakʼ cạndire do Bheḍa Hoponakʼ ar uniren Babawakʼ ńutum ol menakʼa.

² Ona tayom serma khon had had ạtu calakʼkan ar huḍur reakʼ sạḍeń ańjomkeda. Ar okaṭakʼ saḍeń ańjomketʼ ona do peṛesaṅ banamko phetʼetʼkan lekań ańjomkeda.

³ Ona siṅghạson ar onko ponea jiwiyanko ar onko mukhiyạko samaṅre onko do mitʼṭecʼ nãwã sereńko sereńkeda. Menkhan okoe hõ ona sereń do bako cetʼdaṛeada; eken onko mitʼ sae pongel pon hajar hoṛko cetʼdaṛeada okoe do dhạrtiren hoṛko khonko kiriń ocolen.

⁴ Noko do onko hoṛ kanako, one okoe do maejiuko tulucʼ bako laṭghaṭ akatʼte saphage menakʼko. Ar jãhã secʼge Bheḍa Hopone calakʼ onko hõ uni tayomteko calakʼa. Isor ar Bheḍa Hopon ṭhen pạhil jo lekate dãṛẽ lạgitʼ hoṛko mod khon onko doko kiriń akan tahẽkana.

⁵ Onko do tis hõ eṛe katha do bako roṛ akada, ar onko modre jãhãn dosge baṅ ńam akana.

Pea serma goḍetko

⁶ Ona tayom iń do arhõ mitʼṭen serma goḍet coṭ sermare uḍạukʼkaniń ńelkedea. Dhạrtiren tahenkan hoṛko ṭhen metakʼme mimitʼ jạtren, bõsren, pạrsiren, ar disạmren hoṛko ṭhen porcar lạgitʼ uni ṭhen jaejug hạbicʼ reakʼ bhage sombat tahẽkana.

⁷ Uni do ãṭ aṛaṅte noa kathae menetʼ tahẽkana, “Isor botoraepe ar uni sarhaoepe, ente bicạr reakʼ okte do seṭerakana. Okoe dhạrti, serma, jalapuri, doreão ar jharna dakʼkoe sirjạu akatʼ uni sewawaepe.”

⁸ Tayomte dosaricʼ ar mitʼṭen serma goḍet do uni tayom tayomte hecʼkateye menkeda, “Ona Babel nagraha do ḍahao maraoena. Okaṭakʼ nagraha do acʼakʼ loṭghuṭi reakʼ botoranakʼ bubulakʼ sanam jạtrenkoe ńũ ocoletʼko ona naṅgrha do ḍahao marao akana.”

⁹ Inạ tayom tesaricʼ ar mitʼṭen serma goḍet do onko tayom tayomte hecʼkate ãṭ aṛaṅteye menkeda, “Jãhãege uni janwar ar uniyakʼ muṭhạne sewawakʼ ar uniyakʼ cinhạ cạndire se tireye hatao,

¹⁰ enḍekhan uni do Isorakʼ edre reakʼ bubulakʼ ńũńũi hoyokʼtaea. Ar noa bubulakʼ sãote dakʼ baṅ mesal akatʼ Isorakʼ edre reakʼ bạṭire dul akana. Sonot sermaren goḍetko ar Bheḍa Hopon samaṅre seṅgel ar gondhokte uni hoṛ doe saset ocokʼa.

¹¹ Okaṭakʼ seṅgel noko hoṛkoe sasetko ona seṅgel reakʼ dhũạ do jaejug hạbicʼ rakabokʼtege tahena. Okoe hoṛ uni janwar ar uniyakʼ muṭhạne sewawakʼ ar uniyakʼ ńutum reakʼ cinhại dohojoṅ uni do sińke ńindạ tishõ jirạu bae ńama.”

¹² Okoe Isorakʼ hukumko manaoetʼ ar Jisure pạtiạrko tahenkan Isorren onko hoṛge noa halotre sombhuri tahen jạruṛtakoa.

¹³ Ona tayom iń do serma khon mitʼ hoṛ roroṛkaniń ańjomkedea, “Noa katha olme; ńit khon okoe do Probhu Isor tulucʼ kolom mitʼkateko gujukʼkan onko do bhạganko kanako.” Sonot Jiu do noa kathae meneda, “Hẽ, onko doko bhạgangea. Onkoakʼ mehnot khon onko do jirạuko ńama, ente onkoakʼ kạmi reakʼ kuṛại do ako soṅgere tahena.”

Dhạrti reakʼ phosol samṭao

¹⁴ Tayomte iń do mitʼṭecʼ ponḍ rimiliń ńelkeda, ar ona rimilre manwa Hopon leka mitʼ hoṛe duṛupʼ akan tahẽkana. Uniyakʼ bohokʼre do jitạukʼ reakʼ sona mukuṭ ar tire do laser datrom tahẽkana.

¹⁵ Ona tayom mitʼṭen serma goḍet mundil oṛakʼ khone oḍok hecʼena ar okoe ona rimilreye duṛupʼ akan tahẽkan uni ãṭ aṛaṅteye metadea, “Amakʼ datrom calaotam, phosol gedme, ente phosol samṭao reakʼ okte do hoyakana; ar dhạrti reakʼ phosol do purạte beleakana.”

¹⁶ Unre okoe ona rimilreye duṛupʼ akan tahẽkan uni do dhạrtire acʼakʼ datrome calaokeda ar dhạrti reakʼ phosol do getʼ hoyena.

¹⁷ Tayomte serma reakʼ mundil khon ar mitʼṭen serma goḍete oḍok hecʼena. Ar uniyakʼ tire hõ mitʼṭecʼ laser datrom tahẽkana.

¹⁸ Ona tayom pinḍ khon ar mitʼṭen serma goḍete oḍok hecʼena. Uni do seṅgel cetanre ektiạri tahẽkantaea. Ar okoe serma goḍet ṭhen laser datrom tahẽkan uni serma goḍet do ãṭ aṛaṅte hohowadeteye metadea, “Amakʼ laser datrom calaotam ar dhạrti reakʼ darkha nạ̃ṛĩ khon darkha thoka gedme, ente darkha jo do bele akana.”

¹⁹ Unre uni serma goḍet do dhạrtire acʼakʼ datrome calaokeda ar dhạti reakʼ darkha nạ̃ṛĩ khon joto darkha jo getʼkateye jarwakeda. Ar tayomte onako do darkha lelen kunḍreye bhoraokeda. Noa darkha jo roḍocʼ reakʼ kunḍ do Isorakʼ botoranakʼ edre kana.

²⁰ Ado nagraha bahrere darkha lelen kunḍre darkha jo len hoyen khan ona khon mãyãm oḍokena ar sadomkoakʼ jhin hạbicʼ rakapʼena. Onate pe sae mail hạbicʼ mãyãm do ạtu oḍokena.