Johan sodor 13 - সান্তালী বাইবেল

Jalapuri khone oḍok hijukʼkan janwar reaṅ

¹ Noa tayom iń do mitʼṭen janwar jalapuri khon rakapʼ hijukʼ kaniń ńelkedea. Uniyakʼ do gel goṭecʼ dereń ar eae goṭecʼ bohokʼ tahẽkantaea. Ona dereńko cetanre gel goṭecʼ mukuṭ tahẽkana ar bohokʼko cetanre Isor henostawae reakʼ aema ńutum ol tahẽkana.

² Uni janwar do ńelokʼte citạ tạrupʼ lekae tahẽkana ar jaṅgako do banawakʼ leka ar moca do dhạcri kulakʼ moca leka tahẽkantaea. Ar biń do acʼakʼ daṛe, siṅghạson ar maraṅ ektiạri uni janware emadea.

³ Uniyakʼ bohokʼko modre mitʼ goṭen do gujukʼ dạkhil ghạl akantae tahẽkana, menkhan ona ghạl do bogeyentaea. Onate dhạrtiren sanam hoṛko hahaṛakʼ tulucʼ uni janwarko pańja idikedea.

⁴ Biń do uni janwar ektiạriye emade tahẽkante hoṛko do uni biń Isor lekako sewawadea ar janwar hõ onkage sewawadeteko menkeda, “Nũi janwar leka cele menakʼkoa? Ar okoe baṅ uni sãoteye lạṛhại daṛeke?”

⁵ Uni janwar do sarhaokʼ lạgitʼ ar Isor henostawae lạgitʼ daṛeye emocoyena. Ar pongel bar cando hạbicʼ acʼakʼ ektiạri jemone khaṭao daṛeakʼ ona lạgitʼ hukume em ocoyena.

⁶ Unre uni janwar do Isor upạrte, uniyakʼ ńutum reakʼ ar uniyakʼ tahen jaega upạrte ar sermare tahenkanko upạrte ạḍi henosta kathako roroṛe ehopʼena.

⁷ Isorren hoṛko lạṛhạikate bhagaoko reakʼ ektiạriye emocoyena ar mitʼke mitʼ bõsren, disạmren, pạrsiren ar jạtren hoṛko cetanre hõ ektiạriye emocoyena.

⁸ Okoe doko noa dhạrtirenkan, metakʼme dhạrti rehetʼ khon gocʼ ocolen Bheḍa Hoponakʼ jion puthire okoekoakʼ ńutum ol bạnukʼtako onko sanamko do Isor leka uniko sewawaea.

⁹ Ańjom lạgitʼ lutur menakʼtaeicʼ do sostor reakʼ noako kathae ańjom ma.

¹⁰ Okoe kạidi hoyokʼ reakʼ katha menakʼtae uni do kạidiye hoyokʼa. Okoe tarwaṛeteye gogocʼ uni do tarwaṛetegeye khũn ocokʼa. Onate Isorren hoṛko do sombhuri ar pạtiạu reakʼ jạruṛ menakʼtakoa.

Dhạrti khone rakapʼ hijukʼkan janwar

¹¹ Noa tayom iń do ot khon ar mitʼṭen janwar rakapʼ hijukʼkaniń ńelkedea. Uniyakʼ do bheḍa leka barea dereń tahẽkantaea, menkhan uni do biń leka kathae roṛetʼkan tahẽkana.

¹² Nui janwar do pạhilicʼ janwar reakʼ joto ektiạri calaoe ehopʼena; ar okoe doko noa dhạrtiren kan onko hotete uni pạhilicʼ janwar, metakʼme okoeyakʼ ghạl boge akantae uni do Isor menteko sewawadea.

¹³ Uni do maraṅ maraṅ hahaṛa kạmikoe ehopʼkeda, ar hoṛko samaṅre serma khon dhạrtite seṅgele pheḍ ạgukeda.

¹⁴ Ar okako hahaṛa kạmi lạgitʼ ektiạriye emocolen onako kạmikate hoṛko bhul horte idikoe ehopʼkeda. Ar Pạhilicʼ janwar okoe do tarwaṛeteye ghạl ocolenre hõ jiwetʼe tahẽkan, uni dosaricʼ janwar do hoṛkoe metatʼkoa jemon onko do uniyakʼ muṭhạnko benaotae.

¹⁵ Ar uni do ona muṭhạnre jiwi emokʼ reakʼ daṛe hõe emocoyena, jemon muṭhạn do kathae roṛ daṛeakʼ ar okoe ona muṭhạn bako sewawakʼ onko doko gocʼ ocokʼa.

¹⁶ Uni do kạṭicʼ lạṭu, reṅgecʼ kisạ̃ṛ, sạdhinko ar golamko, sanamko jojom tire baṅkhan moloṅre mitʼṭecʼ cinhại hatao ocoketʼkoa.

¹⁷ Onate ona cinhạ metakʼme uniyakʼ ńutum se cinhạ chaḍa okoe hõ cetʼge bako kiriń ạkhriń daṛeada. Ona cinhạ do hoyokʼ kana uni janwarakʼ ńutum se uniyakʼ ńutum reakʼ lekha.

¹⁸ Noako bujhạu do bud reakʼ jạruṛ menakʼa. Okoeyakʼ bud menakʼtae uni do janwarakʼ lekhae hisạbma, ente ona do mitʼṭen manwawakʼ ńutum reakʼ lekha kana. Ar ona lekha do hoyokʼ kana turui sae turui gel turui.