Johan sodor 11 - সান্তালী বাইবেল

Barea gohakin reaṅ

¹ Ona tayom sosoṅ ṭheṅga lekanakʼ mitʼṭecʼ chuchi ṭheṅga em ocokateń men ocoyena, “Mundil ar pinḍ soṅme ar okoeko onḍe Isorko sewawae kan onko hõ lekhakom.

² Menkhan mundil bahrere okaṭakʼ raca menakʼ ona do badkakʼme, alom soṅa, ente ona do boṅgan hoṛ jạtrenkoko em ocoakana. Onko do pongel bar cando hạbicʼ sonot nagrahako lebetʼ gańjaoa.

³ Menkhan ińren banar gohakin nonkan ektiạriń emakinạ onate unkin do gõṛẽ kicricʼ horokʼkate mitʼ hajar bar sae turui gel din hạbicʼ kin nạbiya.”

⁴ Unkin gohakin dokin hoyokʼ kana barea jạitun dare ar barea diuhe dohowakʼ, one okoe do dhạrtiren Probhu Isor samaṅrekin teṅgo akan.

⁵ Jãhãe unkin hạ̃nkinko menkhan, enḍekhan unkinakʼ moca khon seṅgel oḍokokʼte bạirikin atar giḍikoa. Okoe unkin hạ̃nekin menjoṅ uni do onkage gujukʼ hoyokʼtaea.

⁶ Nukin hoṛ tinạkʼ din kin nạbiya unạkʼ din jemon aloe dag onate serma siń lạgitʼ ektiạri tahen tạkina. Ar dakʼ mãyãm ocoy ar tinạkʼ dhao sanakin unạkʼ dhao jãhãn dukte dhạrti hạ̃n reakʼ ektiạri hõ tahen tạkina.

⁷ Unkinakʼ goha emokʼ sạtlen khan ona athan kunḍ khon mitʼṭen janwar do rakapʼ hecʼkate unkin tulucʼe lạṛhạiya ar unkine bhagaokinteye gocʼkinạ.

⁸ Unkinren Probhu Isor oka nagrahareye kurus ocolen ona maraṅ nagraha reakʼ horre unkinakʼ mạ̃ṛĩ do giḍi akan tahena. Ona nagraha reakʼ asol ńutum do Sodom ar Misor baṅkanre hõ, enhõ mitʼ lekangete ona nagraha do Sodom ar Misorko metakʼa.

⁹ Unre sanam disạmren, jạt jạtren, khuṭren ar pạrsiren hoṛko do pe din tala hạbicʼ unkinakʼ mạ̃ṛĩko beṅgetʼakʼa.

¹⁰ Onko do unkinakʼ mạ̃ṛĩ bako topa ocowakʼa. Ar unkin kin gocʼ akante noa dhạrtirenko doko kusikʼa arko rạskạkʼa. Hoṛko do sandesko kopola, ente okoe doko noa dhạrtiren kan onko do nukin barea nạbi iạte ạḍitetʼ kosṭoko ńamleda.

¹¹ Menkhan noa pe din tala tayom Isor emakʼ jion reakʼ sahetʼ do unkinre boloyena. Onate unkin do ạkinakʼ jaṅgatekin teṅgoyena. Unre okoe unkinko ńelketʼkin onko do ạḍiko botorena.

¹² Tayomte unkin gohakin do serma khon ãṭ aṛaṅte noa kathakin ańjomkeda, “Nonḍe rakapʼ hijukʼ ben.” Unre unkin do ạkinren bạirikoakʼ mẽtʼãhã samaṅrege mitʼṭecʼ rimilte sermatekin rakapʼ calaoena.

¹³ Unre ạḍi botor dhạrti laṛaoena ar ona nagraha reakʼ gel hạṭiń reakʼ mitʼ hạṭiń do rạputʼ ńurena. Ar ona dhạrti laṛaore eae hajar hoṛko gocʼena. Onate sarecʼko sanamge botor caṛhaoatʼkote sermaren Isorko sarhaokedea.

¹⁴ Nonkate dosarakʼ muhin do cabayena. Ar ńelpe, tesarakʼ muhin do usạrage daraekana.

Eaeyakʼ siṅgạ

¹⁵ Tayomte eaeyicʼ serma goḍet do acʼakʼ siṅgại oroṅkeda. Unre sermare ãṭ aṛaṅte roṛena, “Dhạrti reakʼ rajosṭi do ńitokʼ aboren Probhu Isor ar uniren Mạsiyakʼ hoyena.

¹⁶ Uni do jaejug hạbicʼe rajokʼa.” Ar okoe bargel pon mukhiyạko Isor samaṅre akoakʼ siṅghạsonreko duṛupʼ akan tahẽkan, onko doko ombakʼente Isor sewawadeteko menkeda,

¹⁷ “Sanam daṛeanicʼ Probhu Isor, am do menama arem tahẽkana. Ale do amle sarhaoetʼme kana, ente am do amakʼ maraṅ ektiạrianakʼ tite rajokʼem ehopʼkeda.

¹⁸ Joto jạtrenko raṅgao akana, ar amakʼ edre sodorokʼ reakʼ ghuṛi hõ seṭerakana, ar amren golamko, metakʼme nạbiko ar amren hoṛko ar kạṭicʼ lạṭu jotokoge okoe amko bhoktiamkan onko kuṛại emako reakʼ okte hõ seṭerakana. Ona chaḍa okoe dhạrtiko hạ̃n akatʼ, onko ḍahao maraoko reakʼ okte hõ seṭer akana.”

¹⁹ Ona tayom serma reakʼ mundil do jhicʼena ar onḍe Isorakʼ bondobos reakʼ sunduk ńel ńamena. Unre bijli malkaokʼ ar botor saḍe ar huḍur ar dhạrti laṛao ar ạḍi bạṛicʼ arel ńurokʼ ehopʼena.