Johan sodor 10 - সান্তালী বাইবেল

Serma goḍet ar ona huḍiń puthi

¹ Ona tayom ar mitʼṭen daṛeanicʼ serma goḍet serma khon pheḍ hijukʼ kaniń ńelkedea. Uni do rimilteye oyo akan, ar bohokʼre do liṭạ akʼ tahẽkantaea. Uniyakʼ mẽtʼãhã do siń cando leka ar jaṅga do seṅgel reakʼ khũnṭi leka tahẽkana.

^2-3 Uniyakʼ tire do oṭakʼ akatʼ mitʼṭecʼ huḍiń puthi tahẽkana. Uni do acʼakʼ jojom jaṅga jalapurire ar leṅga jaṅga do otre dohokate dhạcri kule hạnḍrạukʼkan leka ãṭ aṛaṅteye hohokeda. Uniyakʼ hoho são sãote eae goṭecʼ huḍur saḍeyena.

⁴ Ar eae goṭecʼ huḍur saḍeyen khan iń do olokʼ lạgitʼ iń sapṛaoena. Menkhan serma khon noa kathań men ocoyena, “Eae goṭecʼ huḍur oka kathae menketʼ ona do okoge dohokakʼme, alom ola.”

⁵ Okoeṭakʼ serma goḍet do jalapuri ar otre teṅgo akaniń ńellede uni do acʼakʼ jojomti serma secʼe tulkeda.

⁶ Ar jaejug hạbicʼ jiwetʼ menae sermako, otko, jalapuriko ar onakore menakʼ sanamakʼe sirjạuakatʼ, uniyakʼ ńutumte kiriạkate uni serma goḍet doe menkeda, “Ar baṅ bilomokʼa.

⁷ Menkhan eaeyicʼ serma goḍetakʼ siṅgạ oroṅ dinkore Isorakʼ okoakʼ monsubạko do purạukʼa. Ar Isor do acʼren gutiko ṭhen, metakʼme nạbiko ṭhen okae baḍae ocoletʼ ṭhik onkage hoyokʼa.”

⁸ Okoe serma khon katha roroṛiń ańjomlede, uni do arhõe metadińạ, “Okoeṭakʼ serma goḍet jalapuri ar otreye teṅgo akan, uni ṭhen senkate uniyakʼ ti khon oṭakʼ akatʼ puthi hataome.”

⁹ Unre iń do serma goḍet ṭhen senkate ona puthi imạń lạgitʼ iń metadea. Uni doe metadińạ, “Noa hataokate jom gotʼkakʼme. Noa do amakʼ lacʼe haṛhatʼ ocoytama, menkhan amakʼ mocare do dumur rasa leka heṛemem ạikạua.”

¹⁰ Unre serma goḍetakʼ ti khon ona huḍiń puthi hataokateń jom gotʼkada. Ar mocare do dumur rasa lekań ạikạukeda, menkhaniń jomketʼ khan lacʼ do haṛhatʼentińạ.

¹¹ Ona tayom noa kathań menocoyena, “Am do arhõ ạḍi utạr disạmko, jạtrenko, pạrsiko ar rajko reaṅ nạbi kathako roroṛ hoyokʼtama.”