Johan 5 - সান্তালী বাইবেল

Ar mitʼṭen rugiye bogeyen

¹ Niạ tayom Jisu do Jerusalemteye calaoena, ente ona jokhecʼ Jihudikoakʼ mitʼṭecʼ porob tahẽkana.

² Jerusalemre bhiḍi-phaṭokʼ ṭhen mitʼṭecʼ pukhri menakʼa; onḍe do mõṛẽ goṭecʼ umul akatʼ jaega menakʼa. Ibri pạrsite ona pukhri reakʼ ńutum do Bethsaedako metakʼkana.

³ Ar onako jaegare ạḍi utạr rugiko tahẽnkan tahẽkana. Onko modre kãṛãko, leḍhako, ar hoṛmo rohoṛ akantako hoṛ hõ onḍeko tahẽkana.

⁴ Ar mitʼṭen serma goḍet do okte oktere ona pukhrire pheḍkate dakʼe laṛao oṭokakʼkan tahẽkana ar ona tayom pạhilre okoe ona dakʼreye pheḍ maṛaṅokʼ uni do joto lekan rog khone boge utạrokʼkan tahẽkana. Ar rugiko do dakʼ laṛaokʼ reakʼko koyokʼ horetʼ tahẽkana.

⁵ Onḍe do pegel irạl bochor khon rogteye jạbun akan mitʼṭen hoṛe tahẽkana.

⁶ Ar ḍher din khon onḍe menaea mente Jisui baḍaeketʼ khan uniye kulikedea, “Am do cetʼ bogekʼ sanayetʼmea?”

⁷ Ruạkʼicʼ doe roṛ ruạṛkeda, “E baba, ińren do okoe hõ bạnukʼkotińa, one okoe do dakʼ laṛaokʼ são sãote pukhriteko pheḍkạń. Ente ińiń pheḍokʼ pheḍokʼtege iń khon lahare ar mitʼ hoṛe pheḍ godokʼ kana.”

⁸ Jisu do uniye metadea, “Ma beretʼme, ar amakʼ parkom kuṭuṅtam ar taṛamme.”

⁹ Unrege uni hoṛ doe boge utạrena ar acʼakʼ aṭetʼakʼ kuṭuṅkate taṛame ehopʼena. Ar enhilokʼ do jirạukʼ mãhã tahẽkana.

¹⁰ Onate Jihudi mukhiyạko do uni hoṛko metadea, “Teheń do jirạukʼ mãhã kana; ar dhorom reakʼ niạm lekate aṭetʼakʼ kuṭuṅ baṛae do lek baṅkana.”

¹¹ Unre uni do mukhiyạkoe metatʼkoa, “Menkhan okoeye boge akadiń unige ‘aṭetʼ kuṭuṅkate taṛam baṛaeye metadińạ.’ ”

¹² Onko do uni hoṛko kulikedea, “Okoe kanae uni hoṛ do, oneye metatʼme, ‘amakʼ aṭetʼakʼ kuṭuṅkate taṛamme?’ ”

¹³ Menkhan boge ocoyenicʼ do bae baḍaeleda uni doe okoe kana mente, ente ona jaegare ạḍi utạr hoṛko bhiṛakatʼ tahẽkante Jisu do onḍe khone calaoena.

¹⁴ Ona tayom Jisu do mundilre uni hoṛ ńel ńamkedeteye metadea, “Ńelme, am dom boge akana. Ar alom kạiya, jemon jãhãnakʼ bạṛicʼ alo hoyokʼtam.”

¹⁵ Unre uni hoṛ do calaokate Jihudi mukhiyạkoe lạiyatʼkoa, acʼ okoeye bogeakade uni doe Jisu kana.

Hoponakʼ ektiạri

¹⁶ Jirạukʼ mãhãre Jisu do noakoe kạmiketʼte Jihudi mukhiyạko do goje lạgitʼko kurumuṭukeda.

¹⁷ Unre uni do onko mukhiyạkoe metatʼkoa, “Ińren Baba do jao ghuṛiye kạmikana ar iń hoń onkayeda.”

¹⁸ Jisuakʼ noa katha iạte mukhiyạko do goje reakʼ artetʼ dão ńam baṛaeko ehopʼena, ente uni do eken jirạukʼ mãhã reakʼ niạme rạputʼeda ona do baṅ, bickom Isor do acʼren Baba menteye metaekante acʼ do Isor somane benaokʼkana.

Hopon reakʼ ạidạri

¹⁹ Onate Jisu do onko mukhiyạkoe metatʼkoa, “Sạrigeń metapekana, Hopon do acʼte cetʼge bae ceka daṛeakʼa. Baba okaṭakʼ kạmikane ńelekan eken onageye daṛeakʼa, ente Baba okae cekae Hopon hõ onageye onkayeda.

²⁰ Baba do Hopone dulạṛede kana ar acʼ jãhãnakʼgeye cekayetʼ, ona jotowakʼge Hopone ńel ocoyedea. Uni do noako khon hõ maraṅ maraṅakʼ kạmiko Hopone udukʼaea, jemon Hoponakʼ sanam kạmiko ńeltepe hahaṛakʼ.

²¹ Baba do cetʼleka gocʼko jiwi emkateye beretʼetʼko onkage Hopon hõ jãhãerege sanayede unigeye jiwetʼ edekana.

²² Baba do okoe hõ bae bicạrkoa, menkhan joto bicạr reakʼ dạyik do Hopone emakawadea,

²³ Baba cetʼlekako manotede onkage jemon Hopon hõko manote. Hopon okoe bae manotede, uni do kol akadińicʼ Baba hõ bae manotea.

²⁴ “Sạrigeń metapekana, Ińakʼ katha okoeye ańjom ar kol akadińicʼreye pạtiạukʼ uni do jaejug jion menakʼtaea. Uni do dusi mente bae lekhakʼa, ente uni do moron khon jionteye parom akana.

²⁵ Sạrigeń metapekana, nonkan okte hijukʼ kana, bickom ńitokʼkangea, tinre gocʼko do Isorren Hoponakʼ aṛaṅko ańjoma ar tinạkʼko ańjom onko doko jiwedokʼa.

²⁶ Ente, Baba do cetʼleka acʼre jion menakʼtae onkage uni do Hopon hõ jion tahentae lạgitʼe emakawadea.

²⁷ Baba do manwa bicạrko lạgitʼ ektiạri Hopone emakawadea, ente uni doe Manwa Hopon kana.

²⁸ Noa katha ańjomkate alope hahaṛakʼa, ente nonkan okte daraekana, okoe topare menakʼko onko sanamkoge manwa Hoponakʼ aṛaṅ ańjomteko oḍokʼ hijukʼa.

²⁹ Okoe bhageakʼko kạmi akatʼ onko do jion ńam lạgitʼko beredokʼa, ar okoe bạṛicʼakʼ kạmikote okteko khemao akatʼ onko do sạjạiyokʼ lạgitʼgeko beredokʼa.

³⁰ Iń do apnarte cetʼge bạń ceka daṛeakʼa; cetʼlekań ańjoma onkageń bicạra. Iń do hok reakʼgeń bicạra, ente ińakʼ sana leka kạmi do bạń khojkana menkhan okoeye kol akadiń uniyakʼ menjoṅ lekageń kạmiya.

Probhu Jisu reaṅ goha

³¹ Ińge apnar reaṅ gohageń emle khan ona goha sạriyakʼ do baṅkana.

³² Eṭakʼ mitʼ hoṛ menaea okoe do iń reaṅ gohae emetʼkan, ar ińiń baḍaea uni oka gohae em ona do sạrigea.

³³ Ape do Johan ṭhen kathape kolleda, ar uni do sạri gohageye emakada.

³⁴ Iń do manwakoakʼ gohare bạń ṭehãḍokʼ kana, menkhan ape jemon kại khon bańcaope ńam onate noako katha doń roṛeda.

³⁵ Johange ona jolokʼkan diuheye tahẽkana one okaṭakʼ do ḍig ḍigạukʼkan tahẽkan; ar ape do thoṛa okte lạgitʼ uniyakʼ ona marsalre hulạsokʼpe kusilena.

³⁶ Menkhan Johanakʼ khon hõ ińakʼ do maraṅ goha menakʼtińạ, ente okako kạmi Babae emakawạdiń onakogeń kạmikana. Ar onako do iń reaṅ noa gohae emeda je, Babageye kol akadińạ.

³⁷ Uni Babage, one okoe do ińe kol akadiń, uni acʼge iń reaṅ gohae emakada. Ape do tis hõ uniyakʼ aṛaṅ bape ańjom akatʼtaea ar mẽtʼãhã hõ bape ńelakatʼtaea.

³⁸ Ona chaḍa uniyakʼ kathako do apeakʼ ontorre baṅ tahen kana, ente okoeye kolakade unire bape pạtiạukʼkana.

³⁹ Ape do sonot sostorkope ḍunḍhạueda, entepe hudiseda ona hotetege jaejug jionpe ńama. Menkhan ona sostor ma coṅ iń reaṅge gohae emetʼkan;

⁴⁰ enrehõ ape do jion ńam lạgitʼ iń ṭhen hijukʼ baṅ sanayetʼpea.

⁴¹ “Manwakoakʼ sabasi ńam lạgitʼ do bạń kurumuṭuyeda,

⁴² menkhan iń do apeń baḍae akatʼpea. Ińiń baḍaea apeakʼ ontorre Isorakʼ dulạṛ do bạnukʼtapea.

⁴³ Iń do ińren Baba ńutumteń hecʼakana ar bape aṅgocedeń kana; menkhan eṭakʼ jãhãe acʼ nijakʼ ńutumteye hecʼlen khan uni dope aṅgocea.

⁴⁴ Ape do eṭakʼko ṭhen khon sarhao ocokʼpe ńamkana, menkhan okaṭakʼ sarhao eken Isor ṭhen khon ńamokʼ ona reakʼ do bape kurumuṭuyeda. Ar noa tayom do cekatepe pạtiạu daṛekokʼa?

⁴⁵ Alope hudisa, Baba ṭheniń dusipea; menkhan okoe Mose ṭhenpe as akan uni Mosege ape doe dusipea.

⁴⁶ Ape do Mosepe pạtiạuae khan honaṅ ińrehõpe pạtiạukokʼa, ente Mose do iń reaṅgeye olakada.

⁴⁷ Menkhan uniyakʼ olakʼge bape pạtiạuakʼkan khan cekate ińakʼ kathako dope pạtiạuakʼa?”