Johan 4 - সান্তালী বাইবেল

Samariạ Maejiu

¹ Jisu do Johan khon hõ bạ̃ṛtiye celayetʼko are bạptisetʼko ona do Phạrusikoko ańjomakatʼ tahẽkana.

² Jisu do apnarte bae bạptisetʼko tahẽkana menkhan uniren celakogeko bạptisetʼko tahẽkana.

³ Ado Jisu onae baḍaeketʼ khan Jihudạ Prodes bạgikate arhõ Gạlilteye calaoena.

⁴ Ar Gạlilteye calakʼkan tahẽkan jokhecʼ uni do Samariạ disạm talate sen paromokʼ hoyentaea.

⁵ Uni do Samariạkoakʼ Sukhạrko metakʼ mitʼṭecʼ nagrahateye hecʼena. Noa nagraha do Jakob acʼren hopon Joseph okaṭakʼ jaegae emade tahẽkan ona sorrege tahẽkana.

⁶ Ona jaegare Jakobakʼ mitʼṭecʼ kũń tahẽkana. Jisu do dãṛã dãṛãteye laṅgayen khan ona kũń aṛereye duṛupʼena. Unre ber do tikin amdaj tahẽkana.

^7-8 Ado Jisuren celako atote jomakʼ kirińko calao akan tahẽkanre mitʼṭen Samariạ maejiu do dakʼ loe hecʼena. Jisu do uniye metadea, “E mại, den ńũi lạgitʼ dakʼ imạńme.”

⁹ Uni Samariạ maejiue menkeda, “Iń doń Samariạ maejiukana. Ar Jihudi hoykate cekate am do dakʼem koeyeń kana?” Maejiu do noa iạteye menkeda ente Jihudi ar Samariạko do bako duṛupʼ teṅgonkan tahẽkana.

¹⁰ Jisu do uni maejiue roṛ ruạṛadea, “Isorakʼ danem baḍaele khan ar okoe am ṭhen dakʼe kokoe kana enḍekhan amge honaṅ uni ṭhen dakʼem koekea ar uni do jiwetʼ dakʼe emkema.”

¹¹ Maejiue menkeda, “Menkhan amakʼ ma loloteakʼ hõ coṅ bạnukʼtam ar kũń ma khạndrige. Enḍekhan oka khon ona jiwetʼ dakʼ dom ńamkeda?

¹² Aleren baba Jakob khon do bam maraṅa. Noa kũń do unigeye emakatʼlea. Uni ar acʼren hoponko noa kũń reakʼ dakʼko ńũiyetʼ tahẽkana ar uniren mihũ meromko hõko ńũiyetʼ tahẽkana.”

¹³ Unre Jisui menkeda, “Jãhãege noa dakʼe ńũi uni do arhõ tetaṅea.

¹⁴ Menkhan iń oka dakʼiń emokʼ, ar okoe onae ńũi uni do tisge oho tetaṅlea. Ona dakʼ do uniyakʼ ontorre jaejug jion lạgitʼ bhumbukokʼkan dakʼ jharna leka hoyokʼa.”

¹⁵ Onate uni maejiu do Jisui metadea, “Enḍekhan ona dakʼ baṛe imạńme jemon alo tetaṅiń ar nonḍe dakʼ lo hijukʼ hõ alo hoyokʼ tiń.”

¹⁶ Jisu do uniye metadea, “Do calakʼme, ar amren jãwãe hoho ạguiyem.”

¹⁷ Maejiue menkeda, “Jãwãe do bạnuitińạ.” Jisu do uniye metadea, “Ṭhikgem menakada jãwãe do bạnuitama,

¹⁸ ente niạ lahare amren do mõṛẽ goṭen jãwãeko tahẽkantama, ar ńit okoe menae uni hõ amren jãwãe doe baṅkana. Am do sạri kathagem menakada.”

¹⁹ Unre maejiu do Jisui metadea, “Ńit iń baḍae daṛeakʼ kana am do mitʼṭen nạbi kanam.

²⁰ Aleren hapṛamko do noa burureko sewaletʼ tahẽkana, menkhan apepe meneda, Jerusalemrege sewa do lek kana.”

²¹ Jisu do uniye metadea, “Ańjomme ar ińakʼ kathare pạtiạukʼme, ente nonkan okte hijukʼ kana unre Isor Baba do noa burure hõ baṅ ar Jerusalemre hõ bape sewawaea.

²² Ente ape do okaṭakʼ bape baḍaekan onape sewawakʼ kana, menkhan ale okaṭakʼle baḍaeakatʼ onagele sewawakʼ kana, ente kại khon bańcaokʼ do Jihudiko khonge hecʼakana.

²³ Menkhan okte daraekana, ar ńit hõ kangea, one unre sạri sewako do Jiu ar sạriyakʼte Babako sewawaea. Ar Baba hõ nonkan sekʼwakogeye ńam baṛayetʼkoa.

²⁴ Isor doe Jiu kana; ar okoe uniko sewawaekan, onko do Jiu ar sạriyakʼte sewawae lek takoa.”

²⁵ Unre uni maejiue menkeda, “Baḍaegeạń, Mạsi, okoe do Krisṭko metaekan uni doe daraekana. Are hecʼlenre sanamakʼe baḍae ocobona.”

²⁶ Jisu do uniye metadea, “Iń kangeạń uni do, one okoe am tulucʼe galmaraokan.”

²⁷ Ar inạkʼtege Jisuren celako doko hecʼena, ar mitʼṭen maejiu tulucʼ Jisu galmaraoko ńelkede khan onko doko hahaṛayena. Menkhan enhõ okoege bako metadea, “Am do cetʼem khojkana se cedakʼ uni tulucʼ dom galmaraoeda?”

²⁸ Unre maejiu do acʼakʼ kanḍae bạgi oṭowatʼte atoteye senena ar hoṛkoe metatʼkoa,

²⁹ “Dela hijukʼte mitʼṭen hoṛ ńelepe. Uni do ińiń ceka akatʼ jotowakʼe lại ạdińa. Baṅ do nuigeye Mạsikan?”

³⁰ Onate hoṛko do ato khon oḍokkate Jisu ṭhen hijukʼko ehopʼena.

³¹ Ar inạ takre celako do nehõradeteko metadea, “E Guru, thoṛa jom maṛaṅlem.”

³² Jisu do onkoe metatʼkoa, “Iń ṭhen nonkan jomakʼ menakʼa one ona reakʼ ape do bape baḍaekan.”

³³ Onate celako doko menjoṅana, “Enḍekhan cetʼ jãhãe jomakʼko ạgu akawadea?”

³⁴ Unre Jisui metatʼkoa, “Okoeye kol akadiń uniyakʼ sanaleka calakʼ ar uniyakʼ kạmi purạutaege hoyokʼ kana ińakʼ jomakʼ do.

³⁵ Ape do cetʼ bape meneda, ‘ar pon cando khange phosol samṭao din do seṭerokʼa mente?’ Menkhan ińiń metapekana, mitʼ dhao khetko secʼ beṅgetʼakʼpe, phosol samṭao okte do hoyakana.

³⁶ Okoe phosole samṭaoetʼkan uni do ńitge kuṛạiye ńameda ar jaejug jion lạgitʼ phosole doho jarwayeda. Onate itạ erokʼicʼ ar phosol samṭaoicʼ, unkin banarge mitʼ sãotekin rạskạkʼ kana.

³⁷ Noate sạbudokʼ kana, ‘mitʼ hoṛ doe era ar eṭagicʼ doe ira.’

³⁸ Iń do nonkan phosol samṭaoiń kolketʼpea one ona lạgitʼ ape do bape khaṭao akan. Ente eṭakʼko doko khaṭao akana ar ape do ona khaṭaoakʼ reakʼ phosolpe samṭaoeda.”

³⁹ Ado okoe maejiue gohayetʼ tahẽkan, acʼe ceka akatʼ ona jotowakʼ do uniye lạiyakada mente, onate uniyakʼ katha ańjomkate ona atoren ạḍi utạr Samariạ hoṛ do Jisureko pạtiạuena.

⁴⁰ Onko do Jisu ṭhen hecʼkate ako sãote tahen lạgitʼko nehõradea. Onate Jisu do onḍe bar dine tahẽyena.

⁴¹ Unre uniyakʼ katha ańjomkate arhõ ạḍi utạr hoṛko pạtiạuena.

⁴² Onko do uni maejiuko metadea, “Ńitokʼ do eken amakʼ katha iạtele pạtiạukʼ kana ona do baṅ, menkhan uniyakʼ katha ańjomkatele bujhạu daṛeakʼ kana, sạrige uni do manwakoren babańcaoicʼ kanae.”

Napṛakʼ hoṛren hopone bogeyede

^43-44 Ado one Jisui menletʼ tahẽkan baṅma, nij disạmre nạbiko do manot bako ńama; onate ona katha purạukʼ lạgitʼ uni do Samariạre bar din tahẽkate onḍe khon Gạlilteye calaoena.

⁴⁵ Ar Gạlilreye seṭeren khan Gạlilrenko do uniko ataṅ daramkedea. Ente porob jokhecʼ okoeko hoṛ Jerusalemteko senlen onko do Jisui kạmiletʼakʼ jotowakʼko ńelleda.

⁴⁶ Jisu do arhõ Gạlil reakʼ ona Kana atoteye calaoena. Nonḍege uni do dakʼe darkha rasa ocoletʼ tahẽkana. Ar Gạlil reakʼ Kapharnạhum nagrahare mitʼṭen raj kạmiyạ hoṛren hopontetʼ doe ruạ kạhil akan tahẽkana.

⁴⁷ Uni rajren kạmiyạ hoṛ do Jisu Jihudiạ khon Gạlilteye hecʼakana menteye baḍaeketʼ khan uni do Jisu ṭhen senkateye nehõrena jemon Kapharnạhumte senkate gidrạye bogeye. Unre uniren gidrạ do gujukʼ dạkhile tahẽkana.

⁴⁸ Jisu do uni raj kạmiyạ hoṛe metadea, “Jãhãn cinhạ se hahaṛa kạmi bape ńellekhan ape do okalekate hõ ohope pạtiạulena.”

⁴⁹ Unre uni raj kạmiyạ hoṛ doe menkeda, “Ma dayakate ińren gidrạ ạuriye gujukʼrege hijukʼme.”

⁵⁰ Jisu do uniye metadea, “Do calakʼme, hoponme doe bogeyena.” Ar uni kạmiyạ hoṛ do Jisuakʼ kathare pạtiạuenteye calaoena.

⁵¹ Ado uni raj kạmiyạ hoṛ do tinre oṛakʼe ruạṛ senokʼkan tahẽkana unre horrege uniren gutiko do hecʼkateko metadea, “Amren hoponme doe bogeyena,”

⁵² Uni doe kuliketʼkoa, “Oka okteye bogeyena?” Adoko lạiyadea, “Hola tikin mitʼ baja okte ruạ do chuṭạuentaea.”

⁵³ Ar inạtege gidrạren apattetʼe doe bujhạukeda, ṭhik ona okterege Jisu doe metade tahẽkana, “Amren gidrạ doe bogeyena.” Unre acʼ ar acʼakʼ gharońjren sanamko do Jisureko pạtiạuena.

⁵⁴ Ar Jihudạ khon Gạlilre hecʼen tayom Jisu do dosar dhao noa hahaṛa kạmiye kạmikeda.