Johan 21 - সান্তালী বাইবেল

Jisu eae celako ṭhene sodoren

¹ Inạ tayom Jisu do Tiberias doreão aṛere celako ṭhen arhõe ńel ocoyena. Onḍe do nonka lekae sodorena.

² Simon Patras, ar jawako metae Thoma ar Gạlil reakʼ Kana nagraharen Nathaniel, Sabdaeren hoponkin ar Jisuren eṭakʼ barea cela onko do mitʼ soṅgeteko tahẽkana.

³ Unre Simon Patrase metatʼkoa, “Iń do hako sasapʼiń calakʼkana.” Onkoko metadea, “Ale hõ am sãotele calakʼa.” Unre onko do oḍok senkate lạukạreko decʼena, menkhan ona ńindạ do celege bako sapʼ daṛeatʼkoa.

⁴ Ado aṅga hijukʼkan tahẽkanre Jisu do doreão aṛere hecʼenteye teṅgoyena. Menkhan celako do Jisu kanae mente bako oromledea.

⁵ Uni do celakoe metatʼkoa, “E bachako jãhãn jomakʼ menakʼtapea? Metadeako, “Bạnukʼtalea.”

⁶ Jisui metatʼkoa, “Lạukạ reakʼ jojomsa aṛe secʼ jhạli caḍoytape, khanpe ńamkoa.” Unre onko do jhạliko caḍoketʼa ar nunạkʼ hakoko beṛketʼkoa je, onko do bako or rakapʼ daṛeada.

⁷ Ado Jisu okoeṭakʼ celae dulạṛede kan tahẽkan uni do Patrase metadea, “Uni doe Probhu kana.” Unre Simon Patras do koṭogeye tahẽkana. Onate “Probhu kanae” menteye baḍaeketʼ khan aṅgropte paṭheyente doreão dakʼreye don khadleyena.

⁸ Onko do ghuṭu khon ḍher sạṅgińre do baṅ, eken bar sae mokagan sạṅgińreko tahẽkana. Onate eṭakʼ celako do hakote perecʼ jhạli or orte lạukạte aṛeteko hecʼena.

⁹ Ado ghuṭuteko seṭeren khan kaṭ koela reakʼ seṅgel ar onare hako khadle akanko ńelkeda; ar onḍe do piṭhạ hõ tahẽkana.

¹⁰ Unre Jisui metatʼkoa, “Ńitokʼpe sapʼketʼko hako khon thoṛa ạgukope.”

¹¹ Khan Simon Patras do lạukạreye decʼente aṛete jhạliye or ạgukeda. Ar jhạli do mitʼ sae mõṛẽgel pea lạṭu hakote perecʼ tahẽkana. Menkhan jhạlire nunạkʼ hakoko tahẽkanre hõ ona do baṅ oṛecʼlena.

¹² Jisui metatʼkoa, “Dela hijukʼpe ar jompe.” Menkhan celako modre okoe hõ dilkate bako kuliledea, “Am dom okoe kana mente?” Ente onko doko baḍaekan tahẽkana, uni doe Probhu kana.

¹³ Jisu do hecʼkate piṭhại halaṅkeda are ematʼkoa, ar onkage hako hõ.

¹⁴ Jisu do gocʼko khon beretʼ ruạṛ tayom tesar dhao acʼren celako ṭhene ńel ocoyena.

Jisu ar Patras

¹⁵ Adoko jom sạtketʼ khan Jisu do Simon Patrase metadea, “E Jona hopon Simon, noko khon bạ̃ṛtim dulạṛedeń kana?” Simon Patrase menkeda, “Hẽ Probhu, baḍaegeam tinạkʼ iń dulạṛetʼmea mente.” Jisu do uniye metadea, “Ińren bhiḍiko gupikom.”

¹⁶ Jisu do dosar dhao uniye metadea, “E Jona hopon Simon, ińem dulạṛedeń kangea? Simon Patrase menkeda, “Hẽ Probhu Isor, baḍaegeam tinạkʼ iń dulạṛetʼmea mente.” Jisu do uniye metadea, “Ińren bhiḍiko jotonkom.”

¹⁷ Uni do tesar dhao Simon Patrase metadea, “Jona hopon Simon, sạrigem dulạṛ edeńkana?” Patras doe mon dukena, ente Jisu do tesar dhao uniye kulikedea, “Sạrigem dulạṛedeń kana?” Onate Patras do Jisui metadea, “E Probhu am do jotowakʼgem baḍaea, ar noa hõm baḍaegea amiń dulạṛetʼme kana.” Jisu do uniye metadea, “Ińren bhiḍiko gupikom.

¹⁸ Sạrigeń metamkana, juạnem tahẽkanre amtem paṭhekʼkan tahẽkana ar jãhãtege sanayetʼme tahẽkan onḍegem calakʼkan tahẽkana. Menkhanem haṛamlenre am do amakʼ tim tiyạr tama ar eṭagicʼ do ame tolmea ar okare calakʼ baṅ saname onḍegeye idimea.”

¹⁹ Isorakʼ ṭhonok sodortae lạgitʼ Patrasakʼ cetʼleka gujukʼ hoyokʼtaea ona bujhạu ocoy lạgitʼ Jisu do noa kathae roṛkeda. Ar noae roṛketʼ khan Patrase metadea, “Dela pańjańme.”

Jisu ar eṭakʼ celako

²⁰ Patras do tayom secʼe beṅgetʼ ạcurketʼ khan, Jisui dulạṛedekan tahẽkan cela pańjakane ńelkedea. Nui celage, kedokʼ jokhecʼ Jisuakʼ koṛamre ṭenḍarkateye menletʼa, “E Probhu Isor, bạirikoakʼ tireye soprotme, uni doe okoe kana?”

²¹ Patras do uniye ńelkedete Jisui metadea, “E Probhu, nuiyakʼ do cetʼ hoyokʼa?”

²² Jisu do Patrase metadea, “Ạuriń ruạṛ hijukʼ hạbicʼe tahẽ hataṛokʼ khan amakʼ do cetʼ? Menkhan am do iń pańjańme.”

²³ Onate boehako talare katha pasnaoena je, uni cela do bae gujukʼa. Menkhan Jisu do Patras bae men akawadea uni do bae gujukʼa mente. Bickome metade tahẽkana, “Ạuriń ruạṛ hijukʼ hạbicʼe tahẽ hataṛokʼ iń menjoṅkan khan amakʼ do cetʼ?”

Mucạtʼ kathako

²⁴ Uni celage noako reaṅ gohae emetʼkana ar noakoe oletʼkana. Alele baḍaea uniyakʼ goha do sạrigea.

²⁵ Jisu do arhõ ạḍi utạrakʼkoe kạmileda. Onako mitʼ mitʼte ollen khan nunạkʼ puthiko hoykokʼa je, ińakʼ bujre noa dhạrtire ohoge sahopʼlena.