Johan 20 - সান্তালী বাইবেল

Eken kobor

¹ Ado hapta reakʼ pạhil din ạḍi setakʼre, ńut tahẽkanrege Magdalaren Mạriạm do ona topa ṭhene hecʼena. Ar topa duạr khon dhiri do ocokʼ akatʼe ńelkeda.

² Onate uni do Simon Patras ar Jisui dulạṛedekan tahẽkan cela ṭhen ńir senkateye lạiyatʼkinạ, “Probhu do topa khonko idi akadea. Ar okareko dohoakadea ona do bale baḍaea.”

³ Unre Patras ar uni eṭakʼ cela do oḍokkate topa secʼkin calao idiyena.

⁴ Ar mitʼtekin dạṛ idikeda. Uni eṭagicʼ cela do Patras laha lahate usạrateye ńir senente topa ṭhene seṭer maṛaṅena, menkhan topa bhitrite uni do bae bololena.

⁵ Uni do eṅgotʼkateye oyoṅketʼ khan Jisuakʼ hoṛmore okaṭakʼ kicricʼ bedhao tahẽkan onako doho akane ńelkeda.

⁶ Simon Patras hõ uni tayomte seṭerkate topa bhitriteye boloyena ar kicricʼko dohoakatʼe ńelketʼa.

⁷ Uni do arhõe ńelkeda, bohokʼre okaṭakʼ urmạl bedhao tahẽkantae ona do eṭakʼ kicricʼko sãote bạnukʼa, menkhan guṛhạ akatʼ mitʼ jaegare begar dohoakana.

⁸ Ado okoeṭakʼ cela pạhilte topa ṭhene seṭerlen uni hõ topa bhitriteye boloyena are ńelketʼteye pạtiạuena.

⁹ Ar gocʼko khon Jisuakʼ jiwetʼ beredokʼ reakʼ je jạruṛ menakʼ, ona sonot sostor reakʼ katha onko do lahare bako bujhạu akatʼ tahẽkana.

¹⁰ Ona tayom unkin cela do oṛakʼtekin ruạṛ calaoena.

Jisu Mạriạm ṭhene sodoren

¹¹ Menkhan Mạriạm do topa bahrere teṅgokateye rakʼjoṅkan tahẽkana. Uni do rarakʼ tulucʼ eṅgotʼkate topa bhitriye oyoṅketʼ khan,

¹² Jisuakʼ mạ̃ṛĩ okare dohoakan tahẽkan onḍe ponḍ kicricʼ horokʼ akatʼ barea serma goḍet duṛupʼ akane ńelketʼkinạ, mitʼṭen do bohokʼ secʼre ar eṭagicʼ do jaṅga secʼre.

¹³ Unkin do Mạriạmkin metadea, “Cedakʼem rakʼeda?” Metatʼkinae, “Ińren Probhuko idi akadea ar okareko dohoakadea ona do bạń baḍaea.”

¹⁴ Noa menkate tayom secʼe beṅgetʼ ạcurketʼ khan Jisu teṅgo akane ńelkedea, menkhan Jisu kanae mente do bae bujhạu daṛeadea.

¹⁵ Jisu do uniye metadea, “Cedakʼem rakʼeda? Ar okoeyem ńam baṛayede kana?” Mạriạm do Jisu bagwanren mạli hudiskedeteye metadea, “Amem idiakade khan dayakate lạiyạńme okarem doho akadea. Iń do uniń idiyea.”

¹⁶ Jisui menkeda, “Mạriạm.” Onate Mạriạm doe ạcurente Ibrite Jisui metadea, “Rạbbuni.” Mane do E Guru.

¹⁷ Jisui menkeda, “Alom hạṛubińạ, ente ńit hõ sermaren Baba ṭhen ạuriń calakʼa. Am do senkate boehako lạiyakome, okoe doe iń ar aperen Babakan ar okoe doe iń ar aperen Isorkan, iń do uni ṭheniń rakapʼ calakʼkana.”

¹⁸ Unre Magdalani Mạriạm do celako ṭhen senkateye jạhiratʼkoa je, uni do Probhui ńelakadea ar Probhuge noako katha lại lạgitʼe men akawạdińa.

Probhu Jisu celako ṭhene sodoren

¹⁹ Ado enhilokʼge, hapta reakʼ pạhil din ạyupʼ jokhecʼ celako do Jihudi mukhiyạko botorte duạr sińkate mitʼ ṭhenko jarwa akan tahẽkana. Unre Jisu do hecʼkate onko talare teṅgoyenteye metatʼkoa, “Suluk apema.”

²⁰ Ar noa menkate uni do acʼakʼ banar ti ar kokhae udukʼatʼkoa. Ar Probhu Isorko ńelkede khan celako do ạḍitetʼko rạskạyena.

²¹ Jisu do arhõe metatʼkoa, “Suluk ape ma. Baba cetʼleka ińe kol akadiń onkage iń hõ apeń koletʼpea.”

²² Noa menkate uni do celako oṅatʼkoteye metatʼkoa, “Sonot Jiu hatao joṅpe.

²³ Ape do jãhãekoakʼ kạipe ikạitako, enḍekhan onkoakʼ do ikạkʼtakoa. Ar jãhãekoakʼpe tahẽ ocoytako khan onkoakʼ do tahẽakan tahentakoa.”

Bepạtiạu Thomawakʼ biswạs

²⁴ Jisu tinreye hecʼlen unre gelbarko modren Thoma ńutuman mitʼ hoṛ do onko soṅgere bae tahẽkana. Nui Thomage jawako metaekan tahẽkana.

²⁵ Ar eṭakʼ celako do Thomako lạiyadea, “Ale do Probhule ńel akadea.” Khan Thoma do onkoe metatʼkoa, “Iń do tin hạbicʼ uniyakʼ banar tire jạlại reakʼ cinhạ bạń ńel, ar bhugạkʼre kạṭupʼ bạń gutui ar kokhare ti bạń sog unhạbicʼ ohogeń pạtiạulena.”

²⁶ Ado niạ mitʼ hapta tayom celako do arhõ oṛakʼ bhitrire mitʼ ṭhenko jarwayena, ar Thoma hõ onko sãoteye tahẽkana. Unre silpińko sińge tahẽkanre hõ Jisu do hecʼkate onko talare teṅgoyenteye metatʼkoa, “Suluk ape ma.”

²⁷ Ona tayom uni do Thomae metadea, “Amakʼ kạṭupʼ nonḍe ạguiytam ar ińakʼ banar ti ńelme ar amakʼ ti tiyạrkate kokhare sogeńme. Ar bin pạtiạricʼ do alom hoyokʼa bickom pạtiạuicʼge hoyokʼme.”

²⁸ Unre Thomae menkeda, “E ińren Probhu, E ińren Isor.”

²⁹ Jisu do uniye metadea, “Thoma, am do cetʼ ńel akadińtem pạtiạukʼ kana? Menkhan okoe begor ńelteko pạtiạukʼ onkogeko bhạgana.”

Noa puthi olen reakʼ jostetʼ

³⁰ Jisu do celako samaṅre arhõ ạḍi utạr cinhạ kạmiye kạmileda; one onako do noa puthire baṅ olakana.

³¹ Menkhan noako olena jemonpe pạtiạukʼ, Jisu do Mạsi, Isorren Hopon kanae mente, arpe pạtiạukʼte uni hotete jion tahentape.