Johan 19 - সান্তালী বাইবেল

¹ Unre Pilạt do Jisu idiyete cạbuke reakʼe hukumatʼkoa.

² Palṭonko do jạnum reakʼ mukuṭ galaṅkate bohokʼreko horokʼadea.

³ Ar beguni roṅ reakʼ aṅgropko horokʼadete uni ṭhen senkateko menkeda, “Johar, Jihudikoren raj, jitạu hoyokʼtam ma!” Noa menkate onko doko thapa baṛakedea.

⁴ Pilạt do arhõ bahrete oḍok hecʼkate hoṛkoe metatʼkoa, “Ńelpe, ape ṭheniń oḍok ạguiyedea jemonpe bujhạu daṛeakʼ, uniyakʼ do jãhãn dosge bạń ńametʼtaea.”

⁵ Ar Jisu do jạnum reakʼ mukuṭ ar beguni roṅanakʼ kicricʼ horokʼ akatʼge bahreteye oḍok hecʼena. Unre Pilạt do hoṛkoe metatʼkoa, “Nũkʼũi ńelepe, uni hoṛ.”

⁶ Ado Jisuko ńelkede khan maraṅ naekeko ar kạmiyạko do hohowateko menkeda, “Kurus kaeme, uni do kurus kaeme.” Pilạt do hoṛkoe metatʼkoa, “Apege idiyete kurusepe, ente uniyakʼ jãhãn dosge bạń ńametʼtaea.”

⁷ Khange Jihudi mukhiyạko do Pilạtko metadea, “Ale do mitʼṭecʼ ạn menakʼtalea, ar ona ạn lekate uni do gocʼ ocokʼ lek kanae, ente uni do acʼte Isorren Hopone ńumogokʼ kana.”

⁸ Pilạt do noa kathae ańjomketʼ khan artetʼgeye botorena.

⁹ Uni do arhõ oṛakʼ bhitrite bolokate Jisui kulikedea, “Am do oka khonem hecʼakana?” Menkhan Jisu do cetʼge bae roṛ ruạṛleda.

¹⁰ Onate Pilạt do Jisui metadea, “Iń tulucʼ bam roṛa? Am do cetʼ bam baḍaea aṛakʼme se kurusme reakʼ ektiạri menakʼtińạ mente?”

¹¹ Jisui roṛ ruạṛkeda, “Coṭ khon ektiạri baṅ emam khan iń cetanre jãhãn ektiạrige oho tahẽlentama.” Onate okoe amakʼ tireye soprot akadiń uniyakʼ kại do ḍhergetaea.”

¹² Noa ańjomkate Pilạt do Jisu aṛage lạgitʼe kurumuṭukeda, menkhan Jihudi mukhiyạko do hohowateko menkeda, “Nuiyem aṛakʼ lekhan enḍekhan maharaj Kạisạrren gate dom baṅkana. Jãhãege acʼte raj menteye benaokʼ khan uni do Kạisạrren bạiri kanae.”

¹³ Noa katha ańjomkate Pilạt do Jisu bahreteye ạgukedea ar dhirite tolakʼ mitʼṭecʼ bicạr jaegareye duṛupʼena. Ibrite ona jaega do Gabbathako metakʼkan tahẽkana.

¹⁴ Enhilokʼ do bańcaokʼ porob reakʼ sapṛaokʼ din tahẽkana. Unre tikin amdaj tahẽkana. Pilạt do Jihudi mukhiyạkoe metatʼkoa, “Nũkʼũi ńelepe, aperen raj.”

¹⁵ Onate onko do ãṭ aṛaṅte hohowateko menkeda, “Idiyem, idiyem ar kurus kaeme.” Pilạte metatʼkoa, “Aperen raj do cetʼ ińiń kuruskaea?” Maraṅ naekeko roṛ ruạṛadea, “Kạisạr chaḍa aleren do ar cele raj hõ bạnukʼkoa.”

¹⁶ Unre Pilạt do kuruse lạgitʼ onkoakʼ tireye soprotkadea. Unre palṭonko do Jisuko idikedea.

Kurusre Probhu Jisuakʼ gujukʼ

¹⁷ Ar Jisu do acʼakʼ kurus gokʼkate khạpriko metakʼ mitʼṭecʼ jaegateye senena. Ona jaega reakʼ ńutum do Ibrite Golgothako metakʼkan tahẽkana.

¹⁸ Onko do onḍe Jisuko kuruskedea ar uni dene banar secʼre bar hoṛ hõko kurusketʼkinạ.

¹⁹ Ar Pilạt do mitʼṭecʼ olakʼre olkate Jisuakʼ kurus cetanreye bạisạu ocokeda. Onare ol tahẽkana, “Nasaretren Jisu Jihudikoren raj.”

²⁰ Okare Jisuko kuruskede ona jaega do nagraha sorre tahẽkante Jihudiko modren ḍher hoṛge ona olakʼko paṛhaokeda. Ona do Ibri, Romi ar Junạni pạrsite olakan tahẽkana.

²¹ Unre Jihudikoren maraṅ naekeko do Pilạtko metadea, “ ‘Jihudikoren raj,’ noa katha do alom ola, bickom olme, ‘uniye menetʼ tahẽkana, iń doń Jihudikoren raj kana.’ ”

²² Pilạte metatʼkoa, “Okań ol akatʼ ona doń ol akada.”

²³ Ado Jisuko kuruskede khan palṭonko do uniyakʼ kicricʼ ako talare pon ṭhenko hạṭińana. Ar Jisuakʼ aṅgrop hõko hataokeda. Ona aṅgropre do jãhãn silạige baṅ tahẽkana, ona do coṭ khon pheḍ hạbicʼ jotoge teńakʼ tahẽkana.

²⁴ Ona ńelte palṭonko do akoreko menjoṅana, “Noa do babon oṛeja bickom gulibãṭkate bon ńela okoeyakʼ hoyokʼa mente.” Noa do hoyena sonot sostor reakʼ katha jemon purạukʼ, Onko do ako talare ińakʼ kicricʼko hạṭińana, ińakʼ aṅgrop doko gulibãṭkeda. Ar palṭonko do sạrigeko onkakeda.

²⁵ Jisuren eṅgattetʼ, ar uniren eṅgattetʼren bokot kuṛi, Klopa rinicʼ Mạriạm, ar Magdalaren Mạriạm noko do Jisuakʼ kurus ṭhenko teṅgo akan tahẽkana.

²⁶ Jisu do acʼren eṅgattetʼ ar uniye dulạṛedekan tahẽkan cela teṅgo akane ńelketʼkin khan eṅgattetʼe metadea, “E go, ńeleme nũkʼũitam hoponme.”

²⁷ Ona tayom uni celae metadea, “Ńeleme nũkʼũitam eṅgam.” Ar unrege uni cela do Jisuren eṅgattetʼ acʼakʼ oṛakʼteye idikedea.

Jisuakʼ gujukʼ

²⁸ Inạ tayom sanamakʼ purạu akana menteye baḍaeketʼ khan sonot sostor reakʼ katha jemon purạukʼ onate Jisui menkeda, “Tetaṅedińa.”

²⁹ Ona jaegare sirkạte perecʼ mitʼṭecʼ hanḍha tahẽkana. Unre onko do mitʼṭecʼ ispońj ona sirkạreko topokeda ar husup ḍạr reakʼ agalre gutukate moca ṭhenko tomboṅadea.

³⁰ Jisu sirkại ńamketʼ khane menkeda, “Purạu akana.” Ar ona tayom do bohokʼe kuḍburketʼte jiwiye jimạketʼtaea.

Kokhare borlomteye sobokʼ ocokʼkan

³¹ Ona din do porob reakʼ sapṛaokʼ din tahẽkana. Ar dosar hilokʼ jirạukʼ mãhã tahẽkante Jihudi mukhiyạko do ona dinre kurus cetanre mạ̃ṛĩko tahen do bako khojlakʼa. Onate Pilạt ṭhenko nehõrena jemon kurusre menakʼkoakʼ jaṅga rạputʼkate kurus khonko pheḍ idiko.

³² Unre palṭonko hecʼkate Jisu sãoteko kurusletʼkin unkin bana hoṛakʼ jaṅgako rạputʼkeda.

³³ Ar Jisu ṭhenko hecʼen khan gocʼ hataṛ akanko ńelkedete uniyakʼ jaṅga do bako rạputʼletʼtaea.

³⁴ Menkhan mitʼṭen palṭon do borlomte uniyakʼ kokhareye sobokʼkedea ar onḍe khon mãyãm ar dakʼ oḍokena.

³⁵ Okoe nij mẽtʼte noakoe ńelletʼ unige gohae emakada, ar uniyakʼ goha do sạrigea. Uni doe baḍaegea, acʼ okae roṛetʼ ona do sạrigea, ar ape hõ jemonpe pạtiạukʼ.

³⁶ Noa do hoyena sonot sostor reakʼ katha jemon purạukʼ, “Uniyakʼ do mitʼṭen jaṅ hõ baṅ rạpudokʼtaea.”

³⁷ Arhõ sostor reakʼ ar mitʼṭecʼ katha do noage, “Okoe uniko sobokʼ tapʼlede onkoge uniko beṅgetʼaea.”

Jisuko topakede

³⁸ Noako sanamakʼ hoyen tayom Arimạthiạ atoren Joseph do Jisuakʼ mạ̃ṛĩ iditae lạgitʼ Pilạt ṭhene koekeda. Joseph hõ Jisuren celae tahẽkana menkhan sodorte do baṅ, ente uni do Jihudi mukhiyạkoe botorako kan tahẽkana. Ado Pilạte aṛakʼade khan uni do hecʼkate Jisuakʼ mạ̃ṛĩye idikeda.

³⁹ Ar lahate ạyupʼ jokhecʼ okoe do Jisu ṭhene hecʼlen uni Nikodemus hõ pegel pe keji mesao akatʼ gondhoros ar oguruanteye hecʼena.

⁴⁰ Unkin do Jisuakʼ mạ̃ṛĩ hataokate Jihudikoakʼ topa reakʼ cạli leka ona sanam mosola salakʼ musnạ kicricʼte mạ̃ṛĩkin bedhaokeda.

⁴¹ Ar Jisu okareko kuruslede ona jaegare mitʼṭecʼ bagwan tahẽkana ar onḍe do nãwãge kholao akatʼ mitʼṭecʼ topa tahẽkana. Ona topare do okoege tis hõ bako dohoakatʼko tahẽkana.

⁴² Ona din do Jihudikoakʼ porob reakʼ sapṛaokʼ din tahẽkana, ar topa hõ sorrege tahẽkante unkin do ona toparege Jisukin baekadea.