Johan 16 - সান্তালী বাইবেল

¹ “Iń do noako joto kathań lạiyatʼpea jemon monre alope tạkijokʼ.

² Sunạgog khonko oḍok idipea; ar nonkan okte hijukʼ kana one okoe apeko gocʼpe onko doko monejoṅa, Isorgeko sewawae kana mente.

³ Onko do noa iạtegeko onkaea ente Baba hõ bako baḍaeakadea ar iń hõ bako baḍae akadińạ.

⁴ Iń do noakoń galmaraowatʼpea jemon ona okte hecʼlenrepe disại, noa kathań metatʼpe tahẽkana. “Pạhil khon noako katha do bạń lại akawatʼpea, ente ape tulucʼ iń tahẽkana.

Sonot Jiu hijukʼ reaṅ

⁵ Okoe ińe kol akadiń iń do ńitokʼ uni ṭhengeń calakʼ kana, ar apeko modren okoe hõ bape kuliyediń kana, ‘okatem calakʼ kana mente?’

⁶ Iń do noakoń lại akawatʼpe iạte apeakʼ mon do dukte perecʼ akana.

⁷ Enre hõ sạri kathageń lạiyape kana, ińakʼ calakʼ do ape lạgitʼ bhagegea, ente bạń senlen khan uni sohotʼicʼ do ape ṭhen bae hijukʼa. Menkhan ińiń senlenre uni do ape ṭheniń kolea.

⁸ Uniye hecʼlenre dhạrtirenko do kại reaṅ, dhorom reaṅ ar Isorakʼ bicạr reaṅ cehaonae emakoa.

⁹ Uni do kại reaṅ hõ cehaonae emakoa, ente hoṛko do ińre bako pạtiạukʼ kana;

¹⁰ Isorakʼ sanaleka calakʼ reaṅ hõ cehaonae emakoa, ente iń do Baba ṭheniń calakʼ kana menkhan ape do ar bape ńel ńameńa;

¹¹ Bicạr reaṅ hõ cehaonae emokʼa, ente dhạrtiren rajakʼ bicạr do hoyakana.

¹² “Ape lại ape lạgitʼ arhõ ạḍi okocʼ kathako menakʼtińạ, menkhan ńitokʼ onako do ohope sahao daṛelea.

¹³ Menkhan uni sạriyakʼren Jiu tinreye hijukʼa unre uni do hore udukʼapete sạriyakʼreye ạyurpea. Uni do acʼte bae roṛa, menkhan okaṭakʼe ańjom onageye roṛa ar okaṭakʼ hoyokʼ lạgidokʼ ona hõe baḍae ocopea.

¹⁴ Uni sạriyakʼren Jiuge ińakʼ ṭhonoke sodora, ente jãhãnakʼgeń cekae ariń roṛ onage uni do ape ṭhene sodora. Babawakʼ oka menakʼtae onako sanamakʼge ińakʼ kana.

¹⁵ Ona iạteń meneda, jãhãnakʼgeń cekae ariń roṛ onage uni do apeye baḍae ocopea.

¹⁶ “Thoṛa ghạṛicʼ khange bape ńel ńameńa, arhõ thoṛa ghạṛicʼ khangepe ńeleńa.”

Celako jiwi raṛecʼe emakokan

¹⁷ Ado noa katha ańjomkate Jisuren celako modren adomko do roṛ baṛaeko ehopʼena, “Nui do cetʼe metabon kana, ‘thoṛa ghạṛicʼ khange bape ńeleńa arhõ thoṛa ghạṛicʼ khangepe ńeleńa?’ Arhõ uni doe meneda, ‘Baba ṭheniń calakʼ kana.’

¹⁸ Ar one thoṛa ghạṛicʼ reakʼ kathae menetʼkan ona do cetʼ kana? Abo do babon bujhạu daṛeakʼ kana cetʼe meneda.”

¹⁹ Ado celako noa reaṅ kuliyeko menjoṅ kana menteye bujhạuketʼ khan Jisu do onkoe metatʼkoa, “Ińiń menakatʼ, ‘thoṛa ghạṛicʼ khange bape ńeleńa arhõ thoṛa ghạṛicʼ khangepe ńeleńa,’ noa reaṅge cetʼ ape talare bape kupulikʼ kana?

²⁰ Sạrigeń metapekana, ape dope rakʼjoṅa arpe hae haeyokʼa menkhan dhạrtiren hoṛ doko rạskạkʼa. Ape do dukpe ńama, menkhan apeakʼ noa duk do baṅ tahena; ona bodolte ape dope rạskạkʼa.

²¹ Maejiu do gidrại janame jokhecʼ kosṭoe ńama, ente uniyakʼ okte do seṭerentaea. Menkhan gidrại janamlere, dhạrtire mitʼṭen nãwã manwae hecʼen reakʼ rạskạte ona kosṭo do ar bae disạea.

²² Onkage ape hõ ńitokʼ do haron ar kosṭope ńameda; menkhan arhõ apeko sãoteń ńapamokʼa unre apeakʼ mon do rạskạte perejokʼa ar ona rạskạ do okoe hõ bako recʼ daṛeapea.

²³ Enhilokʼ ape do cetʼge bape kuliyińạ. Sạrigeń metapekana, iń ńutumte Baba ṭhen jãhãnakʼgepe koe uni do onae emapea.

²⁴ Ape do ńit hạbicʼ iń ńutumte jãhãnakʼge ạuripe koea. Koepe, adope ńama jemon apeakʼ rạskạ purạukʼtape.

²⁵ “Noako sikhạuna katha do phenkoteń galmaraoatʼpea. Ente nonkan okte hijukʼkana one unre iń do phenkote ar bạń galmarao apea, menkhan pusṭạute Baba reaṅ iń lạiya.

²⁶ Enhilokʼ ape do iń ńutumtepe koea, ar bạń meneda, ińge ape lạgitʼ Baba ṭheniń nehõrokʼa.

²⁷ Baba ma coṅ acʼgeye dulạṛetʼpe, ente ape do ińpe dulạṛakadińạ arpe pạtiạu akana, iń do Baba Isor ṭhen khoniń hecʼakana.

²⁸ Sạrige iń do Baba ṭhen khon noa dhạrtiteń hecʼakana, arhõ noa dhạrti bạgikate Baba ṭhengeń calakʼ kana.”

²⁹ Unre uniren celakoko metadea, “Ńelme ńitokʼ do sodortegem roṛeda, jãhãn phente do bam lạiyeda.

³⁰ Nitokʼ dole bujhạu daṛeakʼkana, bin baḍaeakʼ do cetʼge bạnukʼtama, ar jãhãege jãhãnakʼe kulime ona reakʼ jạruṛ hõ bạnukʼtama. Ona iạtegele pạtiạukʼ kana am do Isor ṭhen khonem hecʼakana.”

³¹ Jisu do acʼren celakoe metatʼkoa, “Enḍekhan ńitokʼ do cetʼ pạtiạukʼ kangeape?

³² Ńelpe, ona okte do hijukʼkana, hẽ hecʼakangea, unre ape dope chirchạturokʼa ar iń eskarpe bạgi oṭowạńte apan ạpin jaegatepe calakʼa, enrehõ iń do bạń eskara, ente iń tulucʼ do Baba menaea.

³³ Iń do noakoń lạiyatʼpea jemon iń tulucʼ mitʼ akanpe tahente monre sulukpe ńam. Noa dhạrtire ape do harkhet ar sasetre menakʼpea, menkhan khạtirokʼpe; ińge dhạrti doń jitạuakada.”