Joel 3 - সান্তালী বাইবেল

Jạt jạtrenkoakʼ bicạr

¹ “Ańjompe, onako dinre ar onako oktere Jihudạ ar Jerusalem do tinre lahate lekań beretʼ ruạṛa,

² unre iń do sanam jạtrenkoń jarwa mitʼkoa ar Jehosaphat reakʼ buru nalareń pheḍ ạgukoa. Onḍe ińakʼ sompotti, metakʼme ińren hoṛ Israelko reaṅ onko upạrteń bicạra, ente jạt jạtrenko tala khon onko do ińren hoṛko chirchạturletʼkoa ar ińakʼ disạmko hạṭińjoṅan tahẽkana.

³ Onko do ińren hoṛko hạṭińko reakʼko gulibãṭleda ar kusumbi ńamko lạgitʼ Israelren hoponkoko ạkhrińletʼkoa; ar darkha rasa lạgitʼ hõ Israelren hoponerako ạkhrińletʼkoa jemon darkha rasako ńũ daṛeakʼ.

⁴ “Ńitokʼ do E Tur, Sidon ar Philisṭi reakʼ sanam ṭoṭhako, iń sãote apeakʼ do cetʼ? Ape do cetʼ iń cetanrepe hala hạkʼli kana? Iń cetanre hala hạlipe menetʼ khan ape okape cekae iń hõ apeakʼ bohokʼre usạrate onań paṛao ocoya.

⁵ Ona reakʼ karon do hoyokʼkana, ape do ińakʼ sona ar rupạpe hatao akada ar ińakʼ joto khon damanakʼ jinisko apeakʼ mundilrepe aderakada.

⁶ Jihudạ ar Jerusalemren hoṛko do akoakʼ disạm khon sạṅgiń giḍikako lạgitʼ Junạniko ṭhenpe ạkhrińletʼkoa.

⁷ “Ańjompe, okako ṭhạ̃ikore onkope ạkhriń akatʼko onḍe khon iń do onkoń hoho ạgukoa ar ape okaṭakʼpe ceka akatʼ onage apeakʼ bohokʼreń ruạṛapea.

⁸ Aperen hopon ar hoponerako do Jihudạren hoṛ ṭheniń ạkhrińkoa ar onko do sạṅgińre menakʼko Saba jạtren ṭhenko ạkhrińkoa.” Noa katha do Probhu Isorgeye menetʼkana.

Isorren hoṛko lạgitʼ bhor

⁹ Ape do jạt jạtrenko talare niạ katha lại sodorpe; “Sonot lạṛhại lạgitʼ sapṛao akae tahenpe, ar daṛean hoṛko hoho ạgukope. Ar sanam lạṛhại phạdko do senkate jhãpko em ma.

¹⁰ Apeakʼ nahel reakʼ phalkote do tarwaṛeko koṭecʼ benaojoṅpe ar kạidạkote do borlomge benaojoṅpe. Ar nijoran hoṛ doe menma, ‘iń doń daṛeangea.’

¹¹ E beṛhaeten sanam jạtrenko, ape do usạra hecʼkate jarwakʼpe.” E Probhu Isor, amren daṛean hoṛko baṛe kolkakome.

¹² Probhu Isore meneda, “Jạt jạtrenko doko hoho ạgu ocokʼ ma; onko do Jehosaphat reakʼ buru nalateko sen idikʼma, ente onḍe iń do beṛhaeten sanam jạtrenko bicạrko lạgitʼ iń duṛupʼa.

¹³ Onkoakʼ dusṭạmi do ḍhergetakoa, ona iạte ma datrom calaope, ente phosol do bele akana. Ape do hecʼkate darkha jo lenpe, ente darkha jo lelen reakʼ kunḍ do cehel cepel akana. Darkha rasa reakʼ bhajan khon rasa do se oḍokokʼ kana.”

¹⁴ Sạjại reakʼ lodamre ḍher hoṛkoakʼ bhiṛ, hẽ ḍher hoṛkoakʼ bhiṛge hoyakana, ente sạjại reakʼ lodamre Probhu Isorakʼ din do seṭer akana.

¹⁵ Siń cando ar ńindạ cando dokin ńutokʼa ar ipilko do marsal bako emokʼa.

¹⁶ Probhu Isor do Sion khone hạnḍrạukʼa, ar Jerusalem khon acʼakʼ aṛaṅe ańjom ocoytaea; serma ar ot do dal dalaokʼa. Menkhan Probhu Isor do acʼren hoṛkoren hirlại hoyokʼa.

¹⁷ Probhu Isore meneda, “Unrepe baḍaea daṛeakʼa, ińkangeạń aperen Probhu Isor do; ińge Sionre, ińakʼ sonot burureń girobasokʼ kana. Jerusalem do sonotokʼa; ar bidisiạko hõ onḍe do tishõ bako calakʼa.

¹⁸ “Enhilokʼ maraṅ buruko khon nãwã darkha rasako ńamokʼa ar huḍiń buruko khon do toage. Jihudạ reakʼ sanam dakʼ ạtukʼ nalako khon do dakʼ ạtu oḍokokʼa. Probhu Isorakʼ oṛakʼ khon hõ mitʼṭecʼ jharna phuṭạukʼte Siṭim reakʼ buru nalare dakʼe emakʼa.

¹⁹ Menkhan Misor do dhaṅdhaserakʼ ṭhạ̃ige hoyokʼa ar Edom do jarkharakʼ hahaṅkar hoyokʼa, ente Jihudạren hoṛko cetanre santao hoyakana ar onkoakʼ disạmre bin dusạnkoakʼ mãyãm joro ocoakana.

^20-21 Lahate noko do dusi menteń lekhaletʼkoa, menkhan ńitokʼ do onkoakʼ doskoń ikạkatakoa. Ar hoṛko do Jihudạre jaejugko girobasokʼa ar Jerusalemre do piṛhike piṛhi hạbicʼge, ar iń Probhu Isorge Sionreń tahena.”