Joel 2 - সান্তালী বাইবেল

Poho ar lạṛhại phạdko

¹ Sionre sakwa oroṅpe, ińakʼ sonot burure muhin reakʼ soṅket baṛe ruipe. Disạmreko girobasokʼ kan sanam hoṛ doko thar tharaokʼ ma, ente Probhu Isorakʼ din do hijukʼkana; ona din do hecʼ sorakana.

² Ona do ńut ar kaṛaṅ kucạṅ ńutakʼ dinge, hende rimil ar kaṛaṅ ńutakʼ dinge. Buru ar ḍuṅgriko cetanre cetʼleka aṅga hijukʼ reakʼ marsal pasnao idikʼ onkage maraṅ ar daṛean pohokoren phạdko hijukʼkana. Nonkan lạṛhại phạd do lahateakʼ jugre tishõ bako tahẽkana, ar oka jugko hijukʼkan unrehõ bako tahena.

³ Onko laha lahate do seṅgele jojomkana ar onko tayomte do seṅgel lepʼe roṅgokana. Onko samaṅre disạm do Eden bagwan leka, ar onko tayomre do ujạṛakʼ hahaṅkar; ona khon rukhiyạ do cetʼge bae ńameda.

⁴ Onkoakʼ muṭhạn do sadomleka; sadomre decʼakan lạṛhại phạdko leka ar onko doko ńir baṛaekana.

⁵ Rãt gạḍi reakʼ sabad leka, lanḍha jolokʼkan seṅgel reakʼ saḍe leka onko do buru cetanteko don hijukʼa. Onko do lạṛhại lạgitʼ sajao akan mitʼ dol daṛean lạṛhại phạdko lekage.

⁶ Onko ńelte jạtrenkoakʼ monre jontrona hoyokʼkana; sanamkoakʼ mẽtʼãhã do mirluṅ akantakoa.

⁷ Onko lạṛhại phạdko do lạṛhại bir lekako ńir baṛaekana, lạṛhại phạdko leka pạcriteko decʼ paromokʼkana. Onko do jotoge mitʼ sạrteko laha calakʼkana, ar akoakʼ hor khon bako ocogokʼkana.

⁸ Onko do apan ạpin cetanre bako lade ghugukʼkana; onko mimitʼko do samaṅ secʼko laha idikʼkana. Cetʼtege bako akoṭokʼkana onko do sạr sạrtegeko laha idikʼkana.

⁹ Onko do nagraha cetanre jhãpko ema, ar pạcri cetanteko ńir baṛaea; onko do oṛakʼ-duạrteko dejokʼa, ar kombṛo leka jalna secʼteko bolokʼa.

¹⁰ Onko samaṅre dhạrti do dal dalaokʼa, serma hõ thạl thạlokʼa, siń cando ar ńindạ cando dokin ńutokʼa ar ipilko hõ bako terdeja.

¹¹ Probhu Isor do acʼren lạṛhại phạdko laha lahate acʼakʼ ãṭ aṛaṅe ańjom ocoytaea; uniren lạṛhại phạdko do lekhate ohoko caba daṛelena ar okoe uniyakʼ hukumko senakʼkan onko doko daṛeanko kana. Probhu Isorakʼ din do maraṅ ar ạḍi botorangea; okoe ona doe sahao daṛekea?

Mon ạcur

¹² Probhu Isore meneda, “Ńitokʼ do upạspe ar rakʼjoṅpe ar duk sodor salakʼ goṭa ontorte iń ṭhen ruạṛpe.”

¹³ Apeakʼ kicricʼ do baṅ menkhan ontor oṛejtape. Aperen Probhu Isor ṭhen ruạṛ hijukʼpe, ente uni do daya ar mãyãteye perecʼgea; uni do bae edre hodokʼa, uniyakʼ daya do asambheṛgetaea ar bạṛicʼakʼko iạteye kastaokʼkana.

¹⁴ Okoeye baḍaea, hoedaṛeakʼa uni do arhõ mone ạcur ruạṛtaea ar bhore em oṭokakʼa, jemon aperen Probhu Isor ńutumte jomakʼ samaṅokʼakʼ ar coḍor porobpe porob daṛeakʼ.

¹⁵ Ape do Sionre sakwa oroṅpe, ar sonot upạs reakʼ bebostaepe, ar mitʼṭecʼ sabha hoeocoype;

¹⁶ ar hoṛko jarwakate Isor ńutumte begar dohokope; murubbiko mitʼ jaegare hoho jarwakope, toa ńuńuko ar gidrạko hõ jarwakope. Jãwãe ar bạhu kuṛi do ạkinakʼ aṭetʼkin bạgi oṭowakʼma.

¹⁷ Okoe Probhu Isor samaṅre sekʼwa kạmiko kạmikan onko naeke do koejoṅ oṛakʼ pinḍạ ar pinḍ talareko rakʼjoṅma. Onko doko menma, “E Probhu Isor amren hoṛko dayawakome. Amakʼ sompotti do landa dhutʼakʼ alom hoeocoya, ar jạt jạtrenko talare kạhtukko hõ alom hoyocokoa. Eṭakʼ jạtren hoṛ do cedakʼko mena, ‘onkoren Isor doe okayena?’ ”

Probhu Isorakʼ roṛ ruạṛ

¹⁸ Unre Probhu Isor do acʼakʼ disạm lạgitʼe ãṭokʼa ar acʼren hoṛkoe mãyãwakoa.

¹⁹ Probhu Isor do onkoakʼ katha reakʼe roṛ ruạṛakoteye mena, “Iń do ape ṭhen nãwã darkha rasa, sunum, ar phosolkoń kola, onatepe tirpitokʼa; ar jạt jạtrenko ṭhen ar tishõ landa dhutʼanko do bạń hoyocopea.

²⁰ “Utạr secʼ khon hijukʼkan lạṛhại phạdko do ape ṭhen khoniń sạṅgiń giḍikakoa; khaṅgoṭ ar jarkhar akan hahaṅkar jaega secʼ iń laga ńirkoa. Onko samaṅ secʼrenko do purub jalapurire ar onko tayom secʼrenko do pạchim jalapuriteń lagakoa. Onkoakʼ bạṛicʼ so do cetante rakapʼa ar seage so oḍokokʼa, ente onkoakʼ kạmi do bạḍạite perecʼge takoa.”

²¹ E Jihudạ disạm, alom botorokʼa; am do kusikʼme, rạskạkʼme, ente Probhu Isor do maraṅ maraṅakʼkoe kạmiakada.

²² E ṭạnḍiren janwarko, alope botorokʼa, ente ạtiń ṭạnḍi do hạriạ̃ṛ akana. Darekore jo hõ sapʼakana; loa dare ar darkha nạ̃ṛĩ hõ ḍher jo akana.

²³ E Sionren hoṛko, ma kusikokʼpe, aperen Probhu Isor iạte rạskạkʼpe, ente uniyakʼ dhorom iạte uni do laha dakʼe emapekana. Uni do ape lạgitʼ asecʼ tasecʼ dakʼe emokʼkana, pạhil lekage uni do laha ar tayom dakʼe emapekana.

²⁴ Khạrại do phosolkote perejokʼtapea; bhajan khon darkha rasa ar sunum do se oḍokokʼa.

²⁵ Probhu Isore menetʼkana, “Ińren maraṅ lạṛhại phạdko okoe do ape ṭheniń kolletʼko metakʼme jhãke jhãk pohoko, jaljalte jojom pohoko, dodonkan pohoko ar rehetʼ jojom pohoko ar jom ṭhuṭkutʼ pohoko tinạkʼ bochor hạbicʼ apeakʼ phosolko jomakatʼ ona doń sodkatapea.

²⁶ Ape do lacʼ bikʼpe joma arpe tirpitokʼa ar aperen Probhu Isorpe sarhaoea one uni ape lạgitʼ hahaṛa kạmikoe kạmi akatʼ; ar ińren hoṛ do ar tishõ bako lajao ocokʼa.

²⁷ Unrepe baḍae daṛeakʼa, ińge Israelko talare minạńa ar iń kangeạń aperen Probhu Isor do, ar iń do eṭagicʼ doń baṅkana; ińren hoṛ do ar tishõ bako lajao ocokʼa.

Probhu Isorakʼ din

²⁸ “Ona tayom iń do sanam hoṛko cetanre ińren Jiu iń dulea. Onate aperen hopon ar hoponerako do nạbi lekate Isorakʼ kathako roṛa, ar aperen haṛam hoṛ do kukmũko ńela ar aperen juạnko hõ dorsonko ńama.

²⁹ Ona jokhecʼ ińren guti ar kạ̃ṛmĩko cetanre hõ ińren Jiu iń dulea.

³⁰ Iń do serma ar otre hahaṛawakʼ ghoṭnakoń uduga, metakʼme mãyãm, seṅgel ar ḍher dhũạgeń uduga.

³¹ Probhu Isorakʼ ona maraṅ ar botoranakʼ din hijukʼ lahare siń cando doe ńutokʼa ar ńindạ cando do mãyãm lekae hoyokʼa.

³² Unre rukhiyạ ńam lạgitʼ jãhãege Probhu Isore hohowae uni do rukhiyại ńama, ente Probhu Isorakʼ katha leka Sion bururen ar Jerusalemren adom hoṛ do rukhiyạko ńama. Isor okoeye bachao akatʼko onko do rukhiyạ akan hoṛ talareko tahena.