Jobakʼ 9 - সান্তালী বাইবেল

Jobakʼ pạhil roṛ ruạṛ

¹ Job do roṛ ruạṛketʼteye menkeda,

² “Ṭhik katha kana, ińiń baḍaegea noa do sạrikana. Menkhan Isorakʼ mẽtʼre cekate manwa do dhoromicʼe hoyokʼa?

³ Jãhãege uni sãote reṭepeṭekʼe khoj, enḍekhan hajar goṭecʼe kuklile khan uni do mitʼṭecʼ reakʼ roṛ ruạṛ hõ bae em daṛeakʼa.

⁴ Uniyakʼ akel do khạndrigea, ar daṛe hõ asambheṛgetaea; uni upạrte teṅgokate okoe haleye rukhiyạ daṛekokʼa?

⁵ Uni do ackage buru-boṭkocʼkoe ocoga, edrete onakoe marao utạra;

⁶ Acʼakʼ jaega khon pirthimi doe dal dalaoa, ona reakʼ khunṭikoe thar tharao ocoya.

⁷ Uniye baron lekhan siń cando hõ marsal bae ema ar ipilko hõ bako jolokʼa.

⁸ Uni do eskarte sermakoe pasnaoeda ar jalapuri reakʼ ḍheoko cetanteye taṛameda.

⁹ Uni do buḍhi parkom, arãṛ lalakʼko ar soren ipilko ar dạkhin secʼren ipilkoe sirjạu akatʼkoa.

¹⁰ Uni do baṅ bujhạu ńamokʼ maraṅakʼkoe kạmikana ar nonkan hahaṛawakʼkoe kạmikana oka do baṅ lekhakʼ.

¹¹ “Uni do iń samaṅteye dãṛãnkana, ar bạń ńelńame kana; uni do sorteye paromokʼ kana, ar bạń orom daṛeae kana.

¹² Uniye rerecʼ khan okoe uni doe tạkicʼ daram daṛekea? Okoe uniye kuli daṛekea, ‘am do cetʼem cekayeda mente?’

¹³ Isor do acʼakʼ edre bae or ruạṛtaea; dakʼren danob Rahabren gokʼṛoko hõ uni ṭhen doko jaṅga latarokʼa.

¹⁴ “Enḍekhan cekate uniyakʼ katha reakʼ roṛ ruạṛ doń emaea? Uni lạiyae lạgitʼ okare katha doń sendra ńama?

¹⁵ Apnarte dhoromicʼ iń hudisokʼ kanre hõ bạń roṛ ruạṛ daṛeae kana; ińren bikʼcạricʼ ṭhen eken daya reakʼgeń koea.

¹⁶ Ińiń hohoaere ińakʼe ańjomtińlere hõ enhõ ińakʼ kathae ańjoma mente, iń do bạń pạtiạukʼa.

¹⁷ Uni do birbãoteye gejer lạhutʼkedeńạ ar ạuṛiyakʼte uni doe dal ghaoeń kana.

¹⁸ Uni do bae sahẽtʼ ocowạń kana bickom haṛhatʼte ińakʼ jiwiye perecʼetʼ tińạ.

¹⁹ Daṛe reakʼ katha kan khan ma beṅgetʼaeme; ar bikʼcạr reakʼ katha kan khan ańjomtińae mente okoeye metaea?

²⁰ Miridosiń tahenre hõ ińakʼ moca do ińe dusiyińạ; ariń dhoromgere hõ enhõ ińakʼ moca do bedhoromicʼ menteye mitạńa.

²¹ Iń doń miridosgea, onate do cetʼ cekakʼtińạ? Iń do apnarakʼ jiwigeń hirkhạwakʼ kana.

²² Sanamakʼge somangea, onateń meneda, ‘miridos ar bedhorom-nukin banarge uni doe maraokinạ.’

²³ Uphạd ar ackage miridosicʼakʼ gujukʼ hoylenre uni doe landa joṅa.

²⁴ Bedhoromkoakʼ tire dhạrti do emakana ar Isor do bikʼcạrkoakʼ mẽtʼe bond akatʼ takoa. Uni bae onka akatʼ khan tobe do okoeye onka akada?

²⁵ “Dạdạṛicʼ khon hõ ińakʼ dinko do usạra paromokʼ kana; ona do uḍạu paromokʼ kana, ar bhạlại do bạń ńameda.

²⁶ Pạṭiol reakʼ lạukạ leka ona do sohor calakʼ kana; ona do pajhaṛ leka ạphir calakʼ kana.

²⁷ Ińiń men, ‘ińakʼ duk doń hiṛińtińa, mulin mẽtʼãhã doń ocoga, ariń kharsalakʼa,’

²⁸ Enhõ ińakʼ sanam harkhetʼkoń botorakʼ kana, ente ińiń baḍaea bin dusạn mente do bam ataṅińạ.

²⁹ Iń do tinre dusi menkateń hudis ocokʼa, unre cedakʼ ạuṛiyakʼ doń kosṭokʼa?

³⁰ Iń do sạbunteń ạbukʼ saphakʼre hõ ar kharte tiyiń saphakʼre hõ,

³¹ enhõ am do losotʼrem caḍokạńạ; onate ińakʼ kicricʼko do ińko hirkhạwạńạ.

³² “Uni do iń lekan manwa doe baṅkana je, uniń roṛ ruạṛaea se adalotre uni samaṅreń teṅgokʼa.

³³ “Aha, jodi jãhãe nonkae tahen khan okoe do ạliń talareye bicạr daṛeke one uniyakʼ katha bana hoṛ liń manao daṛeke;

³⁴ jodi jãhãe nonkae tahen khan okoe do Isorakʼ sạjại iń khone ocokʼ daṛeakʼ, jemon uniyakʼ botoranakʼ edre aloe botor ocoyiń.

³⁵ Ona hoylen khan enḍekhan Isor begor botoraete kathań roṛkea, menkhan ńitokʼ ińakʼ oka dosa hoyakan onate iń do bạń daṛeakʼa.