Jobakʼ 8 - সান্তালী বাইবেল

Bildadakʼ pạhil galmarao

¹ Unre Suhia Bildad doe menkeda,

² “Am do ar tin hạbicʼ niạko katham roṛa? Amakʼ kathako do hoe bharḍo leka kana.

³ Isor do cetʼ hok upạrteye kạmikana? Sanam daṛeanicʼ do cetʼ ṭhikakʼ doe beṭhikeda?

⁴ Amren hopon ar hoponerako do khạṭige uni upạrteko kại akada, ona iạte kại reakʼ sạjại do onko tireye dohoakada.

⁵ Menkhan ahkaokʼ tulucʼ Isor ṭhen koejoṅme ar sanam daṛeanicʼ ṭhen nehõrokʼme,

⁶ am do khạṭi ar dhoromem tahen khan enḍekhan uni do ńitgeye beṅgetʼama ar amakʼ dhorom ṭhạ̃ire arhõe duṛupʼ ruạṛmea.

⁷ Amakʼ tayom daram dinko do nonka jo bahakʼtama unrem hudisa pạhilakʼ dosa do niạ khon bạṛicʼge tahẽkana.

⁸ “Laha piṛhiren hoṛko ṭhen kulijoṅme; ar onkoren hapṛamkoko cekaletʼ reakʼ khoj hataome.

⁹ Abo do hola mahnderren kangeabon ar cetʼge babon baḍaea, dhạrtire aboakʼ dinko do umul leka paromokʼ kana.

¹⁰ Onko ṭhen khon am do cecetʼakʼ ar solham ńama; ar onko okako baḍae onageko lạiyama.

¹¹ “Oda ot chaḍa pạṭiol do baṅ hara rakabokʼa; ar dakʼ begor pạṭiạl do baṅ moṛaokʼa.

¹² Hara rakabokʼ jokhecʼ onako ạuri gedokʼre, ar dakʼ bae ńamlere ona do ghãs khon hõ usạra tolmocʼ godokʼa.

¹³ Okoe Isorko hiṛińe onkoakʼ dosa do onkage hoyokʼa; okoe Isor bako botorae onkoakʼ as do onkage marao utạrokʼa.

¹⁴ Okoe cetanre uniye bhorsakʼ ona do baṅ keṭecʼa, ona biswạs do bindi ganakʼ leka kana.

¹⁵ Onareye ṭenḍarlen khan ona do rạpudokʼtaea, ar onareye sapʼ kajakokʼ khan enḍekhan ona do bae sapʼ ṭarhao daṛeakʼa.

¹⁶ Uni do siń cando reakʼ marsalte mitʼṭecʼ rosaṛ cara leka, bagwan reakʼ sanam jaegare uniyakʼ ḍạrko do pasnao akana.

¹⁷ Ona reakʼ rehetʼ do dhiri ḍạṅ beṛhaete pasnao akana; ar dhiri talare mitʼṭecʼ nirại ṭhạ̃iye ńamakada.

¹⁸ Menkhan tinre uniyakʼ ṭhạ̃i khone totʼ giḍi ocokʼa unre ona ṭhạ̃i do uni bae aṅgoceteye mena, ‘iń do tisge bạń ńelakatʼmea.’

¹⁹ Ńelme, inạ chaḍa uniyakʼ do jãhãn rạskạge bạnukʼa; ona otre do eṭakʼ eṭakʼ carako omonokʼa.

²⁰ “Bindusạn hoṛ do tisge Isor bae bạgi giḍiaea, se bạṛicʼko kạmikan hoṛkoakʼ ti do bae daṛe ocoya.

²¹ Ńitokʼ hõ amakʼ moca do landateye perejtama ar amakʼ luṭikin do hulạsteye perecʼmea.

²² Okoe ińko hirkhạwạń onko doko lajao ocokʼa; bạṛicʼkoakʼ tạmbu do ar baṅ tahena.”