Jobakʼ 7 - সান্তালী বাইবেল

¹ “Niạ dhạrtire manwa do ạḍi khaṭaokʼ lagaoaea, ar din mujuriko leka uni do dine ṭalaoa.

² Guti cetʼleka ạyubokʼ reakʼ koyokʼ hor akaeye tahen, ar din mujuri hõ cetʼleka acʼakʼ kuṛại lạgitʼe asokʼ,

³ onkage candoke cando ińre bin jo bahakʼ do paṛao akana; iń do ńindạke ńindạ eken dukiń ńameda.

⁴ Gitijokʼ jokhecʼ doń meneda, tinreń beretʼa? Menkhan ńindạ do jeleńokʼ kana, ar aṅga marsalokʼ hạbicʼ doń erseń torseń baṛaekana.

⁵ Hoṛmo do tejoko ar ghao reakʼ sondrokote esetʼ akantińạ; harta do oṛecʼ akantińạ ar garaṅdakʼ jorokʼkana.

⁶ Ińakʼ dinko do kicricʼ teteńakʼ mạku khon hõ usạrakʼkana; ar jãhãnakʼ begor astege ses godokʼkana.

⁷ “E Isor, ińakʼ jiwi baṛe disạitiń me noa do mitʼṭecʼ sahẽtʼ chaḍa ar cetʼge baṅkana; iń do suk reakʼ ar bạń ńel ńama.

⁸ Ińakʼ mẽtʼ do ar bae ńel ńameńa; am dom sendrayińạ, menkhan iń do ar bạń tahena.

⁹ Rimil cetʼleka chan adokʼkan, onkage Sheolte calakʼicʼ do bae ruạṛa.

¹⁰ Uni do acʼakʼ oṛakʼte ar bae ruạṛ hijukʼa; acʼakʼ jaegare hõ uni do bako disạyea.

¹¹ “Onate thir akan do ar bạń tahena. Ińakʼ mon reakʼ hasote kathań roṛa; ar haṛhatʼ jiwite ińakʼ dukiń lại sodora.

¹² Iń do cetʼ jalapuri se doreãoren danob kạnạń onate tạṅkhiyiń lạgitʼ horhokom dohoakatʼkoa?

¹³ Tinreń hudiseda ińakʼ aṭetʼ do jiwi raṛecʼe imạńa ar ińakʼ jạpitʼ do duke komaotińa,

¹⁴ unre aema lekan kukmukotem botor ocoyedeń kana, ar aema lekan cholkotem udạsedeń kana.

¹⁵ Onate niạ jaṅ hoṛmowante jiwetʼ tahen khon jãhãeye limbạtʼ gojeń onageń khojkea.

¹⁶ Ińakʼ jiwi doń hirkhạwakʼ kana; jaejug hạbicʼ jiwetʼ tahen do bạń khojkana. Iń do aṛakʼkạńme; Ińakʼ bahaokʼ din do thoṛagetińa.

¹⁷ “Manwa doe celekante unạkʼem maraṅedea, ar uni doe celekante onkam moneyae kana?

¹⁸ Din hilokʼ setakʼ jokhecʼ dom tolasede kana, ar jao ghuṛiyem biḍạu aṭkar edekana.

¹⁹ Iń khon eṭakʼ secʼ do cetʼ bam beṅgeda, ulidakʼ utʼ lạgitʼ hõ cetʼ somoe do bam imạńa?

²⁰ E manwaren horhoyicʼ, ińiń kại akatʼ khan enḍekhan onate amakʼ do cetʼtam. Amakʼ jos menkate do cedakʼem doho akadińạ? Iń do cetʼ amren bojhań hoyakana?

²¹ Am do cedakʼ ińakʼ dos ar kại bam ikạyetʼtińạ? Iń ma usạrage coṅ dhuṛire gitijokʼ hoyokʼtiń; am dom sendrayińạ, menkhan iń do bạń tahena.”