Jobakʼ 6 - সান্তালী বাইবেল

Jobakʼ roṛ ruạṛ

¹ Unre Job doe roṛ ruạṛkeda,

² “Ińakʼ kosṭo jodim soṅ daṛeakʼ khan, ińakʼ sanam harkhet jodi tulạtem tulạ daṛeakʼ khan,

³ enḍekhan khạṭige ona do gaṅga gitil reakʼ ojon khonhõ hamalkokʼa; ona iạte ińakʼ katha reakʼ jãhãn jhinge bạnukʼtińạ.

⁴ Sanam daṛeanicʼ reakʼ sar do ińre bitʼakana, ińakʼ jiwi do onako reakʼ bise jojom kana; Isorakʼ botoranakʼ kạmiko do iń upạrte sạr sạrte teṅgo akana.

⁵ Bir gadha do ghãse ńamle khan cetʼe raga, se busupʼe ńamle khan ḍaṅgra doe bhokraokʼa?

⁶ Sabakʼakʼ do cetʼ buluṅ begor jomogokʼgea, se bele reakʼ ponḍtetʼre cetʼ jãhãn sebel menakʼgea?

⁷ Iń do ona jojom baṅ sanań kana; iń ṭhen ona do liṭiyakʼ jomakʼ leka kana.

⁸ “Ah! ińakʼ nehõr jemon rukhiyạkʼ tiń, Isor do ińakʼ as jemone purạukạtiń,

⁹ iń doe talga tạuạgińma ar ti tiạrkateye gocʼ hodeńma!

¹⁰ Enḍekhan niạge jiwi raṛecʼ do hoyokʼtińạ, ar bin sahao haso talare hõ niạ rạskạge tahena, uni sonoticʼakʼ katha doń aṅgocgea.

¹¹ “Tạṅgi reakʼ jãhãn daṛege bạnukʼtińạ, ar as dohoy leka nonkan cetʼge bạnukʼtińạ, oneń tạṅgi akae tahen.

¹² Ińakʼ daṛe do cetʼ dhiri reakʼ daṛe kana? Hoṛmo do cetʼ pitạlte benao akantinạ?

¹³ Apnarte goṛowạń reakʼ daṛege bạnukʼtińạ; iń ṭhen khon ma jotowakʼge coṅ sạṅgiń akan.

¹⁴ “As chuṭạukʼ kan hoṛ do sanam daṛeanicʼ bae botorae kanrehõ, enhõ uniren gateko do unire pạtiạr tahen lek kanako.

¹⁵ Menkhan ińren gateko cetanre do ohoń bhorsa daṛelena; onko do nonkan ạtukʼ dakʼ lekanako one okte oktere bondokʼ kan arhõ okte oktere do gaḍa perecʼ cape rakabokʼ kan.

¹⁶ Borop ar him do lekʼkante ạtukʼ dakʼe boḍe ocoyeda ar daṛe idikʼ kana,

¹⁷ arhõ lolo din do ona ạṭukʼ dakʼ ańjedokʼ kana ar acʼakʼ hor khon chan adokʼ kana.

¹⁸ Ona horte senokʼkan hortenko do ona khonko sa calakʼ kana, ar onko do hahaṅkarreko sen adokʼ kana arko marao utạrokʼ kana.

¹⁹ Temaren hortenko do dakʼ reakʼko khojetʼa, Sebaren bepariko do askateko koyokʼ horeda.

²⁰ Onko do khạṭi akanko tahẽkan iạte kosṭoko ńameda; ar onḍe senkate doko as chuṭạukʼ kana.

²¹ Ape hõ onkage iń do cetʼge bape goṛo daṛeạńạ; ińakʼ botoranakʼ dosa ńelte ape hõpe toras akana.

²² Iń do cetʼ jãhãtis iń menakada, ‘jãhãnakʼ imạńpe, apeakʼ dhon-durib khon danạńpe,

²³ Bạirikoakʼ ti khon rukhiyạyińpe, ar okoeko cipạ edeńkan onko khon em chaḍaoińpe?’

²⁴ “Cetʼạńpe, iń do thir hape akaniń tahena; ar okareń bhul akatʼ ona baṛe udukʼạńpe.

²⁵ Hok reakʼ katha do daṛegea, menkhan apeakʼ reṭepeṭekʼre do jãhãn labge bạnukʼanaṅ.

²⁶ Ińakʼ kathare jãhãnakʼ dos sapʼ reakʼpe meneda? Ar as chuṭạu akan hoṛakʼ katha do hoe lekape hudiseda.

²⁷ Ape do ṭũạr amarko lạgitʼpe gulibãṭetʼkana ar gate do ạkhrińkope khojkana.

²⁸ Menkhan ńitokʼ do iń secʼ beṅgedpe, iń do ape samaṅre eṛe do bạń roṛa.

²⁹ Hudis ruạṛpe, behokko do alope hoyokʼa; arhõ hudispe, ente iń do ńithõ dhoromge minạńa.

³⁰ Ińakʼ alaṅre do cetʼ jãhãnakʼ behokakʼ menakʼa? Iń do cetʼ boge ar bạṛicʼ do bạń bujhạu akada?