Jobakʼ 5 - সান্তালী বাইবেল

¹ “Mase hohoeme, okoeye roṛ ruạṛama? Ar okoeṭakʼ serma goḍet ṭhen do goṛom khoja?

² Khĩs do bebujicʼ hoṛe ses utạrea ar hiskạ do lelhayicʼe gojea.

³ Bebujicʼ do rehedokʼ iń ńelakadea ar uniyakʼ oṛakʼ do sarapokʼ kana.

⁴ Uniren hoponko khạtirjoma do bako tahena; onko do bicạr ṭhạ̃irege jotowakʼko ada, onkoren rurukhiyạko do celege bako tahena.

⁵ Reṅgejokʼ hoṛ do akoakʼ phosolko joma, onko do jạnum tala khon hõ jomakʼko halaṅa; ar tetaṅetʼko do dhon-durib lạgitʼko ahkaokʼa.

⁶ Ot khon duk do baṅ oḍokokʼa, se jumi khon duk hõ baṅ janamokʼa.

⁷ Cetʼleka seṅgel do coṭ secʼ pạsirokʼ, onkage duk jom lạgitʼ manwa doe janamokʼ kana.

⁸ “Menkhan iń do Isorakʼ goṛogeń hataokea, ar uni ṭhen ińakʼ arjiń dohokea.

⁹ Uni do nonkan maraṅakʼkoe kạmiyeda one ona reakʼ khạndritetʼ do oho jokhalena; uni do nonkan hahaṛawakʼkoe kạmikana ona do tisge oho lekha cabalena.

¹⁰ Uni do dhạrtire jạṛi dakʼe emokʼ kana ar jumire dakʼe koleda.

¹¹ Nindhạn hoṛkoe usuletʼkoa; ar homor halaṅko do nirạiteye dohoyetʼkoa.

¹² Cạtur hoṛkoakʼ goṭawakʼ do bae jo baha ocowakʼ kana, onate onko do cetʼge baṅ hoyokʼ kantakoa.

¹³ Uni do ạkilanko cạture hudisetʼkoa, ar eṛekoakʼ phundire do baṅ jo bahakʼkana.

¹⁴ Siń marsalrege onko do ńut pheḍ hecʼako kana; ar tikin okte do ńindạ lekako hạtṛạu baṛaeyeda.

¹⁵ Uni do dharanakʼ alaṅ khon ṭũạr amarkoe bańcaoetʼkoa; ar daṛeankoakʼ ti khone rukhiyạyetʼkoa.

¹⁶ Ona iạte nandhan hoṛko doko asokʼkana ar behokakʼ do bond utạrokʼ kana.

¹⁷ “Bhạgangeae uni hoṛ, okoe do Isore sudhrạuede. Onate sanam daṛeanicʼakʼ ḍanṭao do alom nihạ̃ta,

¹⁸ ente uni doe ghạghạlgea, arhõ onae bedhaokakʼa; uni doe hạhạna, arhõ acʼakʼ titegeye bogea.

¹⁹ Turui goṭecʼ muhin khon uni doe rukhiyạmea, ar eae goṭecʼ muhinre hõ cetʼ khutige baṅ hoyokʼtama.

²⁰ Akalre uni do gujukʼ khone rukhiyạmea, ar lạṛhạire tarwaṛe reakʼ ghạl khone bańcaomea.

²¹ Alaṅ reakʼ hạn khon uni doe rukhiyạmea; ar muhin hecʼlenre am do bam botorokʼa.

²² Jarkhar ar akalre landa joṅme; ar bir janwarko do alom botorakoa.

²³ Amakʼ jumire jãhãn dhirige baṅ tahena; ar bir janwarko do bako hạn mea.

²⁴ Baḍaekakʼme, amakʼ tạmbu do nirạigea; amakʼ sompotti reakʼ hisạb hataole khan amakʼ do cetʼge baṅ loksan akantama.

²⁵ Amem baḍaea, amren do aema gidrạko hoyokʼtama ar amren hoponko do ṭạnḍi reakʼ ghãs lekako hoyokʼa.

²⁶ Cetʼleka oktere phosol rakabokʼ onkage purạ dinem bahaokʼa arem topa ocokʼa.

²⁷ “Ale do biḍạukatele ńel akada, noako do sạrigea; onate ańjomme ar amakʼ jionre kạmi lagaome.”