Jobakʼ 42 - সান্তালী বাইবেল

¹ Job do unre Probhu Isore metadea,

² “Ińiń baḍaea am do jotowakʼgem daṛeakʼa; amakʼ jãhãn goṭawakʼge baṅ akoṭ akana.

³ Am dom kuliyan tahẽkana, ‘uni doe okoe kana, one bin bujhạute solhawakʼe dapal okoyetʼkan?’ Niạ katha do sạrikana je, oka bạń bujhạu akatʼ ona babotre iń do kathań roṛleda; Ińakʼ lek do hahaṛawakʼkoge, okako bạń baḍaeakatʼ tahẽkan.

⁴ Amem menleda, ‘ńitokʼ do ańjomtińme, iń do kathań roṛa; iń do amiń kuklimea ar am dom roṛ ruạṛạńạ.’

⁵ Lahate ińakʼ lutur do am reaṅe ańjom akada, menkhan ńitokʼ do ińakʼ mẽtʼkin ame ńelketʼmea.

⁶ Onate okań men akatʼ ona do ńitokʼ iń chibaṅakʼ kana, ar dhuṛi ar torocʼre duṛupʼ kateń kastaokʼ kana.”

Ses katha

⁷ Job do niạko kathae roṛketʼ khan Probhu Isor do Timani Eliphase metadea, “ińren guti Job cetʼlekae menakatʼ am ar amren gateko do iń reakʼ ṭhikakʼ do bape roṛakada; ona iạte ape cetanre edrete pit caṛhao akantińạ.

⁸ Onate ńitokʼ eae goṭen ḍaṅgra ar eae goṭen bheḍa ạgukate ińren guti Job ṭhen senokʼpe ar apnar lạgitʼ jeredokʼ samaṅokʼakʼ samaṅpe. Ińren guti Job do ape lạgitʼe koejoṅa ar iń do onań ataṅtaea, apeakʼ lelhatetʼ leka jo do bạń emapea.”

⁹ Unre Timani Eliphas, Suhi Bildad ar Namathiạ Sophar do Probhu Isorakʼ katha lekako kạmikeda, ar Probhu Isor do Jobakʼ koejoṅe ańjomketʼtaea.

¹⁰ Job do acʼren gateko lạgitʼe koeketʼ khan Probhu Isor do Jobakʼ dhon dhuribe ruạṛkatʼtaea ar lahateakʼ khon bar dobṛae emadea.

¹¹ Uniren boeha ar miserako okoe do laha khonko orom akade tahẽkan onko sanamkoge uniyakʼ oṛakʼre hecʼkateko jom ńukeda. Ar Probhu Isor do uni cetanre okako duke ạguketʼ ona lạgitʼ jiwi raṛecʼko emadea. Onko do mimitʼ hoṛ thoṛa thuṛi ṭaka poesa ar mimitʼ goṭecʼ sona mundạmko emadea.

¹² Probhu Isor do Jobakʼ jion reakʼ pạhilteakʼ khon tayom teakʼge bạ̃ṛtiye ạsirbadatʼtaea. Uniren do gelpon hajar bhiḍi, meromko, turui hajar ũṭko, mitʼ hajar joṛ ḍaṅgra ar mitʼ hajar gadhako hoyentaea.

¹³ Uniyakʼ oṛakʼre eae koṛa hopon ar eae kuṛi hoponko janamena.

¹⁴ Uniren maraṅicʼ hoponerawakʼ ńutum do Jemima, dosaricʼ do Kesia ar huḍińicʼ hoponerawakʼ ńutum do Keren-Hapuk tahẽkana.

¹⁵ Jobren hoponerako leka ńelokʼte mońj kuṛi do disạmre ar bako tahẽkana. Onkoren apat do onkoren boehako sãote onko hõ jumiye hạṭińatʼkoa.

¹⁶ Inạ tayom Job do arhõ mitʼsae pongel bochor jiwetʼe tahẽkana. Uni do acʼren hopon ar hoponerako ar onkoren hoponko pon piṛhi hạbicʼko ńel tiyokʼledea.

¹⁷ Nonkate Job doe haṛamena ar purạte dinkoe bahaoketʼ tayome gocʼena.