Jobakʼ 41 - সান্তালী বাইবেল

¹ “Am do cetʼ bạ̃ṛsite Libiathonem rakapʼ daṛeaea, se baberte uniyakʼ alaṅem tol daṛeketaea?

² Am do cetʼ mũm nakol daṛekea, se bạ̃ṛsite uniyakʼ jambem pạtitapʼ daṛeketaea?

³ Uni do cetʼ am ṭhen dayae khoj boteja? Ar am tulucʼ cetʼ luhum suhume galmaraokea?

⁴ Jaejug amren guti hoyokʼ lạgitʼ uni do cetʼ am sãoteye bondobosa?

⁵ Cẽṛẽ tulucʼ cetʼ lekako enecʼ baṛae onkage cetʼ uni tulucʼem enecʼkokʼa se amren kuṛi gidrạko lạgitʼ hoṭokʼrem baberaea?

⁶ Jạilạko do cetʼ uni lạgitʼko dor dama? Ar bepariko talare cetʼ uniko hạṭińea?

⁷ Am do kũcte uniyakʼ harta ar kạhlikote uniyakʼ bohokʼem perecʼketaea?

⁸ Am do tite unim capo botecʼkea tobe lạṛhại disạime; ar alom onkaea.

⁹ Uni domone reakʼ joto asge ạuṛiyakʼgea; uni ńel torage hoṛ do dilko adtakoa.

¹⁰ Uni buskoye reakʼ dil do okoeyakʼge bạnukʼanaṅ; enḍekhan iń samaṅre okoeye teṅgo daṛekokʼa?

¹¹ Iń upạrte do okoeyakʼ dạbiteakʼ menakʼtaea, jemoniń em ruạṛkatae? Serma latarre menakʼakʼ jotowakʼge coṅ ińakʼ kan.

¹² “Libiathonakʼ hoṛmo hạṭińko reakʼ katha, ar uniyakʼ daṛe ar muṭhạn reakʼ kathań lạiya.

¹³ Uniyakʼ hoṛmo reakʼ harta do okoeye khal daṛeketaea? Okoe uniyakʼ aṅgrop doe sobokʼtapʼ daṛeketaea?

¹⁴ Uniyakʼ ḍaṭate perecʼ botoranakʼ mẽtʼãhã reakʼ silpiń do okoeye jhicʼ daṛekea?

¹⁵ Uniyakʼ dea reakʼ cũyạkʼ do pante akan ḍhal leka; jeretʼ mitʼ akan chap akawatʼ lekage

¹⁶ Ona do nonka sopor sopor menakʼa je, ona talate hoe hõ oho parom daṛelena.

¹⁷ Onako do mitʼṭecʼ sãote eṭakʼakʼ joṛao menakʼa; onako do jalatʼ uricʼ akana, ar baṅ begarokʼa.

¹⁸ Uniyakʼ ạchimre do marsale jhalkaoeda; uniyakʼ mẽtʼkin do aṅga marsal reakʼ pipnikin leka.

¹⁹ Uniyakʼ moca khon seṅgel reakʼ dhũạ oḍokokʼ kana; ar ona khon do oṭecʼ seṅgelkoge phurkạu oḍok hijukʼ kana.

²⁰ Jolokʼkan pạṭiạl ar heḍejokʼkan ṭukucʼ khon dhũạ oḍokokʼ leka uniyakʼ mũ khon dhũạ oḍokokʼ kana.

²¹ Uniyakʼ sahẽtʼte koela do salgaokʼ kana ar moca khon do seṅgel lepʼ oḍokokʼ kana.

²² Uniyakʼ tarenre do daṛe menakʼa; ar uni laha lahate do torasge enecʼ calakʼ kana.

²³ Uniyakʼ jelko do laṭkao mitʼakana; onako do unire dul mitʼ akana ar baṅge laṛaokʼa.

²⁴ Uniyakʼ kunḍi do dhiri leka keṭecʼgea, jante reakʼ latar dhiri lekage keṭecʼgea.

²⁵ Uniye beretʼlenre daṛeanko doko lukutʼ lukudokʼa; onko do botorteko pạcokʼa.

²⁶ Tarwaṛeteye joslenre hõ uni do bae seṭejokʼa; borlom, kũch ar ạ̃pạ̃ṛĩkote hõ bae cekakʼa.

²⁷ Mẽṛhẽtʼ do lanḍha lekae metakʼ kana ar pitạl do sea akan kaṭge.

²⁸ Jãhãn ạ̃pạ̃ṛĩge uni do bako laga ńir daṛeaea; ar bạṭul reakʼ dhiri hõ uni ṭhen do cetʼge baṅkana.

²⁹ Bạṭul do jạ̃ṛĩ kaḍecʼ leka bujhạukʼ kana; ar borlom reakʼ sohor saḍe doe landawakʼ kana.

³⁰ Uniyakʼ latar hĩs do laser kelhatʼ leka; ar losotʼreye sayaṛ kana lelen paṭa leka.

³¹ Jalapuri do celaṅ reakʼ dakʼ lekageye heḍecʼ ocoyeda ar doreão do ojokʼ sunum lekage.

³² Ar ona tayomte do jhalkaokʼ kan hore bạgiyakʼ kana; athantar do ponḍ upʼ lekage hudisokʼ kana.

³³ Dhạrtire do uni lekanicʼ celege bạnuiya; uni do bin botoricʼgeye sirjạu akana.

³⁴ Mitʼke mitʼ usulakʼgeye beṅgetʼakʼ kana; uni do sanam dhomokʼ janwarko cetanren raj kanae.”