Jobakʼ 40 - সান্তালী বাইবেল

¹ Probhu Isor do Job arhõe metadea,

² “Sanam daṛean tulucʼ okoeye reṭepeṭekʼkan uni do cetʼ uniye sudhrạuea? Isor tulucʼ okoeye reṭepeṭekʼkan unige roṛ ruạṛe emokʼma.”

³ Unre Job do Probhu Isore roṛ ruạṛadea,

⁴ “Iń doń be lekgea, iń do cekateń roṛ ruạṛama? Iń do mocayiń tobetʼ hape akatʼtińạ.

⁵ Iń do mitʼ dhaoiń roṛakada, menkhan roṛ ruạṛ reakʼ cetʼge bạnukʼtińạ; dosar dhaoiń roṛakada, menkhan ar cetʼge bạń roṛa.”

⁶ Unre Probhu Isor do birbão khon Jobe metadea,

⁷ “Herel hoṛ leka ḍanḍa paṭhe keṭejokʼme; iń do amiń kulimea arem roṛ ruạṛạńạ.

⁸ Am do cetʼ ińakʼ bicạrem bhoṭetʼtińa? Ińgem dusiyediń kante cetʼ am do dhoromem ṭarhaokʼ kana?

⁹ Amakʼ do cetʼ Isor leka daṛe menakʼtama? Uniyakʼ aṛaṅ lekam hạnḍrạukʼ daṛeakʼa?

¹⁰ Enḍekhan ńitokʼ do ṭhosok ar mante sajokʼme, mạhima ar ṭhonok horokʼ joṅme.

¹¹ Amakʼ botoranakʼ edre baṛe bumbhạu oḍokme; ar mitʼke mitʼ bạḍại hoṛ beṅgetʼ pheḍakome ar kiṛdhum ocokome.

¹² Mitʼke mitʼ bạḍại hoṛ beṅgetʼ pheḍakome ar copotʼ ocokom; ar bedhoromko do akoakʼ ṭhạ̃irege lebetʼ gańjaokom.

¹³ Onko sanamkoge dhuṛire topa oko dohokom; ar mẽtʼãhã do patalre tolkatakom.

¹⁴ Enḍekhan iń do amiń aṅgocmea, amakʼ daṛege am doe rukhiyạmea.

¹⁵ “Dakʼ sadom beṅgetʼaeme, am sãote uni hõń benao akadea; uni do ḍaṅgra leka ghãse joma.

¹⁶ Uniyakʼ daṛe do ḍanḍarege! Ar lacʼ reakʼ sirkoge uniyakʼ jor do!

¹⁷ Debdạru dare lekae canḍbol do keṭecʼgetaea; dhaṛa reakʼ paṭ sirko hõ baj mitʼgetaea.

¹⁸ Uniyakʼ jaṅko do pitạl reakʼ nuli leka, ar pańjra reakʼ jaṅko do mẽṛhẽtʼ reakʼ ṭheṅga leka.

¹⁹ Isorakʼ sirjạuakʼko modre uni doe sorosicʼ kana; uniren sisirjạuicʼge eken uniye gocʼ daṛeaea.

²⁰ Burure oka janamokʼ onage uni doe jomeda, ar sanam bir janwarko do onḍegeko enecʼ joṅ kana.

²¹ Poraini jhạuạ latarre uni doe burum akana; ar suṛạ gajaṛ ar dalahireye danaṅ akana.

²² Poraini jhạuạko doko umul aḍekana; soḍokʼ reakʼ bạisi dareko doko esetʼ ạcur edekana.

²³ Gaḍare ḍubạ dakʼ hecʼlenre hõ uni do bae botorokʼ kana; jordan gaḍa reakʼ dakʼ mocare gad gadaoaekanre hõ uni doe khạtirjomagea.

²⁴ Uniyakʼ disạ daramre uni do cetʼ jãhãeye sapʼ daṛekea? Se pạsi baberte jãhãe nạthui phuṛạu daṛeketaea?