Jobakʼ 4 - সান্তালী বাইবেল

Eliphasakʼ pạhil katha ( 4.1—14.22 )

¹ Niạ katha ańjomkate Timani Eliphas doe roṛ ruạṛkeda,

² “Jãhãege am sãote kathae roṛ enḍekhan am do cetʼem ạṛisokʼa? Menkhan katha begor roṛte cetʼ jãhãeye tahẽ daṛeakʼa?

³ Hudiskate ńelme, tinạkʼ hoṛ do sopolham emakatʼkoa ar lạbṛukʼ ti dom keṭecʼ ocoakada.

⁴ Okoe jion reakʼ horreko tohotʼ akan onko do amakʼ kathare goṛoko ńamakada; ar lạbṛukʼ gunṭhikom keṭecʼ ocoakatʼtakoa.

⁵ Menkhan ńitokʼ do am cetanre kosṭo hecʼakana, ar am dom keklesetʼ akana; duk do ame ghạl akatʼmea ar am dom as chuṭạu akana.

⁶ Isor jem botorae kan ona reakʼ bhorsa do cetʼ bam ńameda? Amem bin dusạnge onare cetʼ as do bạnukʼtama?

⁷ “Hudiskate ńelme, bin dusạn hoekate jãhãeye marao akana? Dhorom hoṛko do cetʼ jãhãreko ses utạr akana?

⁸ Ińiń ńelakada okoe bạṛicʼakʼko cas ar duk reakʼ itạko er onko do onakoge irjoṅa.

⁹ Isorakʼ sahẽtʼte onko doko marao utạrokʼa ar uniyakʼ edre reakʼ oṅteko mohor meṭao utạrokʼa.

¹⁰ Dhạcri kulakʼ hạnḍrạukʼ ar taras, ar takʼrasicʼakʼ taras hõ thirokʼ kana.

¹¹ Sikạr bako ńamle khan dhạcri kul doko gujukʼa, ar kul hopon doko chirchạturokʼa.

¹² “Mitʼṭecʼ katha iń ṭhen hape hapete hecʼena, ar ona khae khoe do ińakʼ luturre bajaoena.

¹³ Manwa do ńindạ tinre galasaṅe jạpida unre kukmũteń akbakaokʼ kana;

¹⁴ botor ariń lukutʼ lukudokʼ kana, ińakʼ jaṅko do dal dalaokʼkantińạ.

¹⁵ Mitʼṭen jiu do iń samaṅteye sen paromena, ar ińakʼ hoṛmo do rumui rumuiyentińạ.

¹⁶ Uni jiu doe teṅgo hapeyena, menkhan cetʼ lekan boron kana ona do bạń bujhạu daṛeada. Ińakʼ mẽtʼãha samaṅre mitʼṭecʼ cetʼ coṅ teṅgoyena, ar ạḍi bại bạite noa aṛaṅiń ańjomkeda,

¹⁷ ‘manwa do cetʼ Isorakʼ mẽtʼãhãre dhorome hoedaṛeakʼa? Uniren sisirjạuicʼakʼ mẽtʼre cetʼ saphae hoedaṛeakʼa?

¹⁸ Isor do acʼren gutiko hõ bae bhorsa akokana ar acʼren serma goḍetko hõ bhule ńametʼtakoa,

¹⁹ tobe okoe hasa oṛakʼreko tahenkan onkoakʼ rehetʼtetʼ do dhuṛi kana, tejoko leka okoeko lebetʼ gańjao ocokʼkan, onko do Isorakʼ mẽtʼãhãre artetʼge dusiko hoyokʼa!

²⁰ Setakʼ khon ạyupʼ hạbicʼtegeko chir chạturokʼ kana, ar mẽtʼ danaṅrege onko doko marao utạrokʼ kana.

²¹ Onkoakʼ jotowakʼ do tạmbu baber leka racakʼ topakʼ ocokʼtakoa, ar onko do bebujko lekateko gujukʼa.’