Jobakʼ 39 - সান্তালী বাইবেল

¹ “Bururen meromakʼ busạgokʼ okte dom baḍaegea? Ar jel eṅgako bedonokʼ dom ńelakada?

² Onkoakʼ lacʼre tinạkʼ dinko tahen ona dom lekha akada? Onkoakʼ janam okte dom baḍaegetakoa?

³ Onko do burumkate hoponko busạkʼetʼkoa ar busạkʼ reakʼ bedon do cabakʼ kantakoa.

⁴ Onkoren hoponko doko harakʼ kana ar khulạ jaegareko daṛe idikʼ kana; onko do eṅgat ṭhen khonko calakʼ kana, ar bako ruạṛ kana.

⁵ “Bir gadha do okoe sạdhine aṛakʼ akawadea? Okoe uniyakʼ tonol doe raṛa akatʼtaea?

⁶ Iń do hahaṅkar ṭhạ̃i iń emakawadea uniyakʼ oṛakʼ mente, ar judạ judạ jaegare tahen oṛakʼ hõń emakawadea.

⁷ Uni do nagraha reakʼ gulmal bae kusiyakʼ kana, ar sagaṛ lagayicʼakʼ ãṭ aṛaṅ hõ uni do bae ańjomeda.

⁸ Uniyakʼ ạtiń jaega do buru ṭoṭhakore; onḍe uni do hạriạṛakʼkoe sendra joṅ kana.

⁹ “Birren sanḍ ḍaṅgra do am ṭhen golam khaṭaokʼe rạjikʼgea? Uni do cetʼ amakʼ goṛa ḍakaḍakʼ ṭhene tahẽ aṅgakʼa?

¹⁰ Arãṛ reakʼ baberte nahel reakʼ gaḍarem tol daṛekea? Uni do am lạgitʼ cetʼ lodamreye caskea?

¹¹ Uniyakʼ asambheṛ daṛe iạte uni cetanrem bhorsakʼa? Amakʼ hamal kạmi do cetʼ unim kạmi ocoaea?

¹² Pạtiạuae kangeam ruạṛ hecʼamae mente, ar khạrạire anajkoe samṭaoama mente?

¹³ “Ũṭ cẽṛẽ do rạskạte phạ̃kṛạ̃ke ḍhapʼ ḍhapʼetʼaea, menkhan cetʼ ona do dulạṛ reakʼ phạ̃kṛạ̃kʼ ar il kana?

¹⁴ Ũṭ cẽṛẽ do otreko bele giḍikakʼ kana ar hasarege ona do urgumokʼ kana;

¹⁵ Bae hudiseda ona do jaṅgakote lebetʼ gejerokʼtaea mente se jãhãn bir janwarkoakʼ jaṅgate onako do kolsa posagokʼa.

¹⁶ Acʼren hoponko sãote begor mãyãteye beohara, baṅma onko do acʼrenko baṅkana; uni do hudis hõ bae hudisa, acʼakʼ khaṭaokʼakʼ do ạuṛiyakʼ hoedaṛeakʼtaea mente,

¹⁷ ente Isor do ạkil bae em akawadea se bujhạu daṛe hõ bae em akawadea.

¹⁸ Enhõ uni do tinre phạ̃kṛạ̃kʼe ḍhap ḍhapʼetʼtaea unre sadom ar uniren aswariye landa ạkin kana.

¹⁹ “Sadom do cetʼ amge daṛem emakawadea? Hoṭokʼ reakʼ dhạcri do cetʼ amgem emakawadea?

²⁰ Pohoko leka am dom don ocoyedea? Uniyakʼ ṭhonok hinhinạukʼ do torasakʼ kangea.

²¹ Uni doe paskayeda ar acʼakʼ daṛetegeye rạskạkʼ kana ar lạṛhại jokhecʼ do akromon lạgitʼe lahakʼ kana.

²² Uni do torase landawakʼ kana, ar bae botorokʼ kana; tarwaṛe samaṅ khon uni do bae comkaokʼ kana.

²³ Uniyakʼ sar dohowakʼ ṭhoṅga do rokoṛ rokoṛokʼ kana, borsa ar borlom hõ jhak jhakoakʼ kantaea.

²⁴ Uni do khaṭpaṭao ar kãucạ kạuci ote lakopʼ idiyeda, ar sakwa saḍelenre bae teṅgo thir daṛeakʼ kana.

²⁵ Sakwa reakʼ saḍe soṅge soṅgete uni do muteye saḍeyeda; ar sạṅgiń khon lạṛhại reakʼ base ńametʼ kana uni do subedarkoakʼ hạnḍrạu ar lạṛhại reakʼ saḍegeye ańjomeda.

²⁶ Amakʼ budte cetʼ ṭirmuṭi cẽṛẽ doe uḍạukʼ kana ar dạkhin secʼ calakʼ lạgitʼ phạ̃kṛạ̃kʼkine laplapayeda?

²⁷ Amakʼ hukumtege cetʼ pajhaṛ do coṭreye manḍrao baṛae kana ar usul jaegare acʼakʼ tukại benaoeda?

²⁸ Uni do usul cạṭạini cetanreye basokʼ kana ar ńindạ do ona reakʼ cuṛạreye tahenkana. Ona cuṛạ kangea uniyakʼ gaṛ do.

²⁹ Onḍe khon uni do jomakʼe sendrayeda; uniyakʼ mẽtʼ do sạṅgiń khon sikạre ńel ńameda.

³⁰ Uniren hoponko do mãyãmreko jembedokʼ kana; ar jãhãrege gocʼko tahen onḍege uni doe tahẽnkana.”