Jobakʼ 38 - সান্তালী বাইবেল

Probhu Isorakʼ katha

¹ Unre Probhu Isor do birbão hoe khon Jobe roṛ ruạṛadea. Uniye menkeda,

² “Okoe kanae uni do, one uni bin bujan reakʼ kathate ińakʼ goṭawakʼteye tạkijokʼ kan?

³ Am do herel leka ḍanḍa paṭheytam; iń do amiń kulimea arem roṛ ruạṛạńạ.

⁴ Dhạrti reakʼ rehetʼ iń benao jokhecʼ am do okarem tahẽkana? Amakʼ bud menakʼ khan enḍekhan lạiyạńme.

⁵ Amem baḍaea ona reakʼ jokha baber do okoeye bandhao akada? Ar okoe ona cetante jokha baber doe ticʼakada?

⁶ Cetʼ cetanre dhạrti reakʼ tham khunṭiko do bitʼ ṭarhao akana? Uniyakʼ konac reakʼ dhiri do okoeye bạisại akada?

⁷ Unre setakʼren ipilko do mitʼ sãoteko sereńleda ar serma goḍetko do rạskạteko anḍoṛleda.

⁸ “Jalapuri do tinre dhạrti reakʼ kukhi khon oḍok hecʼlena unre duạr reakʼ kapaṭ do okoeye siń esetʼleda?

⁹ Unre rimil do uniyakʼ oyonakʼ iń hoyocoleda, ar kaṛaṅ kucạṅ ńutre gendrecʼteń bedhaoledea.

¹⁰ Ińge ona reakʼ simạ doń ṭhik doholeda; ona reakʼ kapaṭ ar huṛkạṛkoń lagaoada.

¹¹ Ińiń menleda, ‘nonḍe hạbicʼgem hijukʼa, ar laha secʼ do baṅ; nonḍege amakʼ dhomok ḍheoko do thirokʼtama.

¹² “Am do jãhãtis setakʼem hukum akawadea se aṅga marsal do uniyakʼ horem udukʼ akawadea,

¹³ jemon uni do pirthimi reakʼ ańcar sapʼkate bạṛicʼko onḍe khone koṭa ńur daṛeako?

¹⁴ Hasare chapkate cetʼ leka ona do pheraokʼkan, onkage siń reakʼ marsal do buru boṭkocʼko kicricʼ lekae bhańj ocoyeda.

¹⁵ Bạṛicʼ hoṛkoakʼ marsal doe ĩṛĩcʼ ocoyeda, ar onkoakʼ epel akatʼ ti do rạpudokʼ kana.

¹⁶ “Jalapuri reakʼ jharnako ṭhen cetʼem bolo akana, se doreão reakʼ tulirem dãṛã akada?

¹⁷ Moron reakʼ duạrako dom ńel ocoakana? Ona ńut reakʼ jaega do cetʼem ńelakada?

¹⁸ Prithimi reakʼ phaelaotetʼem bujhạu tiyạkʼ akada? Ar niạko reakʼem baḍae khan ma lạiyạńme.

¹⁹ “Marsal thamgạḍikʼ ṭhạ̃i senakʼ hor do okare menakʼa? Ar ńut reakʼ tahen jaega hõ okare menakʼa?

²⁰ Am do cetʼ onkoakʼ oṛakʼte onkoakʼ tahen ṭhạ̃ite onkom idi daṛeakoa? Onkoakʼ oṛakʼ calakʼ reakʼ hor do cetʼem baḍaegea?

²¹ Am do khạṭigem baḍaea, ente unrem janam akan tahẽkana. Ar amakʼ do ḍher umer hoyakan tama.

²² “Am do cetʼ him reakʼ murạirem bolo akana se arel reakʼ murạikom ńel akada?

²³ Onako do gạr jokhecʼ lạgitʼ iń jogao dohoakada, ona do khanḍa khạnḍi ar lạṛhại reakʼ din lạgitʼ iń jogao dohoakada.

²⁴ Oka ṭhạ̃i khon marsal bamberokʼ, se oka khon pirthimire purub reakʼ hoe hijukʼ ona ṭhạ̃i do okare menakʼa?

²⁵ Jhomor dakʼ ar huḍur bijli lạgitʼ do okoeye hor akada,

²⁶ jemon hoṛ bạnukʼko disạmre dakʼe jạṛi, one hahaṅkar jaegare celege bako tahen onḍeye dag.

²⁷ Jemon ujạṛakʼ jarkhar jaegakoe tirpit ocoy, ar onḍe do ghãs janamokʼ?

²⁸ Jạṛi dakʼren apat do cetʼ menaegea? Sisir dakʼ reakʼ ṭhopʼ do okoeye janam ocoakada?

²⁹ Okoeyakʼ kukhi khon him do hijukʼ kana? Ar serma reakʼ rataṅ do okoeye janam ocoakada?

³⁰ Dakʼ do dhiri leka saṭkaokʼ kana, Ar doreão reakʼ cetantetʼ do sạkidokʼ kana.

³¹ “Sorenko reakʼ cumkạkʼ ipil dom tol doho daṛekekoa? Se arãṛ lalakʼko reakʼ thokem jhiṅgạl saṅgal daṛekea?

³² Manḍer ipilko do cetʼ okte okterem ạyur oḍok daṛekekoa? Buḍhi parkom ar ona soṅgetenko do cetʼem tiyạkʼ oḍok daṛekekoa?

³³ Am do cetʼ serma reakʼ ạn ạrikom baḍaegea? Dhạrtire cetʼ ona reakʼ ạn ạrikom bandhao daṛekea?

³⁴ “Am do cetʼ rimil hạbicʼ amakʼ aṛaṅem rakapʼ ocodaṛeakʼa jemon jạṛi dakʼ ḍher jhomore ãṛgoam?

³⁵ Bijli do cetʼ acʼakʼ hortem kol daṛekea? Uni do cetʼ noae metama, ‘nonḍege minạńa mente’?

³⁶ Kạriḍaṅ rimilkore ạkil do okoeye ematʼa, ar kuṛhạkore buj hõ okoeye emakawada?

³⁷ Budte okoe rimil doe lekha daṛeakʼa? Ar serma reakʼ kanḍa do okoeye dũṛũcʼ daṛekea,

³⁸ jemon dhuṛiko laṭkao midokʼte ḍhelakko hõ jemṭhe midokʼ kan?

^39-40 “Dhạcri kul do tinre gaṛreye giticʼ tahena se gajaṛre tãṛãkʼ akane tahena, unre kul eṅga do cetʼ amgem sendra gocʼ ạguae kana ar reṅgecʼ jokhecʼ dhạcri kul do jomakʼem emae kana?

⁴¹ Bhonḍa kạhuren hoponko tinre Isor ṭhenko rakʼeda ar jomakʼ lạgitʼ hante nateko ạcur baṛaekana, unre okoe onko do jomakʼe kulạu ako kana?