Jobakʼ 37 - সান্তালী বাইবেল

¹ “Iń do botorteń thar tharaokʼ kana ińakʼ ontor do dhak dhakaokʼ kantińạ.

² Ańjompe, uniyakʼ aṛaṅ reakʼ gondraokʼ; uniyakʼ moca khon oka saḍe oḍokokʼkan ona ańjompe.

³ Goṭa serma latarre ar dhạrti reakʼ mucạtʼ simạ hạbicʼ uniyakʼ bijli do malkaokʼ kana.

⁴ Ona tayom uniyakʼ aṛaṅ do hạnḍrạukʼtaea; huḍuretʼ kanae mahatto reakʼ aṛaṅtae. Acʼakʼ aṛaṅ ańjomlentaere, bijli malkaokʼ do bae akoṭ ruạṛeda.

⁵ Isor do hahaṛageye aṛaṅeda; uni do napṛakʼakʼkoe kạmikana one oka do babo bujhạu daṛeakʼkan.

⁶ Ente him doe metakʼ kana, ‘pirthimire ńurokʼme,’ Ar dakʼ doe metakʼ kana, ‘jhomorate dagme.’

⁷ Mitʼke mitʼ hoṛ acʼakʼ kạmi khone thirakana, jemon sanam manwa do uniyakʼ kạmi reaṅko baḍae daṛeakʼ.

⁸ Unre janwarko do danderteko bolokʼa; ar khorloṅkoreko mạnḍiạukʼa.

⁹ Birbao hoe do acʼakʼ oṛakʼ khone oḍok hijukʼa, ar rabaṅ do hoete oṭaṅ hijukʼ kana.

¹⁰ Isorakʼ sahẽtʼ khon borop do janamokʼ kana ar phaelao dakʼ do sạkitʼ keṭejokʼ kana.

¹¹ Uni do dạriạ rimilkore dakʼe perecʼeda; ar bijli do rimil bhitriteye calaoetʼ kana.

¹² Uniyakʼ hukumte rimilko do ạcur baṛaekana, uniyakʼ ạcurte ona do goṭa dhạrti ạcur baṛaekana.

¹³ Manwa sạjại emako lạgitʼ se uniyakʼ dhạrtire dakʼ emakʼ lạgitʼ, se acʼakʼ dulạṛ udug lạgitʼ uni do jạṛi dakʼe emetʼ kana.

¹⁴ “E Job, noa luturakʼme; teṅgo thirkate Isorakʼ hahaṛa kạmi reakʼ katha moneyakʼme.

¹⁵ Baḍaeam cetʼ leka Isor do rimile ḍanṭaoeda ar cetʼ leka bijliko doe malkao ocoyeda?

¹⁶ Baḍaeam cekate rimilko do sepeń ṭarhao akana? Purạ puri bidiạwanicʼ reakʼ hahaṛa kạmikoge?

¹⁷ Dạkhin reakʼ hoe tinre disạmre guṛumokʼ kana unre amakʼ kicricʼko do urgumem bujhạueda.

¹⁸ Chańcre dulakʼ ạrsi leka keṭecʼakʼ okaṭakʼ rimil ona do cetʼ Isor sãotem pasnao daṛeakʼa?

¹⁹ “Lạiyaleme uni cetʼle metaea mente; alele bebujgete aleakʼ katha do bale baḍae oco daṛeae kana.

²⁰ Cetʼ unile lạiyaea, ińiń roṛa mente; jãhãe manwae khojkea, utʼ ocokʼae mente?

²¹ Hoete rimil saphakate siń cando tinreye jhalkaokʼ kana unre manwa do uni secʼ bako beṅgetʼ daṛeakʼa.

²² Utạr secʼ khon sonali ṭhonok do hijukʼ kana; uni beṛhaete botoranakʼ ṭhonok ńelokʼkana.

²³ Sanam daṛeanicʼ do babo ńam daṛeaea; daṛe ar hokre uni doe maraṅgea, asambheṛ dhorom iạte bae santaoa.

²⁴ Ona iạte manwa do uniko botorae kana; ar okoe apnarte ạkilanko hudisotʼkan onko do bae beṅgetʼ ako kana.”