Jobakʼ 36 - সান্তালী বাইবেল

¹ Elihu do arhoe roṛ idikeda,

² “Isor ńutumte iń do arhõ roṛteakʼ menakʼtińạ; ar thoṛa sahao hataṛme, adoń jạhirama.

³ Iń do ḍher sạṅgiń khon ạkiliń hameṭ akawana; ińren sisirjạuicʼ do dhorom menteń sạbudea.

⁴ Sạri kathageń roṛetʼa, ińakʼ kathare eṛeakʼ do bạnukʼa; am samaṅre ạkilte perecʼ mitʼ hoṛ menaea.

⁵ “Isor doe jorangea, menkhan manwa do bae nihạ̃tetʼkoa; acʼakʼ buj reakʼ daṛereye jorangea.

⁶ Uni do dusṭạmiko jiwetʼ bae dohoyetʼkoa menkhan okoeko santao ocokʼkan onko do hok reakʼe bicạretʼtakoa.

⁷ Dhorom hoṛko khon acʼakʼ mẽtʼãhã do bae ocokʼeda; uni do rapajko sãote siṅghạsonre onkoe duṛupʼetʼkoa ar jaejug lạgitʼe usul ocoyetʼkoa.

⁸ Menkhan hoṛ do kại iạte sikṛiteko tol ocokʼ kana ar duk reakʼ baberte hõko tol ocokʼ kana,

⁹ uni do onkoakʼ kạmiko ar ghạṭkoe udukʼako kana, cetʼleka gorbokʼ tulucʼko kạiyetʼkana mente.

¹⁰ Uni do sudhrạukʼ lạgitʼ sopolhae emakokana ar bạṛicʼ khon mon ạcur lạgitʼe hukumako kana.

¹¹ Onko do uniyakʼ bataotaete uniko sewawae, enḍekhan onkoakʼ sarecʼ jion do bhạlạiteko khemaoa ar bochorko do suktege.

¹² Menkhan onko bako ańjom, enḍekhan tarwaṛeteko marao ocokʼa ar bebuj lekako gujukʼa.

¹³ “Isor baṅ botorae hoṛ do raṅgaoko dohoyeda; uniye tolleko khan hõ goṛo ńam lạgitʼ do bako guhera.

¹⁴ Juạn tahen okterege onko doko gujukʼa, ar mundilren herel kusumbi talaregeko gujukʼa.

¹⁵ Nacarko do akoakʼ nacar dosa hoteteye rukhiyạyetʼkoa ar onkoakʼ duk hotetege onkoakʼ lutur doe jhicʼetʼtakoa.

¹⁶ “Uni do kosṭo tala khon oḍok ạgumeye khojkana; ar nonkan phaelao ṭhạ̃iteye idimea okare jãhãn tạkicʼakʼge baṅ tahen. Onḍe amakʼ ṭebil do bhage bhage jomakʼte perecʼ tahena.

¹⁷ Menkhan ńitokʼ do bedhorom hoṛkoakʼ bicạrtem perecʼgea; onate sạjại ar hok reakʼ bicạrkine sapʼakatʼmea.

¹⁸ Men sontorokʼme amakʼ raṅgao iạte amakʼ dhon-durib bhul horte aloe bulạu idime; ar okaṭakʼem bhul akatʼ ona do bạṛicʼ horte aloe ḍheka idimema.

¹⁹ Amakʼ dhon-durib se amakʼ sanam ektiạriko do cetʼ duk khone rukhiyạ daṛeama?

²⁰ Ona ńindạ reakʼ do alom asokʼa ona jokhecʼ hoṛ doko gujukʼa.

²¹ Sontor akae tahenme, bạṛicʼ secʼ alom ạcurokʼa, ente kosṭo khon bạṛicʼakʼgem bachao akawana.

²² “Isorakʼ daṛe do maraṅgea. Uni lekan cecetʼ icʼ do ar okoe menaea?

²³ Okoe uni doe sudhrạu daṛekea se uniye men daṛekea, ‘am dom behok akada?’

²⁴ Uniyakʼ kạmi reakʼ sarhao do alom hiṛińa; sereń talatege coṅ manwa ma uniyakʼ kạmiye sarhaoetʼtae.

²⁵ Sanam manwa do uniyakʼ kạmiko ńeletʼkana, menkhan onko do sạṅgiń khonge onako ạribạndhiyeda.

²⁶ Isor doe maraṅgea menkhan abo do babon bujhạu orom daṛeae kana. Uniyakʼ umer baṅ tinạkʼ ona do ohoge bon baḍae daṛelea.

²⁷ “Uni do dakʼ reakʼ ṭhopkoe or rakapʼeda, uni do kuṛhạ khon dakʼe cuạu oḍokeda.

²⁸ Rimil do onae upʼ gotʼkakʼ kana, ar manwa cetanre jạṛi dakʼ do ńurokʼkana.

²⁹ Okoeye bujhạu daṛekea cetʼlekate uni do rimile pasnao akada? Se uniyakʼ tahen ṭhạ̃i khone huḍur ocoyeda?

³⁰ Uni do acʼ beṛhaete kuṛhạye pasnaoeda ar buruko reakʼ muthnikoe dapaleda.

³¹ Noakote uni do jạt jạtrenkoe bicạretʼkoa ar asambheṛ jomakʼe emako kana.

³² Uni do acʼakʼ tite bijliye sapʼetʼkana ar nisạnre jhãp emokʼ lạgitʼ onae hukumakʼkana.

³³ Sanḍ do uni reakʼe jạhiretʼkana; one uni ghạṭ upạrte raṅgaoteye jaljalaokʼkan.