Jobakʼ 35 - সান্তালী বাইবেল

¹ Ona tayom Elihuye menkeda,

² “Amem meneda Isor samaṅre am dom miridosgea, ona katha do cetʼ ṭhikgem hudisetʼ kana?

³ Am do unim metaekana, ‘noate ińakʼ lab do cetʼ? Bạń ghạṭ akatʼ khan iń do cetʼ onań ńama?’

⁴ “Iń do am ar amren gateko niạ roṛ ruạṛakoń khojkana.

⁵ Serma secʼ beṅgedpe ar; ńelpe, rimil do tinạkʼ coṭre menakʼa mente.

⁶ Amem kại lekhan Isorakʼ do cetʼ jãhãnakʼ hoyokʼtaea? Amakʼ ghạṭko ḍherlenre hõ uniyakʼ baṅ cetʼ cekakʼtae?

⁷ Miridosem hoylen khan uniyakʼ do cetʼ jãhãn upkạr hoyokʼtaea? Amakʼ ti khon uni do cetʼge bae khojkana.

⁸ Amakʼ dusṭạmi do eken manwawakʼgeye khutiya. Ar amakʼ dhorom do eken onkogeye bhạlạikoa.

⁹ “Jor julumko iạte hoṛko doko rakʼetʼkana; ar daṛeankoakʼ ti khon rukhiyạ ńam lạgitʼko nehõrokʼ kana.

¹⁰ Menkhan okoehõ bako meneda, ‘ińren sisirjạuicʼ Isor do okare menaea, okoe do ńindạ jokhecʼ rạskạ sereńe danạńkan?

¹¹ Dhạrtiren janwarko khon uni do aboge ḍher sikhnạte emabon kana ar coṭren cẽṛẽko khon ḍherge ạkile dan abon kana.’

¹² Hoṛko tinreko rakʼae kana unre uni do bae ańjometʼtakoa, ente onko do bạḍại ar dusṭạmiteko perecʼgea.

¹³ Onkoakʼ koejoṅre jãhãn labge bạnukʼa, ente Isor do ona bae ańjomtakoa; sanam daṛeanicʼ do mone hõ bae moneyako kana.

¹⁴ Am dom meneda, uni bam ńel ńame kana, amakʼ mambla do uni samaṅrege menakʼa, ar ona reakʼ bicạr lạgitʼem ńel hohorkana.

¹⁵ Am do arhõm meneda, uni do edrete sạjại bae emokʼa ar dusṭạmi secʼ do beṅgetʼ hõ bae beṅgeda.

¹⁶ Ona iạte Job do ạuṛiyakʼ kathae roṛeda; uni do begor baḍaete aema kathae roṛetʼkana.”