Jobakʼ 34 - সান্তালী বাইবেল

¹ Ona tayom Elihuye menkeda,

² “E ạkilan hoṛko, ińakʼ katha ańjompe; E bujhạntar hoṛko, ińakʼ katha luturakʼtińpe.

³ Alaṅ cetʼ leka jomakʼkoe cakha ạikạuetʼkan onkage hoṛkoakʼ lại-kathako biḍạu aṭkarpe.

⁴ Dela bon bachao joṅma, okaṭakʼ do ṭhikakʼ kana; ar okaṭakʼ do bhageakʼ kana mente.

⁵ “Job doe meneda, ‘iń doń miridosgea, menkhan Isor do hok reakʼ bae bicạr akatʼtińạ.

⁶ Hokre minạńre hõ eṛe roroṛicʼ iń lekhakʼ kana; ar bạń dos akatʼre hõ bạń bogekʼ lekań ghạl akana.’

⁷ Job leka cetʼ jãhãe menaea okoe do dakʼ ńu bikʼ leka ṭiṭkạriye ńamakatʼ?

⁸ Okoe bạṛicʼakʼko kạmi akatʼ uni do onko sãoteye calakʼkana; uni do dusṭạmi hoṛkoren gateye hoyokʼkana.

⁹ Uni doe meneda, ‘Isor kusi ocoye do manwa lạgitʼ jãhãn labge bạnukʼa.’

¹⁰ “Onatege E bujan hoṛko, ińakʼ katha ańjompe. Isor khon bạṛicʼakʼ kạmi do sahaṛ akae baṛe tahenma.

¹¹ Manwa do acʼakʼ kạmi lekageye halawaea; ar acʼakʼ colon lekage kuṛạiye emakataea.

¹² Isor do tishõ bae bedhoromeda, sanam daṛeanicʼ do tishõ hok bae peṛta ocowakʼa.

¹³ Dhạrti reakʼ bhar do cetʼ jãhãe uniye emakawadea? Goṭa pirthimi ńel todarot reakʼ kạmire cetʼ jãhãe uniye dohoakadea?

¹⁴ Uni do eken acʼakʼ kathageye hudisle khan ar acʼren jiu ar sahẽtʼ do acʼ ṭhengeye ruạṛ idile khan,

¹⁵ enḍekhan sanam jiwiyanko do mitʼ domteko maraokokʼa, onko do arhõ dhuṛiteko ruạṛ calaokokʼa.

¹⁶ “Buj menakʼtape khan tobe do ińakʼ katha ańjomtińpe; ar ińakʼ kathako luturakʼpe.

¹⁷ Dhorom bikʼcạricʼ do cetʼ bae ḍanṭao daṛekekoa? Ape do cetʼ dhorom ar ektiạranicʼpe bicạr dusi daṛekea?

¹⁸ Uni do rajkoe metakokana, ‘ape dope okoḍagea,’ ar disạm cakʼlaoko doe metakokana, ‘ape do dusṭạmiko kanape.’

¹⁹ Uni do rapajkoakʼ mẽtʼãhã bae beṅgetʼatako kana, nacarko bạgi giḍikate kisạ̃ṛko maraṅ mente bae moneyako kana, ente onko jotoge uniyakʼ ti teakʼ kạmiko kangeako.

²⁰ Mitʼ ripitʼregeko gujukʼkana, ar tala ńindạgeko gujukʼkana; arko dal dalao ocolen khan onko doko marao utạrokʼa. Jãhãe jãhãnakʼ bako kạmire hõ daṛeanko doko gujukʼkana.

²¹ “Isorakʼ mẽtʼ do hoṛakʼ horkorege menakʼtaea; onkoakʼ mimitʼ taṛamko uni doe ńeletʼtakoa.

²² Nonkan jãhãn ńutakʼ ṭhạ̃i se dạriạ umul hõ bạnukʼa one onare bạṛicʼ kạmikan hoṛko oko daṛekokʼ.

²³ Manwawakʼ bicạr lạgitʼ Isor do jãhãn khoj khobor reakʼ jạruṛge bạnukʼtaea;

²⁴ Begor suṭhiktege daṛeanko doe chaka chunetʼkoa ar onkoakʼ ṭhạ̃ire eṭakʼkoe dohoyetʼkoa.

²⁵ Uni do onkoakʼ kạmi reakʼ hisạbkoe dohoyetʼte ńindạ jokhecʼgeye maraoetʼkoa ar onko doko dhaṅ dhaser utạrokʼkana.

²⁶ Onkoakʼ dusṭạmi iạte sanamko samaṅreye sạjạikoa,

²⁷ ente onko do uniyakʼ hor khonko sahaṛ akana; uniyakʼ jãhãn hukumge bako moneyakʼ kana.

²⁸ Onkoakʼ santao iạte reṅgecʼ hoṛkoakʼ rakʼ do uni samaṅre seṭerokʼkana; uni do laṅgaṭkoakʼ rakʼ joṅakʼe ańjometʼtakoa.

²⁹ Hape akane tahẽlenre hõ okoege uni do bako dusi daṛelea; Mocae jhicʼletaere hõ uni do celege bako ńel ńamea. Enhõ uni do manwa ar jạtrenko cetanreye tahẽnkana,

³⁰ jemon Isor baṅ botoraekan hoṛ do aloko raj daṛeakʼ ar hoṛ sapʼko lạgitʼ jhãmpa aloko oḍao daṛeakʼ.

³¹ “Jãhãe hoṛge Isor do bako men akawadea, ‘iń do sạjạiyiń ńamakada, ar bạń behoka;

³² Iń oka bạń ńel orometʼ ona cetʼạńme; ariń behokʼ akatʼ khan, ona do ar bạń onkaea.’

³³ Am do Isorem nihạ̃t giḍi akade khan Isor do cetʼ amakʼ sana leka kuṛạiye emama? Ṭarhao tahen do amakʼ kạmikana, ińakʼ do baṅa; onatege amakʼ monejoṅakʼem sodortama.

³⁴ “Budan hoṛ do ińko mitạń kana, ạkilan hoṛ do ińakʼ katha ańjomkateko meneda,

³⁵ ‘Job do bin bujte kathae roṛetʼkana, uniyakʼ kathare jãhãn ạkilakʼge bạnukʼtaea.’

³⁶ Jobakʼ biḍạu do purạte hoylen khan bhage hoykokʼa, ente uni do dusṭạmi hoṛko leka kathae roṛetʼkana.

³⁷ Uniyakʼ kại sãote uni do hul hõe huletʼkana; uni do abo samaṅre Isore henostawae kana ar Isor upạrte ạḍi lekan kathakoe roṛetʼkana.”