Jobakʼ 33 - সান্তালী বাইবেল

¹ “E job, ńitokʼ do ińakʼ katha ańjomtińme; iń okań men ona moneyakʼme.

² Iń do mocań jhicʼetʼtińạ; Ińakʼ katha ińakʼ alaṅre menakʼa.

³ Ińakʼ katha do khạṭi ontor khonge hijukʼkana; iń okań baḍae onage ińakʼ luṭikin doe roṛeda.

⁴ Isorren jiu doe benao akadińạ; ar sanam daṛeanicʼakʼ sahẽtʼ doe jiwetʼ akadińạ.

⁵ Amem daṛeakʼ khan roṛ ruạṛạńme; amakʼ katha sạriạutam ar iń samaṅre teṅgokʼme.

⁶ Isor samaṅre iń ar am dolaṅ somangea; iń hõ hasa khongeń benao akana.

⁷ Ińakʼ toras do bae toras ocomea, ar ińakʼ ota do bae hamal ocomea.

⁸ “Am do iń samaṅrege katham roṛetʼkana; ar okam roṛakatʼ onageń ańjomakada;

⁹ Amem meneda, ‘iń doń saphagea, ińakʼ do jãhãn kạige bạnukʼtińạ; iń doń dhoromgea, ińre jãhãn dosge bạnukʼa.

¹⁰ Enhõ Isor do ińakʼ doskoe ńam bakʼṛakana; uni do acʼren bạiri menteye hudis edeńkana.

¹¹ Hạṛi paṭate ińakʼ jaṅgae toletʼtińạ; ińakʼ sanam horkoe takaoetʼtińạ.’

¹² “Ińiń metama, noare do bam ṭhikeda, ente manwa khon Isor doe maraṅgea.

¹³ Cedakʼ uni tulucʼ dom jhogṛakʼ kana manwawakʼ jãhãn katha reakʼ roṛ ruạṛge coṅ bae emokʼ?

¹⁴ Isor do ạḍi lekate kathae roṛetʼkana enhõ manwa do ona bako bujhạu daṛeakʼkana.

¹⁵ Kukmũte, ńindạ reakʼ cholre, aṭetʼre acetko jạpitʼkakʼre,

¹⁶ Unre uni do luture jhicʼetʼtakoa are cehaoetʼkote uni doe botor ocoyetʼkoa,

¹⁷ jemon manwa do akoakʼ bedhorom kạmi khonko ruạṛokʼ ar bạḍại khonko pharak hijukʼ.

¹⁸ Nonkate uni do khạndṛuṅ khone or rakapʼetʼkoa, ar tarwaṛe reakʼ maraokʼ khon jiwiye rukhiyạitakoa.

¹⁹ Manwa do rog iạte hasoteye kosṭokʼ kana; jaṅre uni do jaoge hasoyede kana.

²⁰ Onate uni do jomakʼe hirkhạwakʼkana, ar sebel sebel jomakʼ hõ baṅ sebel edekana.

²¹ Uniyakʼ hoṛmo reakʼ jel do rohoṛ jalatʼ akantaea; ar jaṅko hõ oḍokʼ akantaea.

²² Uniyakʼ moron do jarkharokʼ ṭhen sorokʼkana, uniyakʼ jiwi do gujukʼ gogocʼko ṭhen sorakana.

²³ “Mitʼṭen serma goḍet uni lạgitʼe tahen, hajar goḍetko talare mitʼṭen roṛ dodokʼicʼe tahen uni lạgitʼ okaṭakʼ ṭhikkan ona jạhirae lạgitʼ,

²⁴ enḍekhan uni cetanre dayakateye men, ‘Sheolte pheḍ calakʼ khon rukhiyạyem; iń do uni iạte chaḍao reakʼ damiń ńamakada.’

²⁵ Uniyakʼ hoṛmo do juạn leka arhõ hoyokʼtaea; juạn jokhecʼ reakʼ daṛege uni doe ńam ruạṛa.

²⁶ Uni do Isor ṭhene koejoṅa ar uni doe dayawaea; uni do Isorakʼ mẽtʼãhã ńelte rạskạteye andoṛa; Isor do miridos halotreye ruạṛ ạguyea.

²⁷ Unre uni do manwa ṭhen hecʼkateye mena, ‘iń doń kạileda ar sojheakʼ doń peṛtaleda, menkhan ińakʼ paona sạjại do bạń ńamleda.

²⁸ Sheolte calakʼ hor khon uni doe chaḍao akadińạ; ińakʼ jiwi do marsale ńeljoṅa.

²⁹ “Isor do manwa iạte barpe dome onkayeda,

³⁰ jemon uniyakʼ jiwi do Sheol khon ruạṛ hijukʼtaea ar uni cetanre jiwetʼko reakʼ marsal paṛaoaea.

³¹ “E Job, moneyakʼme ar ińakʼ katha atentińme hape akae tahenme, adoń roṛa.

³² Mementeakʼ jãhãnakʼ menakʼtam khan tobe do lạiyạńme; ente dhorom ṭarhaome lạgitʼgeń monejoṅkana.

³³ Amakʼ jãhãn roṛteakʼ bạnukʼ khan tobe do ańjomme; ar hape akae tahenme, iń do ạkil reakʼ iń cetʼama.”