Jobakʼ 32 - সান্তালী বাইবেল

Elihuakʼ galmarao ( 32.1—37.24 )

¹ Job acʼakʼ mẽtʼre dhorome hudisokʼkante onko pene hoṛ do Job roṛ ruạṛaeko thirena.

² Onate Ram gharońjren Busi hoṛ Barkelren hopon Elihu do Job cetanre ạḍiye raṅgaoena, ente Job do Isor lekage dhorome hudisokʼkan tahẽkana.

³ Uni do onko pene gateko cetanre hõ ạḍiye edreyena, ente onko do Jobakʼ katha reakʼ roṛ ruạṛ bako emdaṛeakʼ kan tahẽkanre hõ uniko dusiyede tahẽkana.

⁴ Onko sanamko khon Elihu do umerte komaogeye tahẽkante Job roṛ ruạṛae lạgitʼe ńel horakatʼ tahẽkana.

⁵ Ar onko pene hoṛkoakʼ roṛ ruạṛ reakʼ jãhãnakʼ bạnukʼtakoa menteye ńelketʼ khan uni doe edre seṅgelena.

⁶ Ona iạte Barkelren hopon Elihu doe menkeda, “Ińakʼ umer do komaogea, menkhan ape dope haṛam akana, onate ińakʼ roroṛteakʼ sodor lạgitʼ hõ bạń diletʼ tahẽkana, ente iń doń botorokʼkan tahẽkana.

⁷ Iń doń hudisana, umer ḍherkoge katha doko roṛ ocoge, onkoge ạkil reakʼ sikhạunako emokʼma okoe do ḍherko laha idiakan.

⁸ Sạrige manwa talare jiu do menaegea, ar sanam daṛeanicʼakʼ sahẽtʼge uni doe bujhạu ocoyedekana.

⁹ Eken haṛam hoṛ motoge ạkilan hoṛkanko ona do baṅa, ar ḍher umerankoge bạ̃ṛtiko bujhạua ona hõ baṅa.

¹⁰ “Ona iạteń meneda, ińakʼ katha ańjomtińpe; ińhõ ińakʼ kathakoń roṛ sodora.

¹¹ Apepe galmarao tahẽkanre iń doń ńel horakatʼ tahẽkana. Ar cetʼpe roṛa mente ona reakʼpe ḍunḍhạukan tahẽkanre iń do apeakʼ kathakoń ańjometʼ tahẽkana.

¹² Iń do apeakʼ katha purạteń moneyakʼkan tahẽkana, menkhan ape modre okoehõ jobakʼ katha do bhul mente bape sạbudletʼtaea; ar katha reakʼ roṛ ruạṛ hõ bape emadea.

¹³ Ar niạ katha hõ alope mena, ‘alele bujhạueda, manwa do baṅ Isorge uni doe bhagao daṛeaea.’

¹⁴ Job do iń upạrte jãhãn kathage bae menakada; ape lekanakʼ roṛ ruạṛte iń do bạń roṛ ruạṛaea.

¹⁵ “E Job, noko doko keklesetʼena, noko do ar roroṛteakʼ cetʼge bạnukʼtakoa; onkoakʼ katha do cabayentakoa.

¹⁶ Noko do ńitko thir hape akana, roṛ ruạṛ baṅkateko hape utạrkana; iń do cetʼ ńel hor lek kantińạ?

¹⁷ Ińhõ ńitokʼ do ińakʼ kathań roṛa, ińakʼ motkoń sodortińạ;

¹⁸ ente roroṛteakʼ do ḍhergetińạ, ińren jiu do katha roroṛe uskur edeńkana.

¹⁹ Ińakʼ bhitri do kumte perecʼ darkha rasa leka kantińạ, nãwã harta reakʼ kum oṛejokʼ leka hoyakantińạ.

²⁰ Khalasokʼ lạgitʼ katha roroṛtege hoyokʼtińạ; moca jhicʼkate roṛ ruạṛ hoyokʼtińạ.

²¹ Iń do okoeyakʼ mẽtʼãhã hõ bạń beṅgetʼakʼ kana, se jãhãe manwa hõ bạń jormoṭetʼkoa;

²² Iń do jormoṭko hõ bạń baḍaea; ariń onkae khan ińren sisirjạuicʼ do usạrateye rakapʼ idiyińạ.