Jobakʼ 31 - সান্তালী বাইবেল

¹ “Bạṛicʼ monte jãhãe kũạri kuṛi secʼ bạń beṅged iạte iń do ińakʼ mẽtʼ sãote mitʼṭecʼ bondobos iń dohokeda.

² Sermaren Isor ṭhen khon manwa do cetʼko ńametʼkana? Sermaren sanam daṛeanicʼ ṭhen uniyakʼ baṅ kuṛại cetʼtae?

³ Bedhoromko lạgitʼ jarkharakʼ do cetʼ baṅkana? Ar bạṛicʼakʼko kạmikan hoṛko lạgitʼ muhin do cetʼ baṅkana?

⁴ Uni do cetʼ ińakʼ dãṛãnko bae ńeleda? Ińakʼ taṛamko reakʼ cetʼ bae lekhayeda?

⁵ “Sạrigeń meneda, iń do eṛeakʼre bạń dãṛãnkana. Ińakʼ jaṅga do phikir tayomte bae ńir calakʼkana.

⁶ Khạṭi tulạte Isor do ińe soṅeńma, enḍekhane baḍae daṛeakʼa, iń doń miridosgea.

⁷ Bạricʼ horteń taṛam akatʼ khan, ar ińakʼ mẽtʼ do ontore kại ocoakatʼtiń khan, se ińakʼ tire kại reakʼ jãhãn dag lạṭkao akan khan,

⁸ enḍekhan okań er akatʼ ona do eṭakʼ hoṛko jom ma, ińakʼ anaj do rehetʼ sudhạko totʼ giḍikakʼma.

⁹ “Ińakʼ mon do jãhãe maejiu secʼ bulạu akantiń khan, se aḍepaseren hoṛkoakʼ duạr ṭheniń tãṛãkʼ akan khan,

¹⁰ enḍekhan ińren bạhu do eṭakʼ hoṛakʼ jantegeye ridma, ar eṭakʼ hoṛ do uni tulucʼe giticʼ midokʼma.

¹¹ Iń lạgitʼ ona do hirkhạwakʼ kạmikana, bikʼcạrko hotete sạjại ńam lekan kại kana.

¹² Ona kại do nonkan seṅgel kana oka do Sheol hạbicʼ jolokʼkan, ona do ińakʼ jotowakʼe ḍahao maraoetʼkana.

¹³ “Ińren guti kạ̃ṛmĩko do iń upạrte jãhãn mamblako ạgulere ar ona bicạr chinḍạu lạgitʼ bạń rạjikʼ khan,

¹⁴ enḍekhan Isor do iń samna sạmni tinreye teṅgona unre cetʼ iń cekaya? Uni do cetʼ roṛ ruạṛ iń emawaea?

¹⁵ Kukhire okoe ińe benao akadiń, uni do cetʼ onko hõ bae benao akatʼkoa? Uni mitʼ hoṛge cetʼ eṅgatakʼ kukhire bae benao akatʼbona?

¹⁶ “Reṅgecʼ orecʼko bạń beṅgetʼ akatʼko khan se rạnḍi maejiukoń as chuṭạu ocoakatʼko khan,

¹⁷ ińakʼ jomakʼ do ṭũạr amarko baṅ emkate eskargeń jomakatʼ khan!

¹⁸ Menkhan ińakʼ kom umer khonge ạpuń lekań joton hara akatʼkoa ar ińakʼ janam tayom khonge rạnḍi maejiukoń ńel todarot akatʼkoa-

¹⁹ Jãhãege kicricʼ khạnḍwạkʼ begorte gujukʼ iń ńel akatʼko khan se laṅgaṭ hoṛko koṭogeń ńel akatʼko khan,

²⁰ bhiḍi upʼ reakʼ kicricʼteń lolo ocoakadete uniyakʼ mon bae bhor akawạdiń khan,

²¹ bicạrre ińakʼ ektiạri menakʼ iạte ṭũạr amarko cetanre tiyiń rakapʼ akatʼtiń khan,

²² enḍekhan taren khon ińakʼ bale dạbi do ńurokʼtińma, ar ińakʼ sopo do joṛao khon chaḍao ńurokʼma,

²³ ente iń do Isor emakʼ sạjạiyiń botorakʼ kana; uniyakʼ ṭhonok do nunạkʼge ḍhera, uni botorte onako do ohoń kạmi daṛekea.

²⁴ “Sona cetanreń bhorsalen khan, se khạṭi sonań metae, ‘am cetanrege ińakʼ bhorsa do,’

²⁵ ar ińakʼ tite oka dhon-duribiń hameṭ akawan ona dhon iạteń hulạs len khan,

²⁶ ar siń cando reakʼ jhak jhak marsal ar ńindạ cando reakʼ terdecʼ secʼ beṅgetʼ akaeyiń tahen khan,

²⁷ ar onate ińakʼ ontor do hape hapete unkin secʼ sen akan khan, unkin cokʼakin ńutumte ińakʼ tiyiń cokʼạtiń khan,

²⁸ enḍekhan noako hõ ińakʼ sạjại ńam reakʼ kại kana, ente onate sermaren Isor bạń aṅgoc edekana.

²⁹ “Ińren bạiriyakʼ duk iạte iń do bạń rạskạlena se uniyakʼ kosṭo oktere hõ bạń kusilena.

³⁰ Uniyakʼ jiwi upạrte sarapanakʼ katha menkate ińakʼ moca do bạń kại ocoakatʼtińạ.

³¹ Ińakʼ gharońjren hoṛko do niạ kathageko roṛetʼ tahẽkana, ‘Job emakʼ jelte okoe hale lacʼ do bae bi akatʼtaea?’

³² Jãhãe bidisiạ hoṛ hõ horre do bako tahẽ aṅga akana, ente hortenko lạgitʼ ińakʼ duạr do jao okte jhicʼge tahẽkana.

³³ Eṭakʼ hoṛko leka kại do bạń danaṅ akatʼtińạ ar ińakʼ monre dos hõ bạń oko dohoakatʼa;

³⁴ Onate hoṛko do bạń botorako kan tahẽkana, ińakʼ bõsren hoṛkoakʼ hirkhạ botorte oṛakʼre duṛupʼ hape akae hõ bạń tahẽkana.

³⁵ “Hae, ińakʼ katha jãhãeko ańjomletiń khan! Suhikate gohań emetʼkana, ińakʼ katha do sạrikana; ar sanam daṛeanicʼ jemon ińakʼe ańjomtiń, ar ińren bạdi jemon ińakʼ doskoe ol udukʼạń.

³⁶ Iń do khạṭige tarenre onań gokʼkea ar mukuṭ lekate bohokʼreń horokʼkea.

³⁷ Ińakʼ mimitʼ taṛam reakʼ hisạb uniń emawaea; raj kumar leka iń do uni ṭheniń sorkokʼa.

³⁸ “Ińakʼ ot baṛge iń upạrteye rakʼ akatʼ khan ar nahel gaḍako do mẽtʼ dakʼko joroyetʼ khan,

³⁹ ar ona reakʼ phosol bin damteń jomakatʼ khan se onḍenko mạlik tulucʼ kurmutạhań beohar akatʼ khan,

⁴⁰ enḍekhan onḍe do guhum bodolte aṭkuṭi janamokʼma. Ar jao bodolte ghãs janamokʼma. Nonḍege jobakʼ katha do mucạtʼ akana.