Jobakʼ 30 - সান্তালী বাইবেল

¹ “Menkhan ńit okoe do iń khon umerteko komaoge onko do ińko landa-dhutʼạń kana; onkoren apatko do ińren bhiḍi gukʼpiko ar setako tulucʼ dohoko lạgitʼ hoń nihạ̃tletʼkoa.

² Onkoakʼ ti reakʼ daṛe do cetʼ kaj reakʼ hoykokʼtińạ? One okoeyakʼ do bhor jion reakʼ daṛege atʼakantako.

³ Reṅgecʼ ar ṭonṭate onkoakʼ hoṛmo do rohoṛ khaḍya akantakoa; onko do khaṅkar otgeko hạmbuṛetʼkana.

⁴ Onko do jhạuạ khon sebelakʼ aṛakʼko sitʼ ạguiyetʼ tahẽkana; onkoakʼ jomakʼ do Rothem dare reakʼ rehetʼge tahẽkana.

⁵ Hoṛkoakʼ somaj khonko laga ńir ocoakana; ar kombṛo hoṛ lekako kikiạukʼkana.

⁶ Rohoṛ gaḍa khorloṅreko girobasokʼ kan tahẽkana; ar ot reakʼ ghaḍlakʼ ar dhiri cạṭạni reakʼ danderkoreko tahenkan tahẽkana.

⁷ Gajaṛre onko do gadha lekako aḍraoetʼ tahẽkana, seṅgel siń talare mitʼ ṭhenko girobasokʼ kan tahẽkana.

⁸ Onko do bebuj ar lucạ lamoṭ hoṛren hopon kanako disạm khon onko doko laga ńir ocoakana.

⁹ “Ńitokʼ onkoren hoponko do õṛhẽ sereńte ińko landa-dhutʼạń kana; onko ṭhen do kạhtukgeń hoyakana.

¹⁰ Hirkhạwạń kanako ar iń khon sạṅgińreko tahenkana; ar mẽtʼãhãre thoạń hõ bako bataoetʼkana.

¹¹ Isor doe nijor ocoakadińạ are kạbu akadińạ; iń samaṅrege onko do jhinko capatʼ giḍi akatʼtakoa.

¹² Jojom ti secʼ khonko tudrạu akadińa, jaṅgako ṭhelao pạsiretʼ tińạ; ar iń bạṛijiń lạgitʼ uphạdko benao akada.

¹³ Onko do ińakʼ horko tạkicʼ darametʼtińạ; onko do jãhãe ṭhen khon begor goṛotege ińko sorbonaseń kana.

¹⁴ Onko do osar dhasaoakʼ bhit talate daraeko kanako; ar dhaṅ dhaserakʼ talate lad ladko hijukʼkana.

¹⁵ Ạḍi lekan botor doe gherao esetʼ edeńkana; hoe leka onako botor do ińakʼ manotko khudạuetʼtińạ; ar rimil leka ińakʼ bhạlại do oṭaṅentińạ.

¹⁶ “Iń bhitrire jiwi do bumbhạu oḍokokʼkantińạ; kosṭo reakʼ dinko doko muṭhiạu akadińạ.

¹⁷ Ńindạ jokhecʼ ińakʼ jaṅkore ạḍi ãṭ hasoyedeń kana; ona togocʼ edeń haso do baṅge thirokʼ kana.

¹⁸ Dạrun dukte oyonakʼ doe ghinghin akantińạ, kurtạ reakʼ hoṭokʼ lekageye bedhao ạcurediń kana.

¹⁹ Ona tayom uni do losotʼreye giḍikadińa. Iń do dhuṛi ar torocʼ lekageń hoyakana.

²⁰ “E Isor, am ṭheniń rakʼeda, menkhan bam ańjometʼtińạ; teṅgo akanạń ar bam moneyạńkana.

²¹ Am do ińre kurmutạha lekam beohareda; amakʼ daṛeakʼ tite am dom ghạl akadińạ.

²² Halaṅ rakapʼkate hoerem aṛakʼ edeńkana; birbão hoere giḍikatem sokocʼ edeńkana.

²³ Baḍaegeạń am do gujukʼ secʼem idiyedeń kana, sanam jiwetʼ hoṛko lạgitʼ dohoakatʼ ṭhạ̃item idiyedeń kana.

²⁴ “Okoeye ńur akan ar kosṭore goṛo ńam lạgitʼe rakʼetʼkan uni do cetʼ jãhãeye ghạl daṛekea?

²⁵ Okoe dukreko paṛao akan onko lạgitʼ do cetʼ bạń rakʼleda? Reṅgecʼ orecʼko lạgitʼ do cetʼ jiwi baṅ duklentińạ?

²⁶ Menkhan tinre bhạlạiyakʼ iń aslena unre do bạṛicʼakʼge seṭeradińạ; marsal reakʼ iń ńel horetʼ tahẽkana menkhan ńut hecʼạdińạ.

²⁷ Iń bhitrire heḍejokʼkana ar baṅge thirokʼkantińạ; sasetokʼ dinko iń samaṅre seṭerakana.

²⁸ Iń do dondho akatʼ din leka naṅgal naṅgaliń dãṛãnkana; ar manḍerre teṅgokate goṛoń khojkana.

²⁹ Iń do toyokoren boeha ar ũṭ cẽṛẽren gateń hoyakana.

³⁰ Ińakʼ harta do chaḍaokʼ ńurokʼkantińạ; ar jaṅ do lolote khạurạ akantińạ.

³¹ Ińakʼ peṛesaṅ khon duk reakʼ saḍe oḍokokʼ kana, ar tiriạ khon do homor halaṅ reakʼ saḍege.