Jobakʼ 3 - সান্তালী বাইবেল

Jobakʼ lạlis

^1-2 Ona tayom Job do kathae roṛkeda ar acʼakʼ janam dine sarapatʼteye menkeda,

³ “Ińakʼ janam din do meṭaokʼma, ona ńindạ hõ maraokʼma oneko roṛletʼ, ‘koṛa gidrại hoyakana.’

⁴ Ona din do ńutokʼma; serma khon Isor do enhilokʼ reakʼ aloe moneyakʼma, ona cetanre jãhãn marsal hõ alo paṛaokʼma.

⁵ Dhund ar moron ńutge onakin apnar joṅma; rimil do uniye danaṅ esedema, ar kaṛaṅ ńut do onae botor ocoyma.

⁶ Kaṛaṅ kucạṅ ńut do ona ńindại sabma; bochor reakʼ dinkore alo lekhakʼma, se jãhãn cando talare hõ alo tahenma.

⁷ Ona ńindạ do bạńjhige baṛe hoyokʼma, rạskạ reakʼ cetʼ sereńge onare alo ańjomokʼma.

⁸ Din sakʼrapko do onako sarapakʼma ar Libiathonko buskurema onko do ona dinko sarapakʼma.

⁹ Ona dinren aṅga marsalokʼren ipilkoko ńutokʼma; uni do marsal lạgitʼ ạuṛiyakʼgeye duṛupʼ tahenma; jemon aṅga marsal alo baṛeye ńelńam,

¹⁰ ente eṅgạńakʼ kukhi reakʼ silpiń do bae bondleda, ar harkhet khon sạṅgińre hõ bae doholedińa.

¹¹ “Cedakʼ lacʼre tahenrege bạń gocʼlena? Kukhi khon oḍoktora cedakʼ bạń gocʼlena?

¹² Eṅgạńakʼ gunṭhikin do cedakʼkin ataṅ daramkedińa? Cedakʼ baṅ uni do acʼakʼ toae ńu ocolediń?

¹³ Inạ khan honaṅ sulukteń giticʼkokʼa, ariń jạpitʼkea ariń jirạukokʼa.

¹⁴ Iń do rajko ar mukhiyạko sãoteń tahẽkokʼa ar okoe apnar lạgitʼ dalanko benaoletʼ ona do teheń dhaṅdhaser akana.

¹⁵ Iń do disạm cakʼlaoko sãoteń tahẽkokʼa one okoe do sonate kisạ̃ṛko tahẽkan, ar rupạte oṛakʼko perecʼletʼ tahẽkan.

¹⁶ Okoe bale gidrạ siń reakʼ marsal bae ńelakatʼ, lacʼre gocʼ akan uni bale gidrạ leka otre cedakʼ bạń hosor giḍi ocolena?

¹⁷ Onḍe do dusṭạmi hoṛko bako haḍrapa, ar laṅga akan hoṛ doko jirạu akana.

¹⁸ Bondi akan jotoge onḍe do khạtirjomako tahena; sasantaokoakʼ ãṭ aṛaṅ onḍe do ar baṅ ańjomokʼa.

¹⁹ Onḍe do huḍiń ar maraṅ sanamkoge menakʼkoa, ar golamko do onḍe kisạ̃ṛko khonko sạdhingea.

²⁰ “Okoe dukre menakʼko, onko do cetʼ iạte marsalko ńameda ar cetʼ iạte haṛhatʼ jion hõ jiwiko ńameda?

²¹ Onko do gujukʼko khojkana menkhan bako ńameda, onko do dhon khon hõ ona lạgitʼ bạ̃ṛtiko khojeda.

²² Onko do bebạṛicʼko hulạsokʼ kana, ar ạḍitetʼko rạskạkʼ kana topako ńellenre.

²³ Okoe manwawakʼ hor acʼ ṭhen danaṅge okoe do Isore eṭetʼ esetʼ akade, cedakʼ uni manwa do marsale emocokʼ kana?

²⁴ Ińakʼ kuhrạuge ińakʼ jomakʼ do hoyakana, ar ińakʼ geraṅ do gaḍa dakʼ leka bhumbukokʼ kana.

²⁵ Okań botorakʼ kan tahẽkan onage hecʼ paṛao akawạdińa; ar oka hoyokʼ reakʼ iń botorokʼkan tahẽkan onage ińre hoyakana.

²⁶ Ińakʼ do sukge bạnukʼa, ar jãhãn nirại ar jirạu hõ bạnukʼa, eken dukge menakʼtińạ.”