Jobakʼ 29 - সান্তালী বাইবেল

Jobakʼ roṛ ruạṛ

¹ Ona tayom Job do arhõe men idikeda,

² “Ohae, Isor do tinreye ńeleńkan tahẽkana onako cando ar dinkoń ńam ruạṛle khan!

³ Ińakʼ bohokʼ cetanre uniyakʼ diuhe do jolokʼkan tahẽkana, uniyakʼ marsalte iń do unre ńutreń dãṛãnkan tahẽkana.

⁴ Ińakʼ ona jo bahakʼ dinkore Isorakʼ sotasoṅ do ińakʼ tạmbui bhorakʼkan tahẽkana.

⁵ Unre sanam daṛeanicʼ do iń sãoteye tahẽkana ar iń beṛhaetege ińren gidrạko hõko tahẽkana;

⁶ Ińakʼ taṛam horre toage ạtukʼkan tahẽkana, ar huṭupʼ dhiri khon do jạitun sunum reakʼ jharnage bhumbuk oḍokokʼkan tahẽkana.

⁷ “Tinre nagraha reakʼ phaṭok duạr ṭheniń senokʼkan tahẽkana ar onḍenakʼ kulhi dobạṭiạkore duṛupʼakʼ iń benaoetʼ tahẽkana,

⁸ unre juạnko do iń ńelteko gusạukʼkan tahẽkana ar haṛam hoṛ doko teṅgokʼkan tahẽkana;

⁹ Cetan hudạren hoṛ do katha bako roṛetʼ tahẽkana onko do tite mẽtʼãhãko betʼetʼtako tahẽkana;

¹⁰ unre mukhiyạkoakʼ aṛaṅ do thirokʼkan tahẽkana, onkoakʼ alaṅ do tạrure jalatʼ hapekʼkan tahẽkana.

¹¹ Okoe ińakʼ kathako ańjometʼ tahẽkan onko doko sarhaoedeń tahẽkana, ar okoe ińko ńeleńkan tahẽkan onko do besko mitạńkan tahẽkana,

¹² ente goṛo ńam lạgitʼ okoe reṅgecʼ hoṛko rakʼetʼ tahẽkan ar ṭũạr amarkoren cele gokʼṛokoge bako tahẽkan, onko doń rukhiyạyetʼko tahẽkana.

¹³ Gujukʼ lạgidokʼkan hoṛ hõ ińko bhorạńkan tahẽkana; ar rạnḍi dukhikoakʼ mon doń rạskạ ocoyetʼtako tahẽkana.

¹⁴ Dhorom do kicricʼ lekań horokʼetʼ tahẽkana, ar bhage bicạr do oyonakʼ ar dạṛhiteakʼ lekage tahẽkana;

¹⁵ Kãṛãko lạgitʼ do mẽtʼ ar leḍhako lạgitʼ do jaṅga lekań tahẽkana.

¹⁶ Reṅgecʼ orecʼko lạgitʼ do eṅga-apageń tahẽkana, ar ạnạṛi hoṛkoakʼ mamblako hõń ńel todarotetʼ tahẽkana.

¹⁷ Dusṭạmi hoṛkoakʼ jambe ḍaṭań coakʼ rạputʼetʼtako tahẽkana ar onkoakʼ moca khon do laga sapʼ akankoń chaḍaoetʼko tahẽkana.

¹⁸ “Hudisetʼ tahẽkạnạń ińren hoṛko talaregeń gujukʼa, ińakʼ dinko do gitil leka saṅge hoyokʼtińạ;

¹⁹ Hudisetʼ tahẽkạnạń ińakʼ rehetʼ do dakʼ hạbicʼ seṭerokʼa, ińakʼ ḍạrko cetan reakʼ sisir dakʼ do goṭa ńindạge tahẽ aṅgakʼa.

²⁰ Hudisetʼ tahẽkạnạń hoṛko ṭhen ińakʼ man do nãwãge tahena, ińakʼ akʼ hõ ińakʼ tire nãwãge hoyokʼ tińạ.

²¹ “Hoṛko do ińakʼ katha ańjom lạgitʼko ńel horetʼ tahẽkana, ińakʼ sopolha iạteko hapekʼkan tahẽkana.

²² Ińiń roṛ tayom do cetʼ kathage bako roṛetʼ tahẽkana; onko ṭhen iń do mạ̃hir salakʼ kathań roṛetʼ tahẽkana.

²³ Jạṛi dakʼ leka cetʼ lekako ńel hor onkage onko do ińakʼ katha lạgitʼko tạṅgiyetʼ tahẽkana; niron din reakʼ jạṛi dakʼ leka onko do ińakʼ kathako ataṅetʼ tahẽkana.

²⁴ Hoṛko secʼ beṅgetʼkateń landa lekan onko doko hahaṛakʼkan tahẽkana; ar ińakʼ landare onko do bhorsako ạikạuetʼ tahẽkana.

²⁵ Iń do onkoakʼ horkoń bachao akokan tahẽkana ar onkoren mukhiyạko lekań duṛupʼkan tahẽkana; iń do lạṛhại phạdren raj lekageń tahẽkana; ar homor halaṅetʼ hoṛ do jiwi raṛecʼ iń emakokan tahẽkana.